پرەزيدەنت وتكەن جىلعى «ادىلەتتى قازاقستاننىڭ ەكونوميكالىق باعدارى» اتتى حالىققا جولداۋىندا ايماقتارعا قاتىستى ساياساتتا ماڭىزدى رەفورمالار جۇرگىزىلەتىنىن ايتقان بولاتىن. بۇل ءىس وڭىرلەردە بىرتىندەپ جۇزەگە اسىرىلىپ كەلەدى. سونىڭ ءبىرى – اكىم سايلاۋى.
وسى رەفورمانىڭ ارقاسىندا اكىمدەردى تىكەلەي سايلاۋ ءتاسىلى ەنگىزىلىپ, اكىمشىلىك رەفورما قولعا الىندى. «بۇل رەتتە بيۋدجەتارالىق قاتىناستاردى تۇبەگەيلى وزگەرتۋ دە وتە وزەكتى ماسەلە. جاڭا ەكونوميكالىق ۇلگىگە كوشكەندە ايماقتاردىڭ بيۋدجەت ماسەلەسىندەگى دەربەستىگىن ارتتىرۋ كەرەك» دەگەن بولاتىن ماڭىزدى قۇجاتتا مەملەكەت باسشىسى. ال جاقىندا قارقارالى اۋدانىنداعى قارقارالى قالاسى, ەگىندىبۇلاق, ق.امانجولوۆ, بالقانتاۋ, تومار جانە ۋگار اۋىلدىق وكرۋگتەرىندە جاڭا اكىمدەر سايلاندى.
قارقارالى اۋداندىق سايلاۋ كوميسسياسى سايلاۋ قورىتىندىسىن «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭعا سايكەس, ۋچاسكەلىك سايلاۋ كوميسسيالارىنىڭ حاتتامالارى نەگىزىندە جاريا ەتتى.
ق.امانجولوۆ اۋىلىنىڭ اكىمى قىزمەتىنە ەربول جولامان سايلاندى. ول 1982 جىلى تۋعان. بۇعان دەيىن اۋداننىڭ جەر قاتىناستارى ءبولىمىنىڭ مامانى بولىپ قىزمەت اتقارعان. قارقارالى قالاسىنىڭ تۇرعىنى. كانديداتتى «Amanat» پارتياسى ۇسىنعان.
ەگىندىبۇلاق اۋىلدىق وكرۋگى اكىمى قىزمەتىنە بەيبىت ايتماعانبەت ۇلى سايلاندى. 1969 جىلى تۋعان. ءوزى وسى اۋىلدىڭ اكىمشىلىك اپپاراتىندا ءبولىم باسقارعان. ءوزىن-ءوزى ۇسىنعان.
تومار اۋىلدىق وكرۋگىنىڭ اكىمى قىزمەتىنە نۇرسىلان جاعىپاروۆ قايتا سايلاندى. 1990 جىلى تۋعان, بۇعان دەيىن دە تومار اۋىلدىق وكرۋگىنىڭ اكىمى بولعان. تومار اۋىلىنىڭ تۇرعىنى. قايتا سايلانعان اكىمدى كانديدات رەتىندە «Amanat» پارتياسى ۇسىنعان.
بالقانتاۋ اۋىلدىق وكرۋگىنىڭ سايلانعان اكىمى – ەرسايىن قوبىلاندى. 1994 جىلى تۋعان, «قارقارالى اۋدانىنىڭ جاستار رەسۋرستىق ورتالىعى» مم-ءنىڭ ديرەكتورى. قارقارالى قالاسىنىڭ تۇرعىنى. بۇل كانديداتتى دا «Amanat» پارتياسى ۇسىنعان.
ۋگار اۋىلىنا جانات اكىموۆ جاڭادان سايلاندى. 1967 جىلى تۋعان, «رىمحان» شارۋا قوجالىعىنىڭ جەتەكشىسى. قارقارالى اۋدانى ماتاق اۋىلىنىڭ تۇرعىنى. ءوزىن-ءوزى ۇسىنعان.
قارقارالى قالاسىنىڭ اكىمى بولىپ سايلاۋشىلاردىڭ باسىم كوپشىلىگىنەن داۋىس العان اسلان راحيمبەرگەنوۆ سايلاندى. 1985 جىلعى. ۋاقىتشا جۇمىسسىز بولىپ تىركەۋلى. قارقارالى اۋدانى, بالقانتاۋ اۋىلىنىڭ تۇرعىنى. «Amanat» پارتياسى ۇسىنعان.
ەلدىڭ سەنىمىن ەنشىلەگەن جاڭا اكىمدەر وتكەن اپتادان باستاپ قىزمەتتەرىنە كىرىستى. جولداۋدا جۇكتەلگەن مىندەتتىڭ قانشالىقتى جۇزەگە اسىرىلىپ جاتقانىن حالىق ءۇمىت ارتقان وسى اكىمدەردىڭ الدا اتقارار ناقتى ىسىنەن كورۋگە بولادى.
قاراعاندى وبلىسى,
قارقارالى اۋدانى