4 ناۋرىز كۇنى تاڭەرتەڭ بولعان جەر سىلكىنىسى كەزىندە الماتىنىڭ كوپسالالى كلينيكالىق اۋرۋحاناسىنىڭ دارىگەرلەرى وتالاردى توقتاتقان جوق, سەبەبى, ولار ءۇشىن قانداي جاعداي بولسا دا, ادامداردىڭ جانىن ساقتاپ قالۋ ماڭىزدا بولدى, دەپ جازادى Egemen.kz.
الماتى كوپسالالى كلينيكالىق اۋرۋحاناسىنىڭ ءباسپاسوز قىزمەتى 4 ناۋرىزدا بەس بالدىق جەر سىلكىنىسى كەزىندە دارىگەرلەر ناۋقاستاردى قاۋىپسىز جەرگە الىپ شىققانىن حابارلادى. الايدا حيرۋرگتار ءوز ورىندارىندا قالىپ, حيرۋرگيالىق وتالاردى جالعاستىردى.
«ارينە, جەر سىلكىنىسىن بارلىعى سەزدى. بىراق وپەراتسيا ۇستەلىندە ءۇش تىرتىعى بار ناۋقاس جاتتى, ءبىز جوسپارلى كەسار تىلىگىن جاسادىق. مەدبيكەلەر ۇستەلدى, انەستەزيولوگ ناۋقاستى, مەن جاڭا تۋعان نارەستەنى ۇستاپ تۇردىم. باقىتىمىزعا وراي, ءبارى ويداعىداي بولدى, وپەراتسيانى ءساتتى اياقتاپ, شۇعىل ەۆاكۋاتسيالاندىق», دەيدى اكۋشەر-گينەكولوگ گۇلجاحان جۇمادۋلاەۆا.
كارديوحيرۋرگ تيمۋر يبراگيموۆ 68 جاستاعى ناۋقاسقا كورونارلىق شۋنتتاۋ وپەراتسياسىن جاساعانىن ايتتى.
«ەگەر ءبىز, كارديوحيرۋرگتار, وپەراتسيانى توقتاتقاندا, ونىڭ سالدارى ايقىن بولار ەدى. ارينە, قورقىنىشتى بولدى. ءبىز وپەراتسيا بولمەسىندە جاتقانداردىڭ بارلىعىنا الاڭدادىق, بىراق ءبىزدىڭ باستى مىندەتىمىز - كەز كەلگەن توتەنشە جاعدايدا ناۋقاستىڭ ءومىرىن ساقتاپ قالۋ ەدى», دەدى كارديوحيرۋرگ تيمۋر يبراگيموۆ.
تراۆماتولوگ بەكزات بەيسەنوۆ جامباس سۇيەگىنە وستەوسينتەز وپەراتسياسىن جۇرگىزىپ جاتقان ەدى. ول جامباس سۇيەگى سىنعان ايەلگە وتا جاسادى.
ەستەرىڭىزگە سالا كەتەيىك, الماتىدا 4 ناۋرىز كۇنى تاڭەرتەڭ قۋاتى 5 بالل بولاتىن كۇشتى جەر سىلكىنىسى بولدى. مەكتەپتەردەگى, كوللەدجدەردەگى جانە ۋنيۆەرسيتەتتەردەگى ساباقتار توقتاتىلدى. نەگىزگى دۇمپۋلەردەن كەيىن قالا تۇرعىندارى تاعى بىرنەشە رەت دۇمپۋلەردى سەزىندى. تۇستەن كەيىن عانا توتەنشە جاعدايلار دەپارتامەنتى الماتىلىقتاردىڭ ۇيلەرىنە ورالۋى مۇمكىن ەكەنىن حابارلادى.