قازاقستان رەسپۋبليكاسى مادەنيەت جانە اقپارات مينيسترلىگىنىڭ قولداۋىمەن جامبىل اتىنداعى قازاق مەملەكەتتىك اكادەميالىق فيلارمونياسىندا گيتاريستەردىڭ جاڭا توبى قۇرىلدى.
كۆينتەتتىڭ كوركەمدىك جەتەكشىسى – اتاقتى گيتاريست, كومپوزيتور, حالىقارالىق بايقاۋلاردىڭ لاۋرەاتى باۋىرجان جىلقىباەۆ. ونىڭ ايتۋىنشا, گيتاريستەر كۆينتەتىن ۇيىمداستىرۋ كوپتەن بەرى كوڭىلدە جۇرگەن جوسپار بولعان. فيلارمونيا باسشىلىعىنىڭ ۇسىنىسىنان سوڭ, ويلانباي ىسكە كىرىسكەن كورىنەدى.
كۆينتەت مۇشەلەرىنىڭ قاي-قايسى بولسىن – قازاق ونەرىندە وزىندىك ورنى, ءوز سوقپاعى بار جاندار. اقبار قيارىستان – دارىندى گيتاريست, ايگىلى مۋزارت توبىندا جۇمىس ىستەگەن كاسىبي مامان. اسان ناربوتا مەن زاۋرە ناربوتا تەمىربەك جۇرگەنوۆ اتىنداعى ونەر اكادەمياسىن بىتىرگەن. ءبىر قىزىعى, كۆينتەتتىڭ ءار مۇشەسى ءبىر-بىرىمەن بۇرىننان رۋحاني, شىعارماشىلىق بايلانىستا. مىسالى, باۋىرجان جىلقىباەۆ پەن بەلگىلى ۇستاز گەننادي كيم اكادەميادا اسان مەن زاۋرەگە ۇستازدىق ەتكەن. توپتىڭ تاعى ءبىر تاماشا مۋزىكانتى – گنەسيندەر اتىنداعى رەسەي مۋزىكا اكادەمياسىنىڭ تۇلەگى, تانىمال رەسەيلىك ءانشى اندرەي گۋبينمەن 10 جىل بىرگە جۇمىس ىستەگەن گيتاريست ۇلانبەك احمەتوۆ.
توپتىڭ نەگىزگى رەپەرتۋارى – فلامەنكو رۋمبا ستيلىندە. كۆينتەت قورجىنىندا وتاندىق كومپوزيتورلاردىڭ شىعارماسىمەن قاتار, الەمدىك گيتاريستەر – «رومانتيكالىق يسپان گيتاراسىنىڭ پاتشاسى» اتانعان دجەسسي كۋك پەن ء«جۇز ۇلى گيتاريستىڭ» ءبىرى سانالاتىن دجەكي كينگتىڭ تۋىندىلارى بار.
بۇعان قوسا كۆينتەت قازاق كۇيلەرىن دە گيتاراعا لايىقتاپ, جاڭا تىنىس بەرىپ, تىڭدارمان قاۋىمعا ۇسىنىپ وتىر. قازىردىڭ وزىندە توپ جەتەكشىسى باۋىرجان جىلقىباەۆ – گيتاراعا ارنالعان التى كۇيدىڭ اۆتورى.
كۆينتەتتىڭ تۇساۋكەسەر كونتسەرتى 20 ناۋرىز كۇنى جامبىل اتىنداعى قازاق مەملەكەتتىك اكادەميالىق فيلارمونياسىنىڭ ۇلكەن زالىندا وتەدى.
ايسۇلۋ سەزحان,
اباي اتىنداعى قازۇپۋ ستۋدەنتى
الماتى