حالىقتىڭ جەكە دەرەكتەرى ساقتالعان مەملەكەتتىك ماڭىزدى اقپارات جۇيەسىنە قول سۇققان ازاماتتىڭ كىناسى تولىق دالەلدەندى. اقتاۋ قالالىق سوتى ونى 3 جىلعا باس بوستاندىعىنان ايىردى, دەپ جازادى Egemen.kz.
قىلمىسكەر ازاماتتاردىڭ جەكە دەرەكتەرىن ءۇشىنشى تۇلعالارعا ساتپاق بولعان. سول ماقساتتا ەلدىڭ اقپاراتتىق-كوممۋنيكاتسيالىق ينفراقۇرىلىمىنىڭ ماڭىزدى نىساندارى بولىپ تابىلاتىن مەملەكەتتىك اقپارات جۇيەلەرىنە زاڭسىز كىرگەن. ۇلتتىق قاۋىپسىزدىك كوميتەتى قىلمىسكەردىڭ كىناسى تولىق دالەلدەنگەنىن مالىمدەدى.
«قىلمىستىق كودەكستىڭ 147-بابى 3, 4-بولىكتەرى, 205-بابى 2-بولىگى جانە 208-بابى 2-بولىگى 1-تارماعىمەن قاراستىرىلعان قىلمىستىق قۇقىق بۇزۋشىلىقتى جاساۋدا كىنالى دەپ تانىلعان قازاقستان ازاماتىنا قاتىستى اقتاۋ قالاسى سوتىنىڭ ۇكىمى زاڭدى كۇشىنە ەندى», دەپ حابارلادى ۇقك ءباسپاسوز قىزمەتى.