قاراعاندىنىڭ ىرگەسىندەگى قۇرما قۇس فابريكاسىنىڭ ءوندىرىسى سوڭعى ۋاقىتتا ءبىرشاما وڭالىپ كەلە جاتقان ەدى. وكىنىشكە قاراي, كەشەگى توسىن وقيعا وعان زور زالال كەلتىردى. ەلەكتر قۋاتىنىڭ الدىن-الا ەسكەرتۋسىز كەنەتتەن ءسوندىرىلۋى سالدارىنان جەلدەتكىشتەردىڭ جۇمىس ىستەۋى توقتاپ, اۋا قاپىرىقتانىپ 300 مىڭ تاۋىق تۇنشىعۋدان قىرىلىپ قالدى. بەس ساعات بويى ونىڭ نەگە ءۇزىلىپ تاستالعانى بەلگىسىز. قازىر ەكىجاقتى كىنالاسۋعا قاراعاندا “قاراعاندى جارىق” جشس فابريكانىڭ ەلەكتر قۋاتى ءۇشىن جىل باسىنان بەرى قارىزدار ەكەنىن العا تارتسا, “اگروفيرماقۇرما” جشس ءوز تاراپىنان بورىشكەر ەمەستىگىن ايتادى.
نەگىزىنەن جۇمىرتقا ءوندىرۋمەن اينالىساتىن كاسىپورىننىڭ كەلەشەگى ەندى بۇلدىر كۇيگە ۇشىراعان سياقتى. قۇس سانىنىڭ تەڭ جارتىسىنان ايىرىلۋ ورنى تولماس شىعىنعا باتىردى دەلىنۋدە. ەرەگىستەر, كەلىسپەۋشىلىكتەر زامانى وتكەن ۋاقىتتا مۇنداي جاعدايدىڭ قايتادان الدان شىعۋى قالاي بولعاندا دا تۇسىنىكسىز.
ايقىن نەسىپباي. قاراعاندى.