نەشە كۇننەن بەرى جارعاق قۇلاعى جاستىققا تيمەي اق قار, كوك مۇزدا كۇرە جولداردىڭ بويىندا قىزمەت ەتىپ جۇرگەن پاترۋلدىك پوليتسيا قىزمەتكەرلەرىنىڭ جۇمىسى وڭاي ەمەس. قاۋىپپەن قاتار ءجۇرىپ, قار قۇرساۋىندا قالعاندارعا العاشقى كومەك قولىن سوزاتىندار دا – سولار.
قىستاي جاۋماعان قار اقپاندا جاپالاقتادى. بورادى, بۇرقاسىنداتتى. وسكەمەن مەن اۋدانداردىڭ اراسىنداعى جولدار ءبىر جابىلىپ, ءبىر اشىلىپ تۇر. وسىندايدا جول كۇرەيتىن اۋىر تەحنيكالارمەن قاتار, جول پاترۋلدىك پوليتسياسى ارقاشان بىرگە ءجۇر.
– اۋا رايىنىڭ قولايسىز كۇندەرى جول بويىندا ءجۇرۋ ارينە, وڭاي ەمەس. كەزەگىمىزگە قاراي كۇن-ءتۇنى قار قۇرساۋىندا قالىپ قويعاندارعا كومەك كورسەتۋ – كۇندەلىكتى جۇمىسىمىز. ونىڭ ءبارىن ايتا بەرىپ قايتەمىز؟! كەي-كەيدە جول باستاپ, ەلدى مەكەندەرگە دەيىن جەتكىزىپ تاستايمىز, – دەيدى جول-پاترۋلدىك پوليتسياسىنىڭ قىزمەت ينسپەكتورى ايبەك كوستۋباەۆ.
كۇنى كەشە عانا قۇتقارۋشىلار مەن پوليتسيا قىزمەتكەرلەرى اق تۇتەك بوراندا قالىپ قويعان اۆتوكولىكتەر كولونناسىنا كومەك كورسەتتى. «وسكەمەن – تارعىن – سامار» باعىتىنداعى كۇرە جولدا, جوعارى تايىنتى اۋىلىنىڭ ماڭىندا بوراننىڭ سالدارىنان جولدا قالعان 15 جەڭىل اۆتوكولىك پەن 30 ادامنىڭ, سونىڭ ىشىندە 4 بالانى تارعىن اۋىلىنا دەيىن جول باستاپ, قاۋىپسىزدىگىن قامتاماسىز ەتىپ جەتكىزىپ تاستادى. ءارى قاراي اۆتوكولىكتەر وزدەرى قوزعالىستارىن جالعاستىردى. ال قار الىپ قالعان جولدى تازالاۋعا «وبلشىعىسجول» ۇيىمىنان اۋىر تەحنيكا جۇمىلدىرىلدى.
سونداي-اق ءدال وسى كۇندەرى «وسكەمەن – الماتى» تاس جولىندا تۇرىپ قالعان جولاۋشىلار دا قۇتقارۋشىلار كومەگىنە جۇگىنگەن. ولاردىڭ اراسىندا اياعى اۋىر ايەل, ءبىر بالا, ەكى قاريا بولعان. كومەككە تجد شۇعىل قۇتقارۋ جاساعى «كاماز-ۆاحتا» اۆتوكولىگىمەن كەلىپ, 13 جولاۋشىنى وسكەمەن قالاسىنا جەتكىزدى.
قارعا ومبىعىپ قالىپ, شىعا الماي جاتقان كولىكتەر قانشاما؟! ونىڭ بارىنە مۇمكىندىكتەرىنە قاراي پوليتسيا قىزمەتكەرلەرى, قۇتقارۋشىلار كومەك قولدارىن سوزىپ ءجۇر. جۇرگىزۋشىلەر دە ءبىر-ءبىرىن سۇيرەپ الەك.
اقپانداعى اۋا رايىنىڭ قولايسىز بولۋىنا بايلانىستى شقو تجد قابىرعاسىندا جەدەل شتاب قۇرىلدى. ولار ازاماتتارعا 87232-55-38-19 تەلەفون نومەرى بويىنشا قىزمەت كورسەتەدى. جالپى, قۇتقارۋشىلار, پوليتسيا قىزمەتكەرلەرى داۋىلدى ەسكەرتۋ جاريالانعاننان كەيىن تۇرعىلىقتى ەلدى مەكەندەردەن الىس شىقپاۋ كەرەكتىگىن ۇنەمى ەسكەرتىپ وتىرادى. قالادان شىعا بەرىستە پوليتسيا پاترۋلدىك قىزمەتكەرلەرى جۇرگىزۋشىلەرگە ەسكەرتۋ قاعازدارىن دا تاراتىپ, ۇنەمى ءتۇسىندىرۋ جۇمىستارىن دا جۇرگىزىپ ءجۇر. سونىمەن قاتار جولداردىڭ اشىق-جابىقتىعى تۋرالى «Darmen» ءموبيلدى قوسىمشاسى ارقىلى ءبىلىپ وتىرا الاسىز. توتەنشە جاعدايلار كەزىندە 112 ءنومىرى بويىنشا حابارلاسا الاسىزدار.
دەسە دە, ەسكەرتۋلەرگە قۇلاق اسپاي, اينالما جولدار ارقىلى ەلدى مەكەننەن شىعىپ كەتەتىن جۇرگىزۋشىلەر بار. اۋىل, قالا ىشتەرىندە بۇرقاسىن بايقالماعانىمەن, سىرت جاقتا ات قۇلاعى كورىنبەس اق بوران سوعىپ تۇراتىنىن ەسكەرمەي جاتادى. ونداي جاعدايدا, اكىمشىلىك كودەكستىڭ 667-بابىمەن, ياعني جابىق جولعا شىققانى ءۇشىن حاتتاما تولتىرىلىپ, ايىپپۇل سالىنادى. ايىپپ ۇلى دا از ەمەس. 30 اەك كولەمىندە نەمەسە 15 تاۋلىككە قاماۋعا الىنادى. ودان بۇرىن, جولداعى قاۋىپ بار. سوندىقتان تجد ماماندارى مەن پوليتسيا قىزمەتكەرلەرىنىڭ ەسكەرتۋىنە قۇلاق اسقان ابزال.
شىعىس قازاقستان وبلىسى