مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جايىلىمداردى پايدالانۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى, دەپ حابارلايدى Egemen.kz اقورداعا سىلتەمە جاساپ.
بۇل قۇجات جايىلىمداردى باسقارۋ جانە پايدالانۋ سالاسىنداعى زاڭنامانى جەتىلدىرۋگە باعىتتالعان. تۇزەتۋلەر 5 زاڭنامالىق اكتىگە, ونىڭ ىشىندە جەر, ورمان كودەكستەرىنە ەنگىزىلدى.
تۇزەتۋلەردىڭ ءبىرىنشى بلوگى جەكەلەگەن ادامداردىڭ مالىن جايۋعا ارنالعان جايىلىمدىق القاپتاردىڭ تاپشىلىعىن جويۋعا باعىتتالعان.
وسى ماقساتتا جەر كودەكسىنە جانە «جايىلىمدار تۋرالى» زاڭعا جايىلىمداردىڭ جاڭا ءتۇرى, ياعني «قوعامدىق جايىلىمدار» ۇعىمى ەنگىزىلدى. قوعامدىق جايىلىمدار تەك جەرگىلىكتى تۇرعىنداردىڭ مالىن جايۋعا پايدالانىلادى. ولار جالعا بەرىلمەيدى.
قوعامدىق جايىلىمعا جاتپايتىن جايىلىمداردىڭ جالعا بەرىلۋى جانە شابىندىق ءۇشىن پايدالانىلۋى مۇمكىن.
قوعامدىق جايىلىمداردى, سونداي-اق جايىلىمداردى اۋىل شارۋاشىلىعى القاپتارىنىڭ باسقا تۇرلەرىنە اۋىستىرۋعا تىيىم سالىندى. مال شارۋاشىلىعى جانە مال جايۋ ءۇشىن ۋاقىتشا وتەۋسىز جەر پايدالانۋ نورماسىنان (5 جىلعا) كونكۋرسسىز جەر الۋ مۇمكىندىگى الىنىپ تاستالدى. بۇل ماقساتتار ءۇشىن جەر كونكۋرستىق تارتىپپەن عانا بەرىلەدى.
ورمانداردىڭ رەسۋرستىق الەۋەتىن ءتيىمدى پايدالانۋ ءۇشىن ورمان/تابيعاتتى قورعاۋ مەكەمەلەرى جىل سايىن اكىمدىكتەردى بوس ەمەس جانە بوس الاڭداردىڭ ناقتى ورىندارىن كورسەتە وتىرىپ, ءشوپ شابۋعا جانە مال جايۋعا بولاتىن ورمان قورىنىڭ ۋچاسكەلەرى تۋرالى حاباردار ەتەدى.
تۇزەتۋلەردىڭ ەكىنشى بلوگى جايىلىمداردى باسقارۋ جانە ولاردى پايدالانۋ جونىندەگى جوسپارلاردى ازىرلەۋ جانە بەكىتۋ جونىندەگى تالاپتاردى جاڭارتتى.
تۇزەتۋلەردىڭ ءۇشىنشى بلوگى جايىلىمداردىڭ دەگراداتسياسى مەن شولەيتتەنۋىنە, سونداي-اق ولاردى سۋلاندىرۋعا قارسى كۇرەس تەتىكتەرىن كۇشەيتتى.
اتاپ ايتقاندا, جايىلىمداردىڭ جاي-كۇيىن قالپىنا كەلتىرۋ جانە جاقسارتۋ ءۇشىن جايىلىمداردى گەوبوتانيكالىق زەرتتەۋ, مونيتورينگتەۋ, تۇگەندەۋ جانە وزگە دە شارالار كوزدەلگەن.
جەر پايدالانۋشىلار مەن مەنشىك يەلەرىنە توپىراق قۇنارىنىڭ جويىلۋىنا جول بەرمەۋ, جەر تۇرىنە سايكەس اۋىل شارۋاشىلىعى جەرلەرىن ماقساتتى پايدالانۋ مىندەتى ەنگىزىلدى.