مىڭ العىس ساعان,– دەيدى اۆتوموبيل جولدارى كوميتەتى شىعىس قازاقستان وبلىستىق دەپارتامەنتىنىڭ ديرەكتورى سايرانبەك بارماقوۆ
بيىلعى ۇزاققا سوزىلعان قاتتى قىستى, بوران-شاشىننىڭ تولاسسىز سوزىلۋى سالدارىنان كۇرە جولدىڭ اپتالاپ جابىلىپ قالۋىن ءتىپتى كونەكوز قاريالاردىڭ ءوزى ءجۇز جىلدا ءبىر قايتالاناتىن كۇردەلى قۇبىلىس دەپ ەسكە الادى. ول از بولعانداي كۇننىڭ كۇرت جىلىنۋىنان التايدىڭ بىرنەشە اۋىلدارىندا تاسقىن سۋ بولىپ, ۇيلەردى قيراتىپ, ەلۋ مىڭعا تارتا مال قىرىلدى. ال جولداردىڭ جاعدايى ءتىپتى اۋىر. بۇل جايلى اۆتوموبيل جولدارى كوميتەتى شىعىس قازاقستان وبلىستىق دەپارتامەنتىنىڭ ديرەكتورى سايرانبەك بارماقوۆتان ايتىپ بەرۋىن وتىنگەن ەدىك.
– سايرانبەك سولتانبەك ۇلى, ەڭ الدىمەن قاھارلى قىس جايلى ايتىپ وتسەڭىز. التايدىڭ التى ايعا سوزىلاتىن قىسى بيىل ءتىپتى جەتى ايعا ۇزارىپ كەتكەنى بەلگىلى. بۇل جالپى وبلىس حالقىنا ساباق بولدى. ودان كەيىن كوكتەمگى سۋ تاسقىنى كەزەڭىنىڭ ءوتۋى, وعان ازىرلىكتىڭ قالاي بولعانى جايلى ايتىپ بەرسەڭىز؟
– ءيا, مۇنداي تولاسسىز جاۋعان قار, قاھارلى قىس كەيىنگى 40-50 جىل ىشىندە اباي, ءۇرجار, تارباعاتاي, زايسان, كوكپەكتى, زىريان جانە تاعى باسقا اۋداندارىندا بولماعان وقيعا.
وتكەن جىلدىڭ جەلتوقسانىنان باستاپ جاۋعان قار, ۇيتقىپ سوققان بوران ءجيى-ءجيى قايتالانىپ تۇردى. قىس بويى ءبىزدىڭ ديسپەتچەرلىك قىزمەتتىڭ مالىمەتى بويىنشا, قاڭتاردان باستاپ ءتورت ايدىڭ ىشىندە 68 كۇن قارلى-بوراندى, ال 17 كۇن قاقاعان قاتتى ايازدى بولدى. ەڭ سوڭعى قارلى بوران ءساۋىردىڭ 14-ءى كۇنى كوكپەكتى, تارباعاتاي جانە زايسان اۋداندارىندا قايتالاي سوعىپ, جول قوزعالىسىنىڭ ۋاقىتشا تەجەلۋىنە اكەلىپ سوقتى. ىلعالعا تولى اۋىر قار تازالاۋ تەحنيكالارى ءۇشىن دە كوپتەگەن اۋىرتپالىقتار جۇكتەدى.
بۇرىنعى جىلدار قار كوشكىنى “وسكەمەن – زىريان” اۆتوجولىنىڭ 61-66 شاقىرىمىندا قاڭتاردىڭ اياعى مەن اقپان ايلارىندا جۇرەتىن بولسا, بيىلعى قىستا 2009 جىلعى جەلتوقساننىڭ ورتاسىنان باستاپ ناۋرىزدىڭ 20-نا دەيىن 12 رەت توسىننان قار كوشكىنى ءتۇسۋ وقيعالارى بولدى جانە 3 رەت الدىن الۋ ءۇشىن ادەيىلەپ كوشكىن ءتۇسىرىلدى.
