كەرەكۋ مەكتەپتەرىندە قازىنادان اقشا جىمقىرۋ ارەكەتتەرى تىيىلار ەمەس. گوگولدىڭ ايگىلى ء«ولى جاندارىنىڭ» كەيىپكەرلەرى ءبىلىم سالاسىندا ءالى دە ەلەس بەرىپ تۇرعانى بايقالادى. پروكۋرورلار جىل باسىنان بىرنەشە بىلىقتىڭ بەتىن اشتى.
وسى اپتادا پروكۋرورلار پاۆلودار قالاسىنداعى مەكتەپ ديرەكتورلارىنىڭ ءبىرى ءىرى كولەمدەگى بيۋدجەت قاراجاتىن ۇرلاعانىن اشكەرەلەدى. ول ءبىلىم ۇياسىنا الدەبىر ازاماتتى جۇمىسقا الىپ, سونىڭ اتىنا اي سايىن ەڭبەكاقى اۋدارىپ وتىرعان. تۇپتەپ كەلگەندە, الگى قىزمەتكەر مەكتەپتە جۇمىس ىستەمەگەن. وبلىستىق پروكۋراتۋرانىڭ دەرەگىنشە, مەكتەپ باسشىسى وسى زاڭسىز ارەكەتى ارقىلى مەملەكەتكە جالپى سوماسى 2,5 ملن تەڭگە شىعىن كەلتىرگەن.
«ماتەريالدار سىبايلاس جەمقورلىققا قارسى قىزمەتكە جولداندى. قىلمىستىق كودەكستىڭ 189-بابى (سەنىپ تاپسىرىلعان بوتەننىڭ مۇلكىن يەمدەنۋ نەمەسە جىمقىرۋ) بويىنشا سوتقا دەيىنگى تەرگەپ-تەكسەرۋ جۇرگىزىلىپ جاتىر», دەپ حابارلادى وڭىرلىك پروكۋراتۋرادان.
بۇعان قوسا جۋىقتا اققۋلى اۋدانىنداعى «قىزعالداق» بالاباقشاسىنىڭ ديرەكتورى مەن بۋحگالتەرى مەكەمەدەگى جالاقى مەن ۇستەمەاقىلاردى زاڭسىز ەسەپتەۋ جولىمەن 62 ملن تەڭگەدەن استام بيۋدجەت قاراجاتىن قولدى قىلعانى تۋرالى ءىس سوتتا قارالدى. بەلگىلى بولعانداي, 2016-2023 جىلدار كەزەڭىندە بالاباقشا ديرەكتورى مەن بۋحگالتەر قىزمەتكەرلەردىڭ ەڭبەكاقىسىنا قوسىمشا جالاقى مەن ۇستەمەاقىنى زاڭسىز بەلگىلەپ, اي سايىن ول قاراجاتتى وزدەرى يەمدەنىپ وتىرعان. سوت وتىرىسىندا ايىپتالۋشىلاردىڭ قىلمىسى كۋاگەرلەردىڭ ايعاقتارىمەن, سوت ساراپتامالارىنىڭ قورىتىندىلارىمەن جانە باسقا دا دەرەك-دايەكتەرمەن دالەلدەندى.
وبلىستىق سوتتان مالىمدەگەندەي, بۇل زاڭسىز ارەكەت اۋىر سىبايلاس جەمقورلىق قىلمىستارعا جاتادى, ول ءۇشىن قىلمىستىق زاڭدا 7 جىلدان 12 جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازا كوزدەلگەن. اققۋلى اۋداندىق سوتى ديرەكتوردىڭ زەينەتكەرلىك جاسىن ەسكەرە وتىرىپ, 7 جىلعا باس بوستاندىعىنان ايىرۋ جازاسىن تاعايىندادى. بۇعان قوسا مەملەكەتتىك قىزمەتتە لاۋازىمداردى اتقارۋ قۇقىعىنان ايىرىلدى. ال بۋحگالتەردى 8 جىلعا كەستى. دەيتۇرعانمەن ونىڭ سوتتاعى شىن نيەتپەن وكىنۋىن, م ۇلىكتىك زالالدىڭ ەرىكتى تۇردە ءىشىنارا وتەگەنىن, اسىراۋىندا كامەلەتكە تولماعان ءتورت بالانىڭ, ونىڭ ەكەۋى جاس بالا ەكەنىن ەسكەرە وتىرىپ, قىلمىستىق كودەكستىڭ 74-بابىنىڭ 1-بولىگى نەگىزىندە جازاسىن وتەۋدى كەيىنگە قالدىردى. بۋحگالتەرلىك قىزمەتپەن الداعى 10 جىل ىشىندە اينالىسا المايدى.
اتاپ وتەرلىگى, پروكۋرورلار بۇعان قوسا پاۆلودار قالاسىنىڭ بارلىق مەكتەبىندە بەينەباقىلاۋ كامەرالارى جازۋ فۋنكتسيالارىنسىز جۇمىس ىستەيتىنىن انىقتادى. ولاردىڭ بەينەمۇراعاتتارىنا كىرۋ مۇمكىندىگى جوق جانە پوليتسيانىڭ جەدەل باسقارۋ ورتالىعىنا قوسىلماعان. بۇل كەمشىلىك 2023 جىلى «Smart City Pavodar» جوباسى اياسىندا تۇزەتىلۋگە ءتيىس ەدى. الايدا جەتكىزۋشىنىڭ شارتتىق مىندەتتەمەلەردى ورىنداماۋىنا بايلانىستى ءالى ىسكە اسىرىلماعان.
پاۆلودار وبلىسى