تانىمال اكتريسا, پروديۋسەر بايان الاگوزوۆا “ساكۋرا. يتس ماي لايف” ءفيلمىنىڭ ءوز ومىرىمەن قانشالىقتى بايلانىسى بار ەكەن ايتتى, دەپ حابارلايدى Egemen.kz.
“زامانداس” ارناسىنا سۇحبات بەرگەن ونەر يەسى قىلمىس الەمىنىڭ سەركەسى, دوستارىنىڭ اراسىندا ۇلكەن بەدەلگە يە جىگىتكە تۇرمىسقا شىققانىن ەسىنە الدى.
- وتباسىلىق ءومىرىمىزدىڭ نەمەن اياقتالعانىن بۇكىل ەل جاقسى بىلەدى. ءتىپتى, ول وقيعا ۇمىتىلعان جوق. فيلمگە كەيبىر باسىمنان وتكەن وقيعالاردى قوسقانىم راس. بىراق ول مەنىڭ تۇتاس اۆتوبيوگرافيالىق ومىرىمنەن الىندى دەگەن ءسوز ەمەس. فيلم - فانتاستيكا ەمەس. ونداعى بارلىق ديالوگ, ستيل سول زاماندا بولعان. ءتىپتى, تەاتر ينستيتۋتىندا وقىپ جۇرگەندە رەكەت جىگىتتەردى كورەتىنبىز. جاتاقحاناعا دا كەلەتىن. قولدارىندا سول كەزدە-اق سۋىق قارۋ بولاتىن. كوزىمىزبەن كوردىك, – دەدى اكتريسا.
سونىمەن قاتار ول قىلمىس الەمىنىڭ سەركەلەرى قانداي بولاتىنىن دا سيپاتتاپ بەردى.
- ولار وتە مىقتى, بىلەگىنە سەنەتىن جىگىتتەر. ءبىزدىڭ زامانىمىزدا سونداي جىگىتتەر ۇلكەن بەدەلگە يە ەدى. ولاردى باسقا ستۋدەنت جىگىتتەرمەن سالىستىرا المايسىڭ. ولاردا اقشا دا, سوڭعى ۇلگىدەگى كيىم دە بار. ەڭ قىمبات كولىكپەن ءجۇردى. ال ونىڭ ءبارى ءبىز سەكىلدى ستۋدەنت قىزدارعا تاڭسىق ەدى. ولاردىڭ قولىنداعى زاتتار دۇكەندە ساتىلمايتىن. ءبىر كۇنى سونداي “بانديت” جىگىتتىڭ ءبىرى ماعان ءبىر قوراپ شوكولاد اكەلىپ بەرگەن. قاتتى تاڭعالدىم. ول كەزدە ءبىر ءتۇيىر شوكولاد جەسەڭ, ءماز بولاسىڭ. سول مومەنتتى فيلمگە كىرگىزدىم. ءتىپتى, جارناماداعى تەمەكىنى شەگەتىن جىگىتتى “ەڭ مىقتى ەركەك” دەپ ويلادىق, – دەپ اعىنان جارىلدى پروديۋسەر.