جولداردى قىسقى قالىپتا ۇستاۋ ءۇشىن “قازاقاۆتوجول” رمك شىعىس قازاقستان وبلىستىق فيليالىندا 122 بىرلىك تەحنيكا ءجوندەلىپ, دايىندالدى. قالىڭ قار مەن بوراندا 70-80 بىرلىك تەحنيكا كۇندەلىكتى جۇمىس ىستەدى. بيىلعى جىل قىستىڭ وتە قاتال بولۋىنان قار تازالاعىش تەحنيكا جەتىسپەدى, سول سەبەپتى كومەككە باسقا وبلىستاردان بارلىعى – 47 بىرلىك قار تازالاعىش تەحنيكا شاقىرىلدى. ونىڭ ىشىندە اقمولا وبلىسىنان – 15 بىرلىك, الماتى وبلىسىنان – 2 بىرلىك, پاۆلودار وبلىسىنان – 10 بىرلىك, قاراعاندى وبلىسىنان – 11 بىرلىك, سولتۇستىك قازاقستان وبلىسىنان – 1 بىرلىك جانە وڭتۇستىك قازاقستاننان – 5 بىرلىك تەحنيكا كەلدى. سونىمەن قاتار, ءوز وبلىسىمىزدىڭ ۇجىمدارىنان – 38 بىرلىك, اياگوز اسكەري گارنيزونىنان – 4 بىرلىك تەحنيكا كومەككە جەتتى. قولداعى بار جانە كومەككە كەلگەن تەحنيكالار تاۋلىگىنە 12-14 ساعات قولدانىستا بولدى, كەي كەزدەردە مەحانيزاتورلاردى اۋىستىرىپ تاۋلىك بويى جۇمىس تولاسسىز ۇيىمداستىرىلدى.
جولداردى قارلى بوران الماۋ ءۇشىن باسقا دا قوسىمشا شارالار قولدانىلدى. قار الاتىن جول بويىنا 5350 قۋما مەتر قار ۇستاعىش قاشالار قويىلدى جانە 81730 قۋما مەتر قار ورلارى جاسالدى.
ۇدايىنان 4-6 كۇنگە سوزىلعان بوراندا ەلدى مەكەندەردىڭ اراسىندا كولىك قوزعالىسى توقتاپ قالدى, قالاي بولعاندا كولىك قارىم-قاتىناسىن توقتاتپاۋ ءۇشىن مەحانيكالاندىرىلعان بريگادالار ۇيىمداستىرىلىپ, كولىكتەردى ءبىر ەلدى مەكەننەن ەكىنشى ەلدى مەكەنگە الىپ بارىپ وتىردىق. “الماتى – وسكەمەن”, “ومبى – مايقاپشاعاي”, تاعى باسقا جولداردا وسىنداي جاعدايلار ءجيى بولىپ تۇردى.
قاتتى ايازداردا جانە تۇك كورىنبەيتىن بورانداردا كولىكتەردىڭ جولدا قالۋ وقيعالارى جيىلەدى. قىستاي بوراندى كۇندەرى قار قۇرساۋىنان قۇتقارىلعان تەحنيكالاردىڭ جالپى سانى مولشەرمەن 6530 بولسا, سونىڭ ىشىندە 377 جولاۋشىلار وتىرعان اۆتوبۋستار, 761 جۇك تاسۋشى اۆتوكولىك پەن 5392 جەڭىل ماشينە بولدى. مۇنداي جاعداي جولشىلاردىڭ جاۋاپكەرشىلىكتەرىن ارتتىرا ءتۇستى. جولدا تۇرىپ قالۋ جاعدايى اسىرەسە “الماتى – وسكەمەن” اۆتوجولىندا ەرەكشە ورىن الدى. قار قۇرساۋىنان 2869 تەحنيكا قۇتقارىلسا, سونىڭ ىشىندە 180 اۆتوبۋس جولاۋشىلارىمەن قاۋىپسىز جەرلەرگە جەتكىزىلدى. سونىمەن قاتار ناۋرىزدىڭ 17 