ءتورت جىلدان بەرى قوستاناي وبلىستىق بالالار اۋرۋحاناسىنداعى كۇردەلى جوندەۋ جۇمىستارى اياقتالماي تۇر. ءاۋ باستا مەردىگەر كومپانيا وزىنە مىندەتتەلگەن جۇمىستى جارتى جىلدىڭ ىشىندە اياقتاپ, جاڭارعان عيماراتتى قايتا تاپسىرىپ بەرۋگە ءتيىس ەدى. وكىنىشكە قاراي, اۋرۋحانا عيماراتى ءالى بوس تۇر, توقىراپ قالعان جوندەۋ جۇمىستارى جاندانار ەمەس.
التى قابات اۋرۋحانا عيماراتىن جوندەۋدەن وتكىزۋگە 2020 جىلى «جۇمىسپەن قامتۋدىڭ جول كارتاسى» باعدارلاماسى اياسىندا رەسپۋبليكا بيۋدجەتىنەن 1 ملرد 204 ملن تەڭگە بولىنگەن. قوماقتى قارجىنىڭ 920 ملن تەڭگەسى يگەرىلگەنىمەن, قالعان قارجى جۇمىستى اياقتاۋعا جەتپەي قالعان. مۇنىڭ سوڭى داۋ-دامايعا ۇلاسىپ, اقىرى مەردىگەر شەتتەتىلىپ, ەمدەۋ مەكەمەسىنىڭ باسشىسى جۇمىستان كەتىپ تىنعان.
تاياۋدا وبلىستىق ءماسليحات دەپۋتاتتارى ەمدەۋ مەكەمەسىن جوندەۋگە بيۋدجەتتەن قوسىمشا 1,5 ملرد تەڭگە ءبولۋ تۋرالى ۇسىنىستى ماقۇلدادى. سول-اق ەكەن, بالالار اۋرۋحاناسى توڭىرەگىندەگى داۋ تاعى ۋشىقتى. سەبەبى وتكەن تامىز ايىندا وبلىستىق بالالار اۋرۋحاناسىنىڭ باسشىسى كۇردەلى جوندەۋ جۇمىستارىنىڭ 20 پايىزى بىتپەي تۇر دەپ مالىمدەگەن. ال وبلىستىق دەنساۋلىق ساقتاۋ باسقارماسىنىڭ باسشىسى دانيار جانداەۆ تاياۋدا عانا باق وكىلدەرىمەن كەزدەسىپ, بۇرىنعى مەردىگەردىڭ جۇمىستىڭ ورىندالۋى تۋرالى قۇجاتتى وتكىزبەگەنىن, سوندىقتان عيماراتقا جۇرگىزىلگەن جوندەۋ جۇمىستارىنىڭ ساپاسى مەن دەڭگەيىن انىقتاۋعا ءبىراز ۋاقىت كەتكەنىن ايتتى. باسقارما باسشىسىنىڭ ايتۋىنشا, بۇرىنعى تاپسىرىس بەرۋشى مەن مەردىگەردىڭ تەحنيكالىق قۇجاتتاماسى بولماعان. سونىڭ سالدارىنان ساراپتاما جۇمىسى دا جىلدان اسا ۋاقىتقا سوزىلىپ كەتكەن.
باسقارما باسشىسى: «بۇرىنعى مەردىگەر جوندەۋ جۇمىستارىن وسىدان ءۇش جىل بۇرىن جۇرگىزدى. سوندىقتان عيماراتتىڭ جوندەۋدەن وتكەن كەيبىر جەرلەرىن قايتادان جوندەۋدەن وتكىزۋىمىز مۇمكىن. قازىر اۋرۋحاناعا جۇرگىزىلۋگە ءتيىس جوندەۋ جۇمىستارىنىڭ 50 پايىزى بىتپەي تۇر. مۇنى اياقتاۋ ءۇشىن 1,5 ملرد تەڭگە قارجى كەرەك. مۇنىڭ سىرتىندا 2020 جىلدىڭ ەسەبىمەن الاتىن بولساق, 1 ملرد 200 ملن تەڭگەگە باعالانعان كۇردەلى جوندەۋدىڭ 50 پايىزى شامامەن 500 ملن تەڭگە بولادى. ءۇش جىلدىڭ ىشىندە قۇرىلىس ماتەريالدارىنىڭ باعاسى 2,5-3 ەسە ءوسىپ كەتتى. وسىنى ەسكەرسەك, قازىر 500 ملن 1,5 ملرد تەڭگەگە بارىپ قالادى», دەگەن.
