كەيىنگى ۋاقىتتا جەتىسۋدا 40 جوبا ىسكە اسىرىلعان. ولاردىڭ قاتارىندا توقىما, كۇن پانەلدەرى, قۇرىلىس بۇيىمدارىنىڭ ءوندىرىسى بار. ودان بولەك قازىر وڭىردە ەنەرگيا تاپشىلىعىن جويۋ ماسەلىسى وزەكتى بولىپ وتىر.
«جاسىل» ەنەرگيا باسىمدىق بەرۋ جەتىسۋ وڭىرىندە جۇيەلى جۇزەگە اسىپ جاتىر. وعان وبلىس اكىمى بەيبىت يساباەۆتىڭ «جاسىل» ەنەرگيا سالاسىنداعى ءىرى جوبانى ىسكە اسىرۋعا نيەتتى ينۆەستور كومپانيالاردىڭ وكىلدەرىمەن كەزدەسۋى دالەل. قازاقستان رەسپۋبليكاسى مەن بىرىككەن اراب امىرلىكتەرى بىرىككەن ۇلتتار ۇيىمىنىڭ كليماتتىڭ وزگەرۋى جونىندەگى نەگىزدەمەلىك كونۆەنتسياسى تاراپتارىنىڭ 28-كونفەرەنتسياسى اياسىندا جەتىسۋ وبلىسىندا جەل ەلەكتر ستانساسىنىڭ جوباسىن ىسكە اسىرۋ تۋرالى ۇكىمەتارالىق كەلىسىم جاساعان. قۋاتى 1 گۆت جەل ەلەكتر ستانساسى جوڭعار قاقپاسىندا سالىنادى دەپ جوسپارلانعان. بۇل اتالعان سالاداعى جاڭا مۇمكىندىكتەردى ارتتىرارى ءسوزسىز.
بىلتىر وڭىردە ەلەكتر ەنەرگياسىن تۇتىنۋ 218 مۆت بولدى. ونىڭ ىشىندە جەك ۇلەسى – 93,5 مۆت نەمەسە قولدا بار قۋاتتىڭ شامامەن 43 پايىزى. كەزدەسۋدە وبلىس باسشىسى ءوڭىردىڭ ينۆەستيتسيالىق مۇمكىندىكتەرىمەن قوسا سۋ, جەل جانە كۇن ەنەرگياسى جاعىنان الەۋەتى زور ەكەنىن ايتتى. سونىمەن قاتار ينۆەستورلار ءۇشىن بارلىق جاعداي قاراستىرىلعانىن جەتكىزدى.
«بىلتىر مەملەكەت باسشىسى قاسىم-جومارت توقاەۆ «ACWA POWER» كومپانياسى ديرەكتورلار كەڭەسىنىڭ توراعاسىمەن كەزدەسىپ, كەلىسىمگە, جول كارتاسىنا قول قويدى. ءبىز ءوز تاراپىمىزدان الاكول اۋدانى اكىمدىگىنىڭ قاۋلىسىمەن جەر ۋچاسكەسىن بەلگىلەپ, ءتيىستى جۇمىستى اتقاردىق. بۇل وتە اۋقىمدى ءارى جاۋاپتى جوبا بولعاندىقتان, ءسىزدىڭ كومپانيا ماماندارى سول ايماققا بارىپ, بەلگىلەنگەن جەر ۋچاسكەلەرىن زەرتتەپ, زەردەلەگەنى ءجون بولادى. جەل تۋربينالارى مەن قاجەتتى جابدىقتاردىڭ قالاي, قايدا ورناتىلاتىنىن ناقتى انىقتاپ, جەمىستى جۇمىس جۇرگىزۋگە جاۋاپكەرشىلىكپەن قاراۋى كەرەك. بۇل جوباعا اسا مۇقيات كوڭىل بولگەن دۇرىس», دەدى وبلىس اكىمى ب.يساباەۆ.
«ACWA POWER» كومپانياسىنىڭ تمد-داعى بيزنەستى دامىتۋ جونىندەگى ۆيتسە-پرەزيدەنتى دجاي پراكاش ۇسىنىستى قۋانا قابىل الىپ, الداعى جۇمىس جوسپارىن جەر تاڭداۋ ماسەلەسىنەن باستايتىنىن ايتتى. بۇل جۇمىستار اۋا رايىنا بايلانىستى كوكتەم مەزگىلىنە جوسپارلاندى.
كەزدەسۋگە قاتىسۋشىلار ءوڭىردىڭ ەكونوميكاسىنا 883 ملرد تەڭگەدەن استام ينۆەستيتسيا سالىناتىن وسى ىرگەلى جوبانى ىسكە اسىرۋ جۇمىستارىن تالقىلادى. وبلىس اكىمدىگى تاراپىنان زاڭدى تۇردە قاجەتتى قولداۋ كورسەتىلەتىنىن ايتقان ايماق باسشىسى ۇكىمەتتىك دەڭگەيدەگى جوبانى ىسكە اسىرۋ ۇدەرىسىن جەدەلدەتۋ قاجەتتىگىن ايتىپ, جيىندى قورىتىندىلادى.
جەتىسۋ وبلىسى