كۇنىنەن باستاپ, تارباعاتاي اۋدانىندا قاتتى سۋ تاسقىنىنىڭ سالدارىنان كوكجىرا, جانتىكەي اۋىلدارىن سۋ شايعاننان سوڭ وبلىسىمىزدىڭ جان-جاعىنان گۋمانيتارلىق كومەكتەر كەلە باستادى. قاتتى سوققان بوران سول جۇكتەردى اتالعان اۋىلدارعا جەتكىزۋگە كوپ كەدەرگىلەر جاسادى, سول سەبەپتى گۋمانيتارلىق كولىكتەردى جانە باسقا دا اۆتوكولىكتەردى كولونناعا ءتىزىپ وسكەمەننەن, سەمەيدەن جانە الماتى وبلىسىنان تارباعاتاي اۋدانىنا سۋ شايعان اۋىلدارعا دەيىن, سوعىپ تۇرعان قارلى بورانعا قاراماستان, كولوننانى كۇندىز-ءتۇنى توقتاتپاستان كوزدەگەن ەلدى مەكەنگە جەتكىزىپ وتىردىق. مىسالى, سەمەيدەن 4 مارتە كولوننا شىقسا, وسكەمەننەن 20 رەت كولوننا شىقتى, سونىڭ ءبارىن باستاپقى ەلدى مەكەننەن شىعارىپ جانتىكەي, كوكجىرا, تاعى باسقا اۋىلدارعا جەتكىزىلدى. كولوننالاردى شىعارىپ سالۋ جۇمىسىنا جول پايدالانۋ ۋچاسكەلەرى, كومەككە كەلگەن تەحنيكالار اسا جاۋاپكەرشىلىكپەن قارادى, تاۋلىك بويى توقتاماستان جۇمىس ىستەدى, ويتكەنى جوعارى جاۋاپكەرشىلىكتى ءبارى ءتۇسىندى. گۋمانيتارلىق جۇك تيەگەن اۆتوماشينەلەرمەن قاتار باسقا دا اۆتوكولىكتەر كولوننانىڭ ىشىندە بولدى. جالپى سانى 25 رەت كولوننا قۇرىلىپ, 1372 اۆتوكولىك ماقساتتى جەرلەرىنە جەتكىزىلدى. سول تەحنيكالاردى شىعارىپ سالۋ جۇمىسىنا جول بويى ورنالاسقان دەۋ-لەردەن قار تازالاۋعا بارلىق جول تەحنيكالارى جۇمىلدىرىلدى. سىن ساتتە قر كولىك جانە كوممۋنيكاتسيا ءمينيسترى ابىلعازى قۇسايىنوۆ كەلىپ, وبلىس اكىمى بەردىبەك ساپارباەۆپەن بىرگە اپات ايماقتارىن ارالاپ شىقتى. بۇزىلعان جولداردى جوندەۋگە مول قارجى بولگىزدى. اتاپ ءوتۋ كەرەك, مينيسترلىكتىڭ اۆتوموبيل جولدارى كوميتەتىنىڭ توراعاسى زامير ساعىنوۆ تا ۇزاق ۋاقىت بويى وبلىستا بولىپ, زارداپ شەككەندەرگە ناقتى كومەك كورسەتتى. جاقىندا عانا ەلىمىزدىڭ ۇكىمەت باسشىسى كارىم ءماسىموۆ جانە كولىك جانە كوممۋنيكاتسيا ۆيتسە-ءمينيسترى دۋلات كۇتەربەكوۆ باستاعان توپ تارباعاتاي اۋدانىنىڭ كوكجىرا اۋىلىندا بولىپ, سالىنىپ جاتقان تۇرعىن ۇيلەردى كوردى. ەلباسى ن. نازارباەۆتىڭ سالەمىن جەتكىزدى, كومەكتىڭ جالعاسا بەرەتىنىن ايتتى.
قاقاعان ايازدا, سۇراپىل بوراندا جولداردى قاردان تازالاۋدا, كۇندىز-ءتۇنى توقتاماي جۇمىس ىستەپ جۇرگەن مەحانيزاتورلاردىڭ ەڭبەگى ەرەسەن.
