قازاقستان سۋپەركۋبوگىنىڭ يەگەرى انىقتالدى. فينالدىق سايىستا شىمكەنتتىڭ «ورداباسى» مەن قوستانايدىڭ «توبىل» كلۋبتارى كۇش سىناستى.
وڭتۇستىكتىڭ وعلاندارى بىلتىرعى ماۋسىمدا قازاقستان چەمپيونى اتانسا, قوستانايلىقتار كۋبوكتى يەلەندى. ەل فۋتبولى تاريحىندا اتالعان جارىستىڭ فينالى تۇڭعىش رەت وزىمىزدە ەمەس, وزگە مەملەكەتتە, ياعني تۇركيانىڭ انتاليا قالاسىنداعى «تيتانيك ماردان» ستاديونىندا ءوتتى. ءبىرىنشى تايمنىڭ سوڭعى سەكۋندتارىندا اسحات تاعىبەرگەننىڭ بۇرىشتامادان بەرگەن دوبىن ەۆگەني ماكارەنكو قاقپاعا ءدال ءتۇسىردى. ۇزىلىستەن كەيىن «توبىل» تارازى باسىن تەڭەستىردى. بۇل گولدى 65-مينۋتتا يۆان ميلادينوۆيچ سالدى. ەسەپ – 1:1. پەنالتي سوعۋدا «توبىلدىڭ» ويىنشىلارى دالدىك تانىتتى – 5:4. ءسويتىپ, قوستانايدىڭ كومانداسى ءوز تاريحىندا ءۇشىنشى مارتە سۋپەركۋبوكتى يەلەنىپ وتىر. ال «ورداباسى» قاتارىنان ەكىنشى رەت فينالدا جەڭىلىس تاپتى. بىلتىر ولار شەشۋشى ماتچتا «استاناعا» ەسە جىبەرگەن ەدى.
سۋپەركۋبوكتى ولجالاعان كومانداعا 60 ملن تەڭگە كولەمىندە سىياقى بەرىلەدى. شەشۋشى ماتچتا جەڭىلىس تاپقان كلۋبتىڭ ويىنشىلارى دا قۇرقول قايتپادى. ولار 40 ملن-دى ەنشىلەدى.