ۇستەل تەننيسىنەن وڭتۇستىك كورەيانىڭ پۋسان قالاسىندا وتكەن كوماندالىق الەم چەمپيوناتى اياقتالدى. كىل مىقتىلار جينالعان جارىستا قازاقستاننىڭ ەرلەر قۇراماسى ءوز تاريحىنداعى ەڭ ايتۋلى كورسەتكىشكە قول جەتكىزدى.
جەلەستەرىمىز توپتىق تۋرنيردە ساۋد ارابياسى (3:0) مەن اقش-تى (3:1) ۇتىپ, ازۋلى انگليا (2:3) مەن گەرمانياعا (2:3) ءبىر ۇپاي ايىرماشىلىعىمەن عانا ەسە جىبەردى. وسى ورايدا قارسىلاستار كومانداسىنىڭ نامىسىن بىرنەشە دۇركىن وليمپيا ويىندارى, الەم جانە قۇرلىق چەمپيوناتتارىنىڭ جەڭىمپازدارى مەن جۇلدەگەرلەرى قورعاعانىن ايتا كەتۋ كەرەك. ساقا سپورتشىلارعا ءبىزدىڭ جىگىتتەر لايىقتى قارسىلىق كورسەتە الدى. سول ناتيجە ارقىلى قازاقستان ءوز توبىندا ەكىنشى ورىن يەلەنىپ, توپ-24 كوماندانىڭ قاتارىنا قوسىلدى.
كەلەسى كەزەڭدە 1/8 فينالدىق باسەكەنىڭ جولدامالارى ساراپقا سالىندى. بۇل مەجەدە وتانداستارىمىز ءۇندىستاننىڭ ۇستەل تەننيسشىلەرىمەن كۇش سىناستى. ولار – ازيا بىرىنشىلىكتەرىندە ءتورت رەت جۇلدە الىپ, الەمدىك دودالاردا ءتاۋىر ويناپ جۇرگەن مىقتى ۇجىم. ءۇندى ەلىنىڭ وكىلدەرى بىلتىرعى قۇرلىق چەمپيوناتىن ءۇشىنشى ورىنمەن قورىتىندىلادى. اسا شيەلەنىستى وتكەن سايىستا قازاقستان قۇراماسى ءوز قارسىلاستارىنا 2:3 ەسەبىمەن ەسە جىبەردى.
پۋسانداعى جارىستا ءبىز كيريلل گەراسيمەنكونىڭ اسقان شەبەرلىگىنە ءتانتى بولدىق. الەمدىك رەيتينگتە 40-ورىندا تۇرعان 27 جاستاعى استانانىڭ تۋماسى توعىز كەزدەسۋدىڭ بارلىعىندا جەڭىسكە جەتىپ, 100 پايىزدىق كورسەتكىشكە قول جەتكىزدى. وتانداسىمىز گەرمانيانىڭ قوس ساڭلاعى – وليمپيادادا التى (2 كۇمىس, 4 قولا), الەم چەمپيوناتىندا بەس (4 كۇمىس, 1 قولا), ەۋروپا ويىندارى (3 التىن), قۇرلىق چەمپيوناتى (10 التىن, 3 كۇمىس, 2 قولا) جانە الەم كۋبوگىندە (1 التىن, 4 قولا) سان مارتە اتوي سالعان دميتري وۆچاروۆ (گەرمانيا) پەن كوماندالىق سايىستا الەم چەمپيوناتىنىڭ كۇمىس جۇلدەگەرى, جەكەلەگەن باسەكەدە ەۋروپانىڭ ءۇش دۇركىن چەمپيونى, ەۋروپا ويىندارىنىڭ ەكى مارتە جەڭىمپازى تسيۋ داننان باسىم ءتۇستى. سول سەكىلدى ۇلىبريتانيانىڭ وعلاندارى, كوماندالىق الەم چەمپيوناتىنىڭ قولا جۇلدەگەرلەرى پول درينحولل مەن ليام پيتچفورد جانە اقش قۇراماسى ساپىنداعى ۇندىستاندىق لەگيونەرلەر سيد نارەش پەن نيكحيل كۋماردى قاپى قالدىردى. راسىندا, كيريللدىڭ پۋسانداعى تابىسى تالايلاردى تامساندىردى.