وسىنداي قىستا قاجىرلى ەڭبەگىمەن كوزگە تۇسكەن جۇمىسشىلاردى اتاپ ءوتۋدى دۇرىس سانادىق. سولاردىڭ ىشىندە جول سالاسىندا كوپ جىلدان بەرى ىستەپ كەلە جاتقان, قاجىرلى ەڭبەگىمەن كوزگە تۇسكەن مەحانيزاتورلار مەن جول ماماندارى – جپۋ-24-تە ەڭبەك جولىن قاراپايىم جول جۇمىسشىسىنان باستاعان, قازىر باس جول شەبەرى بولىپ جۇمىس ىستەيتىن سىلامبەك ەسپول ۇلىن, جپۋ-25-تە كوپ جىلدان بەرى قار لاقتىرعىش تەحنيكاسىنىڭ مەحانيزاتورى قۋانىش قاسىمحانوۆتى, جپۋ-26-دان تۇرلىبەك ءساريندى, قالقان ورناتۋ ۋچاسكەسىنەن الەكساندر سكوبليكوۆتى, جپۋ-30-دان الىمساق شوباقوۆتى, سونداي-اق ك-700 تراكتورىنىڭ مەحانيزاتورى جپۋ-29-دان ەسپول سىلامبەكوۆتى جانە جپۋ-31-دەن بايىرعى مەحانيزاتور ۆيتالي شماتوۆتى ەرەكشە اتاپ ءوتۋ ورىندى.
ەندى كوكتەمگى سۋ تاسقىنى جايلى, وبلىستا قار مولشەرىنىڭ جىلداعىدان بەس-التى ەسە كوپ جاۋى ەتەك-جەڭدى جيناۋعا يتەرمەلەيدى. جىلدا كوكتەمگى سۋ تاسقىنىنان قورعاۋ ءۇشىن “قازاقاۆتوجول” رمك شىعىس قازاقستان بولىمىندە ءىس-شارالار جاسالىپ, ىسكە اسىرىلدى. بۇل شارالار جولداردى, كوپىرلەردى جانە سۋ وتكىزگىش قۇبىرلاردى كۇيرەۋدەن, اقاۋ الۋدان ساقتاۋ ءۇشىن جاسالادى. وسى شارالاردى ورىنداۋ رەتىندە 3420 شاقىرىم جول, 254 كوپىر جانە 2639 قۇبىر كوكتەمگى سۋ تاسقىنىنا دايىندالدى. سونىمەن قاتار 15 ناۋرىزعا دەيىن 15م3 اعاش ماتەريالدارى, 500م3 كەسەك تاس, 1400م3 قيىرشىق تاس, 40 دانا تەمىر-قۇيماتاس قۇبىر بۋىنى جانە 16000 دانا قاپشىق دايىندالدى. جەرگىلىكتى ءار بولىمدەردە 14 قاۋىپتىك بريگادا, كەرەكتى قۇرال-سايماندارمەن جانە تەحنيكالارمەن جابدىقتالدى. تاسقىن سۋ كەزەڭىندە تاۋلىك بويى كەزەكشىلىك ۇيىمداستىرىلدى. ۇلكەن وزەندەردەن وتەتىن كوپىرلەردە مۇز ءۇيىندىسى تۇرىپ قالماۋىن قامتاماسىز ەتۋ ءۇشىن ولاردى جارىلعىش زاتتارمەن اتۋ ءۇشىن “ونيكس” جشس-مەن كەلىسىم-شارت جاسالدى.
وبلىسىمىزداعى رەسپۋبليكالىق ماڭىزى بار جولداردىڭ بويىندا 2010 جىلعى تاسقىن سۋ كەزەڭىندە جول ۇستىنەن سۋ ءجۇرىپ, جول جيەگىن شايۋ 85 تەلىمدە ورىن السا, كوپىرلەردىڭ القىمىن جانە قۇبىرلاردىڭ كىرەبەرىس, شىعابەرىس بەكىتۋلەرىن سۋ شايۋى 26 جاعدايدا ورىن العان. جول جيەگىن سۋ شايۋى كوپ جەرلەردە تەز ارادا 2-3 كۇن ىشىندە قايتا قالپىنا كەلتىرىلىپ وتىرىلدى.
