استانا مەملەكەتتىك قىزمەت حابى باسقارۋشى كوميتەتى توراعاسى ءاليحان بايمەنوۆ پەن قىتاي ۇلتتىق مەملەكەتتىك باسقارۋ اكادەمياسى اتقارۋشى ۆيتسە-پرەزيدەنتى سي چۋنتاو ەكىجاقتى ىنتىماقتاستىق ماسەلەلەرىن تالقىلادى, دەپ جازادى Egemen.kz.
كەزدەسۋگە قحر-نىڭ قازاقستانداعى توتەنشە جانە وكىلەتتى ەلشىسى چجان سياو, قكپ ورتالىق كوميتەتى مەن قىتاي ۇلتتىق مەملەكەتتىك باسقارۋ اكادەمياسى وكىلدەرى قاتىستى.
كەزدەسۋدە ءاليحان بايمەنوۆ: «قاي زاماندا دا سانالۋاندىق ادامزات وركەنيەتى دامۋىنىڭ شەشۋشى فاكتورى بولعان. سونىمەن قاتار ديالوگ پەن ىنتىماقتاستىق دامۋعا ءاردايىم جاڭا سەرپىن, قۋات بەرەدى», دەدى.
ونىڭ ايتۋىنشا, قىتاي حاب باستامالارىنا تەڭ قۇرىلتايشىلارىنىڭ ءبىرى رەتىندە بەلسەندى ارالاسىپ, قولداۋ كورسەتىپ كەلەدى.
سي چۋنتاو بىلتىر بەيجىڭدە وتكەن «وركەنيەت داستۇرلەرى جانە مودەرنيزاتسيا جولى» فورۋمى مەن سول فورۋم اياسىندا قۇرىلعان قىتاي-ورتالىق ازيا مەملەكەتتىك باسقارۋ اكادەميالارى جەلىسى - قىتاي جانە ورتالىق ازيا ەلدەرىنىڭ سيانداعى كوشباسشىلار سامميتىندە قابىلداعان شەشىمدەردى ىسكە اسىرۋىنىڭ العاشقى تەتىكتەرىنىڭ ءبىرى بولعانىن ايتتى.
ول قىتاي ۇلتتىق اكادەمياسى استانا مەملەكەتتىك قىزمەت حابىمەن جانە باسقا دا ينستيتۋتتارمەن ىنتىماقتاستىقتى نىعايتۋعا دايىن ەكەنىن جەتكىزدى. ىنتىماقتاستىق اياسىندا بيىل بىرقاتار ءىس-شارالار وتكىزۋ جوسپارلانىپ وتىرعانىن ەكەنىن, وسى رەتتە قىتايدا وتەتىن مەملەكەتتىك باسقارۋ فورۋمىنا شاقىردى.
ءاليحان بايمەنوۆ تە مەملەكەتتىك باسقارۋ اكادەميالارى جەلىسىنىڭ الەۋەتىن تولىققاندى ىسكە اسىرۋ ءۇشىن بىرقاتار ورتاق جوبالار ۇسىندى. سونداي-اق حابتىڭ پراكتيكتەر اليانسىن قۇرۋ سالاسىنداعى تابىستى تاجىريبەسىن ەسكەرە وتىرىپ, «تەڭ تەڭىمەن» قاعيداتى نەگىزىندە تۇراقتى تاجىريبە مەن ءبىلىم الماسۋ ءۇشىن وقۋ باعدارلامالارىن ازىرلەۋگە جاۋاپتىلار اراسىندا پراكتيكتەر اليانسىن قۇرۋ بويىنشا باستاما كوتەرىلدى.
سونىمەن قاتار بىرگە ارنايى زەرتتەۋلەر جاساپ, ونىڭ ىشىندە قىتاي تاجىريبەسى نەگىزىندە كەيس-ستادي ازىرلەۋ ءارى جەلىگە قاتىسۋشى ەلدەر عالىمدارىنىڭ ماقالالارىن حاب جۋرنالىندا ارنايى بولىمدە توپتاستىرۋ ءسوز بولدى.
قىتاي تاراپى ايماقتا جانە ودان تىس جەرلەردە مەملەكەتتىك باسقارۋ اكادەميالارىنىڭ قىتاي-ورتالىق ازيا جەلىسىنىڭ قىزمەتىن كەڭەيتۋدەگى ىنتىماقتاستىق سەرپىنى مەن حاب پلاتفورماسى الەۋەتىن جوعارى باعالادى. كەزدەسۋگە قاتىسۋشىلار بىرلەسكەن باستامالاردى ىسكە اسىرۋ جونىندە ىنتىماقتاستىقتى جالعاستىرۋعا دايىن ەكەندەرىن جەتكىزدى.
2023 جىلى مەملەكەتتىك باسقارۋ اكادەميالارىنىڭ قىتاي-ورتالىق ازيا جەلىسىن قۇرۋ تۋرالى كەلىسىمگە قول قويىلدى. ونىڭ قۇرامىنا حابتى قوسا العاندا التى ەلدىڭ (قىتاي, قازاقستان, قىرعىزستان, وزبەكستان, تاجىكستان جانە تۇرىكمەنستان) مەملەكەتتىك مەكەمەلەرى كىردى. جەلىنىڭ ماقساتى – كادرلاردى دايارلاۋ جانە قايتا دايارلاۋ ماسەلەسىمەن قاتار مەملەكەتتىك باسقارۋدى ترانسفورماتسيالاۋ سالاسىندا تاجىريبە مەن ءبىلىم الماسۋ.