ەلىمىزگە شەتەلدەن اكەلىنەتىن اۆتوكولىكتەردى العاشقى ەسەپكە قويۋ مەن ۋتيليزاتسيالىق تولەمنىڭ شەكتەن تىس جوعارى بولۋى ەل تۇرعىندارىن زاڭدى اينالىپ وتەتىن ءتۇرلى امالدارعا بارۋعا يتەرمەلەپ جاتىر. وسى جولدا كەيبىرى ارزان اقشاعا جاساپ بەرەمىن دەگەن الاياقتاردىڭ قۇرىعىنا تۇسەدى. اقتوبەدە بولعان وقيعا – سونىڭ ءبىر دالەلى.
پوليتسيا بولىمىنە جەرگىلىكتى تۇرعىن بەلگىسىز ەر ادام الاياقتىق جولمەن ودان 300 مىڭ تەڭگە الىپ, جاقىن شەتەلدەن اكەلىنگەن اۆتوكولىكتى ەسەپكە قويۋعا كومەكتەسۋگە ۋادە بەرگەنىن, الايدا ۋادەسىن ورىنداماعانىن ايتىپ ارىزدانعان. جەدەل-ىزدەستىرۋ ءىس-شارالارىنىڭ ناتيجەسىندە ءتارتىپ ساقشىلارى كۇدىكتىنى انىقتاپ ۇستادى. ول ماڭعىستاۋ وبلىسىنىڭ 18 جاستاعى تۇرعىنى بولىپ شىقتى. كۇدىكتى ءوز كىناسىن مويىندادى.
قازىرگى ۋاقىتتا ۇستالعان ادامنىڭ تاعى ەكى ەپيزودقا قاتىسى بارى انىقتالىپ وتىر. الاياقتىق فاكت بويىنشا سوتقا دەيىنگى تەرگەۋ باستالدى. كۇدىكتى ۋاقىتشا ۇستاۋ يزولياتورىندا وتىر.
اقتوبە وبلىسىنىڭ پوليتسيا دەپارتامەنتى حالىقتى شەتەلدەن اكەلىنگەن اۆتوكولىكتى از اقشاعا ەسەپكە قويىپ بەرەمىن دەگەن قىزمەت تۇرلەرىنەن باس تارتۋعا شاقىرادى. دەگەنمەن العاشقى ەسەپكە قويۋ مەن ۋتيليزاتسيالىق تولەم شەكتەن تىس كوپ بولىپ تۇرعاندا مۇنداي قىلمىستاردىڭ تىيىلۋى ەكىتالاي ەكەنى راس. ويتكەنى الەمنىڭ باسقا ەشبىر ەلىندە كەزدەسپەيتىن وسىنداي «تولەمدەر» سالدارىنان شەتەلدەن ساتىپ الىنعان كولىكتىڭ باعاسى ەكى ەسەلەنىپ كەتەدى. ال مۇنى حالىقتىڭ كوپ بولىگىنىڭ قالتاسى كوتەرە بەرمەيدى. سوندىقتان ولار زاڭدى بەلشەسىنەن باساتىن الگىندەي قيتۇرقى جولدارعا باراتىنى بەلگىلى.