قاردىڭ كۇرت ەرۋى جانە ۇدايىنان ءۇش كۇن جاۋعان جاڭبىردىڭ سالدارىنان تارباعاتاي اۋدانىندا تاسقىن سۋ كوتەرىلدى. بوعاس وزەنى ارناسىنان شىعىپ دالاعا جايىلىپ “ومبى- مايقاشاعاي” حالىقارالىق ماڭىزى بار جولعا كەلىپ تىرەلدى. سول جەردەگى كوپىر مەن قۇبىر كوپ مولشەردەگى تاسقىندى وتكىزىپ ۇلگەرمەي, سۋ جولدىڭ ۇستىنەن كولدەنەڭ اقتى. وسىنداي جاعداي “زايسان – قالجىر – تەرەكتى” جولىنىڭ 57 شاقىرىمىندا دا بولدى. ەلدى مەكەندى سۋ الىپ كەتۋ قاۋىپى تۋعان كەزدە جولدى كولدەنەڭ جىرىپ توپان سۋدى اعىزىپ جىبەرۋگە ءماجبۇر بولدىق. قازىر وسى جەرگە اينالما جول سالىنىپ سۋ جىرعان جەرگە قوسارلانعان تەمىر-قۇيماتاستى قۇبىر سالۋ كوزدەلۋدە.
جالپى العاندا “ومبى-مايقاپشاعاي” جولىندا ەكى كوپىردىڭ جاعالاۋىن, ءبىر سۋ قۇبىرىنىڭ جانە ەلۋ ءۇش جول تەلىمىندە جيەكتى سۋ شايۋ ورىن السا, ال “قاراعاندى – اياگوز – بوعاس” جولىندا 2 كوپىردىڭ تىرەۋلەرىن سۋ شايىپ, ءارتۇرلى اقاۋلار ورىن الدى. قازىرگى كەزدە وسى جول بويىنداعى ەكى كوپىردى ءجوندەۋگە 500 ملن. تەڭگە ءبولىنىپ, “سك زايسان” جشس جوندەۋ جۇمىستارىنا كىرىسىپ كەتتى. قۇلاعان كوپىرلەرگە اينالما جول سالىندى.
ءيا, بيىلعى قىس بارىمىزگە ۇمىتىلماس ساباق بولدى, ولقىلىقتاردىڭ ورنىن تولتىرۋعا ماجبۇرلەدى.
– ەندى ءوزىڭىزدىڭ نەگىزگى جۇمىستارىڭىز تۋرالى ايتىپ بەرسەڭىز؟
– شىعىس قازاقستان وبلىسى بويىنشا رەسپۋبليكالىق ماڭىزى بار اۆتوموبيل جولدارىنىڭ ۇزىندىعى 3420 شاقىرىمدى قۇرايدى.
وبلىستاعى اۆتوموبيل جولدارىن ءتيىستى قالپىنا كەلتىرۋ ءۇشىن 2010 جىلى رەسپۋبليكالىق بيۋدجەتتەن 5 ملرد. 859 ملن. تەڭگە ءبولىندى, سونىڭ ىشىندە:
– اۆتوموبيل جولدارىن قايتا جاڭارتۋعا – 2 ملرد. 886 ملن, كۇردەلى جوندەۋگە – 1 ملرد. 148 ملن, ورتا جوندەۋگە – 656 ملن, اعىمداعى جوندەۋ, كۇتىپ ۇستاۋ جانە كوگالداندىرۋعا – 1 ملرد. 169 ملن. تەڭگە ءبولىنىپ وتىر. ال اۆتوموبيل جولدارىن قايتا جاڭعىرتۋعا 2 ملرد. 886 ملن. تەڭگە ءبولىندى. بۇل از قارجى ەمەس.
2010 جىلى “تاسكەسكەن-باقتى (قحر)” اۆتوموبيل جولىنىڭ 60-100 شاقىرىمىن قايتا جاڭارتۋ جالعاسۋدا. باس مەردىگەر – “جەلدورستروي” اق. ولار بيىلعى جۇمىس جوسپارى بويىنشا 1 ملرد. 470 ملن. تەڭگەنى يگەرىپ, 16 شاقىرىم جولدى پايدالانۋعا, جىلدىق قارجىلاندىرۋدىڭ وزگەرۋىنە بايلانىستى نىسان قۇرىلىسىنىڭ اياقتالۋ مەرزىمى 2011 جىلعا اۋىستىرىلدى.