ەلىمىزدىڭ ايەلدەر قۇراماسى اۋستراليادان (3:2) باسىم تۇسكەنىمەن, كەلەسى كەزەڭدەردە اۋستريا, گونكونگ جانە پورتۋگاليادان جەڭىلىپ, جارىستى ودان ءارى جالعاستىرا المادى.
باق وكىلدەرىنە سۇحبات بەرگەن قازاقستان ۇلتتىق قۇراماسىنىڭ باس باپكەرى ەلميرا اليەۆا: «ەرلەر قۇراماسىنىڭ باستى ماقساتى توپتىق تۋرنيردەن شىعىپ, كەلەسى كەزەڭگە ءوتۋ ەدى. ول جوسپاردى ويداعىداي جۇزەگە اسىردىق. ناتيجەسىندە, ءبىزدىڭ جىگىتتەر جالپى ەسەپتە 40 مەملەكەتتىڭ اراسىندا 17-ورىندى يەلەندى. ۇستەل تەننيسشىلەرىمىز بۇل مەجەگە العاش رەت جەتىپ وتىر. ەلىمىزدىڭ ايەلدەر قۇراماسى وڭتۇستىك كورەياعا انىق اۋتسايدەر رەتىندە اتتانعانىمەن, اۋستراليادان ايلاسىن اسىردى. ال وزگە قارسىلاستارىمىز, شىنى كەرەك, وتە مىقتى بولدى. قورىتىندى ەسەپتە قىزدار 25-ساتىعا تۇراقتادى. بۇل دا – ايەلدەر قۇراماسىنىڭ الەمدىك دوداداعى ەڭ جاقسى كورسەتكىشى», دەدى.
الەم چەمپيوناتىنىڭ العاشقى ەكى كەزەڭىنەن سۇرىنبەي وتكەن كوماندالار شيرەك فينالدا جولىقتى. بۇل مەجەدە قىتايدىڭ ەرلەر قۇراماسى جاپونيانى (3:0), وڭتۇستىك كورەيا دانيانى (3:1), فرانتسيا پورتۋگاليانى (3:1) جانە تايپەي گەرمانيانى (3:0) جولدان ىعىستىردى. جارتىلاي فينالدا الەمدىك رەيتينگتىڭ كوشباسشىلارى وڭتۇستىك كورەيانى (3:2) ازەر ۇتسا, فرانتسۋزدار تايپەيلىكتەردى (3:1) تىزە بۇكتىردى. فينالدىق سايىستا قىتاي ەلىنەن كەلگەن ساڭلاقتاردىڭ مەرەيى ۇستەم بولدى. ولار فرانتسيانى 3:0 ەسەبىمەن جەڭدى. وسىلايشا, قىتايدىڭ ۇستەل تەننيسشىلەرى كوماندالىق الەم چەمپيوناتىندا قاتارىنان 10 رەت, بارلىعى 22 مارتە توپ جاردى.
ال ايەلدەر اراسىنداعى جارىستىڭ جارتىلاي فينالىندا قىتاي فرانتسيانى (3:0), ال جاپونيا گونكونگتى (3:0) جەڭدى. ءسويتىپ, سارى قۇرلىقتىڭ قوس كومانداسى باس جۇلدەنى ءوزارا سايىستا ساراپقا سالدى. بۇل باسەكە ءبىر عانا ۇپاي ايىرماشىلىعىمەن قىتاي سپورتشىلارىنىڭ جەڭىسىمەن اياقتالدى. ءسويتىپ, ولار دا اتالعان جارىستىڭ باس جۇلدەسىن 22 رەت يەلەندى.