الايدا بۇرىنعى مەردىگەر «ۆەرشينا» سەرىكتەستىگىنىڭ زاڭگەرى تالعات حاميتوۆ وبلىستىق دەنساۋلىق ساقتاۋ باسقارماسىنىڭ باسشىسىنىڭ جالعان مالىمەت بەرىپ وتىرعانىن, وسى ارقىلى جۋرناليستەر مەن ءوڭىر باسشىلىعىن اداستىرىپ وتىرعانىن ايتادى. زاڭگەردىڭ ايتۋىنشا, عيماراتتاعى جوندەۋ جۇمىستارىنىڭ 95 پايىزى ءبىتىپ تۇر. ال اتقارىلعان جۇمىستاردىڭ سوماسى 1,8 ملرد تەڭگە بولادى.
«جوعارعى سوتتىڭ قاۋلىسىندا «ۆەرشينا» سەرىكتەستىگى جۇمىس اۋقىمىنىڭ 95 پايىزدان استامىن ورىندادى», دەپ انىق جازىلعان. ورىندالماعانى – 5-اق پايىز. وعان ءارى كەتكەندە 60 ملن تەڭگە قاجەت. باسقارما باسشىسى 1,5 ملرد دەگەندى قايدان الىپ وتىرعانىن تۇسىنبەيمىن. ءبىزدىڭ سەرىكتەستىك ەرتەڭ-اق جۇمىسقا كىرىسۋگە دايىن. رۇقسات بەرسە, 300 ملن تەڭگەدەن اسىرماي كۇردەلى جوندەۋدى اياقتاپ شىعا الاتىنىمىزدى رەسمي تۇردە مالىمدەيمىن», دەيدى ت.حاميتوۆ.
وسىدان كەيىن ايماق باسشىسى قۇمار اقساقالوۆ ءماسليحات شەشىمىن ۋاقىتشا توقتاتىپ, ماسەلەنىڭ ءمان-جايىن انىقتاۋ ءۇشىن ارنايى كوميسسيا قۇرىلاتىنىن مالىمدەدى. قوس تاراپتىڭ تالاپ-تىلەگىن تىڭداپ شىققان اكىم ءتيىستى ورىندارعا اۋرۋحانانى جوندەۋ جۇمىستارىن اياقتاۋعا قاجەتتى قاراجاتتى كىم, قالاي ەسەپتەگەنىن تەكسەرۋدى مىندەتتەپ, جاعدايدى جان-جاقتى زەرتتەۋ ءۇشىن ارنايى جۇمىس توبىن قۇرۋ تۋرالى وكىم شىعاردى.
وبلىس اكىمى جۇمىس توبىن تىكەلەي ءوزى باسقاردى. توپ قۇرامىنا جەرگىلىكتى اتقارۋشى بيلىك وكىلدەرىنەن تىس وبلىس پروكۋراتۋراسى, سىبايلاس جەمقورلىققا قارسى قىزمەت, ەكونوميكالىق تەرگەۋ دەپارتامەنتى, مەملەكەتتىك ىشكى اۋديت دەپارتامەنتىنىڭ وكىلدەرى جانە مەردىگەر كومپانيانىڭ باسشىسى كىرەدى. جۇمىس توبىنىڭ مۇشەلەرى ءوز قۇزىرەتى اياسىندا ماسەلەنى زەردەلەپ, ۇسىنىستار ەنگىزەدى. ماسەلەنىڭ ءتۇيىنى قاشان شەشىلەتىنىن قازىرشە ەشكىم ءدوپ باسىپ ايتا المايدى. ال ۇلكەندەر ءبىر مامىلەگە كەلگەنشە ناۋقاس بالالار بۇرىنعى ينفەكتسيالىق ورتالىقتى پانالاي تۇرادى.
قوستاناي وبلىسى