2011 جىلدان باستاپ اتالعان جولدىڭ ۇزىندىعى 40 شاقىرىم بولاتىن, 20-60 شاقىرىمدارىندا قايتا جاڭارتۋ جۇمىستارىن باستاۋ جوسپارلانۋدا.
2010 جىلدان باستاپ “رف شەكاراسى (ومبىعا)-مايقاپشاعاي (قحر شىعۋ) پاۆلودار, سەمەي قالالارى ارقىلى” اۆتوموبيل جولىندا قايتا جاڭارتۋ جۇمىستارى باستالادى. سەمەي قالاسى مەن قالباتاۋ اۋىلى اراسىنداعى جالپى ۇزىندىعى 78 شاقىرىمدى قۇرايتىن 828-870 جانە 870-906 شاقىرىمدارىنداعى جول تەلىمدەرىن قايتا جاڭارتۋ قولعا الىندى.
سونىمەن قاتار, بيىلعى جىلى “تاسكەسكەن-باقتى (قحر)” اۆتوموبيل جولىنىڭ 133-146 شاقىرىمدارىندا قايتا جاڭارتۋ جۇمىستارى قولعا الىندى. ونىڭ ۇزىندىعى 13 شاقىرىم. بەكىتىلگەن سمەتالىق قۇنى – 1 ملرد. 653 ملن. تەڭگە. جوبانىڭ قورىتىندى قۇنى جانە باس مەردىگەرى اشىق كونكۋرس ارقىلى انىقتالۋدا. جول نىسانىنىڭ قۇرىلىس مەرزىمى 2010-2011 جىلدار. 2010 جىلعى قۇرىلىس جۇمىستارىنا 530 ملن. تەڭگە ءبولىندى.
اۆتوموبيل جولدارىن كۇردەلى جوندەۋگە 1 ملرد. 148 ملن. تەڭگە ءبولىندى.
2010 جىلى “وسكەمەن-سەمەي” اۆتوموبيل جولىنىڭ 66-84 شاقىرىمىنا كۇردەلى جوندەۋ جۇمىستارى جالعاسادى. باس مەردىگەر – “گوردورستروي” جشس. نىساننىڭ تولىق قۇنى – 1 ملرد. 361 ملن. تەڭگە. 2009 جىلى 291,5 ملن. تەڭگە يگەرىلدى. جىلدىق قارجىلاندىرۋدىڭ وزگەرۋىنە بايلانىستى نىسان قۇرىلىسىنىڭ اياقتالۋ مەرزىمى 2011 جىلعا اۋىستىرىلدى.
2010 جىلعى قۇرىلىس جۇمىستارىنا 355,6 ملن. تەڭگە ءبولىندى جانە 6 شاقىرىم جول تەلىمىن تاپسىرۋ جوسپارلانۋدا.
“وسكەمەن – زىريان – كاتون-قاراعاي – ۇلكەن-نارىن – راحمان قاينارلارى” اۆتوموبيل جولىنىڭ 46-56 شاقىرىمىن كۇردەلى جوندەۋ جۇمىستارى اياقتالادى. باس مەردىگەر – “كاتون-قاراعاي پدۋ” جشس. نىساننىڭ تولىق قۇنى – 1 ملرد. 400 ملن. تەڭگە. 2009 جىلى 340,2 ملن. تەڭگە يگەرىلدى.
2010 جىلعى قۇرىلىس جۇمىستارىنا 792,5 ملن. تەڭگە ءبولىنىپ, جول تەلىمىن پايدالانۋعا بەرۋدى جوسپارلاپ وتىرمىز.
اۆتوموبيل جولىن ورتا جوندەۋ جۇمىستارىنا 656 ميلليون تەڭگە قارجى ءبولىنىپ وتىر.
جۇمىستاردىڭ ناقتى قۇنى مەن جۇمىس جۇرگىزەتىن مەردىگەرلىك ۇيىم اشىق كونكۋرستىڭ قورىتىندىسى بويىنشا تەك 4 باعىتتاعى جولدار بويىنشا عانا انىقتالدى.
“وسكەمەن-زىريان-كاتونقاراعاي-ۇلكەن-نارىن-راحمان قاينارلارى” اۆتوموبيل جولىنىڭ 171-191, 246-251 شاقىرىمدارىنا, جالپى ۇزىندىعى 25 شاقىرىم. مەردىگەر ۇيىم – “كاتون-قاراعاي پدۋ” جشس, قۇرىلىس جۇمىستارىنىڭ قۇنى – 122,5 ملن. تەڭگە.
“رف شەكاراسى (ومبىعا)-مايقاپشاعاي (قحر-عا شىعۋ) پاۆلودار, سەمەي قالالارى ارقىلى” اۆتوموبيل جولىنىڭ 1123-1133, 1243-1245, 1258-1272 شاقىرىمدارىنا, جالپى ۇزىندىعى 26 شاقىرىم. مەردىگەر ۇيىم – “زايسان قۇرىلىس كومپانياسى” جشس, قۇرىلىس جۇمىستارىنىڭ قۇنى – 130 ملن. تەڭگە.
“وسكەمەن-سەمەي” اۆتوموبيل جولىنىڭ 48-66 شاقىرىمدارىنا, جالپى ۇزىندىعى 18 شاقىرىم. مەردىگەر ۇيىم – “رەمدور” جشس, قۇرىلىس جۇمىستارىنىڭ قۇنى – 70,8 ملن. تەڭگە.
“الماتى-وسكەمەن” اۆتوموبيل جولىنىڭ 899-943 شاقىرىمدارىنا, جالپى ۇزىندىعى 44 شاقىرىم, مەردىگەر ۇيىم – “گۋكاس-ا فيرماسى” جشس, قۇرىلىس جۇمىستارىنىڭ قۇنى – 203,4 ملن. تەڭگە.
“قاراعاندى-اياگوز-تارباعاتاي-بوعاس” اۆتوموبيل جولىنىڭ 694-704 شاقىرىمدارىنا (جالپى ۇزىندىعى 10 شاقىرىم) جانە “سەمەي-قاينار” اۆتوموبيل جولىنىڭ 28-44 شاقىرىمدارىنا (جالپى ۇزىندىعى 16 شاقىرىم) مەردىگەر مەكەمەلەر قازىرگى ۋاقىتتا انىقتالۋدا.
جوبالاردى جۇزەگە اسىرۋداعى قازاقستاندىق ونىمدەردىڭ ۇلەسى 90%-دى قۇرايدى. جول-قۇرىلىس ماتەريالدارىن دايىنداۋ جالعاسۋدا. جول شارۋاشىلىقتارى بيتۋم ونىمدەرىن ساتىپ الۋعا جەتكىزىپ بەرۋشى ۇيىمدارمەن, سونىڭ ىشىندە پاۆلودار, ومبى مۇناي وڭدەۋ زاۋىتتارىمەن كەلىسىمگە وتىردى.
قازىرگى ۋاقىتتا جول شارۋاشىلىقتارىنىڭ قاراماعىندا 23 اسفالت-قۇيماتاس شىعاراتىن زاۋىت بار. زاۋىتتاردىڭ بارلىعى تەحنيكالىق قىزمەتكەرلەرمەن تولىق جابدىقتالىپ, جاڭا قۇرىلىس ماۋسىمىنا دايىن.
ءبىزدىڭ وبلىستاعى جوبالاردى جۇزەگە اسىرۋ ءۇشىن ارنالعان قازاقستاندىق ماتەريالدار 90 پايىزدان ارتادى. ماتەريالداردى دايىنداۋ جالعاسۋدا. جول شارۋاشىلىقتارى بيتۋمدى جەتكىزۋگە ءارتۇرلى جابدىقتاۋشىلارمەن, سونىڭ ىشىندە, پاۆلودار, ومبى مۇناي وندەيتىن زاۋىتتارمەن كەلىسىم-شارت جاسالدى.
جول شارۋاشىلىق قاراماعىندا قازىرگى ۋاقىتتا 23 اسفالت-قۇيماتاس زاۋىتى بار.
– اڭگىمەڭىزگە راحمەت!
اڭگىمەلەسكەن وڭداسىن ەلۋباي, “ەگەمەن قازاقستان”.
وسكەمەن.