قورعانىس ۆەدومستۆوسىنىڭ باسشىسى گەنەرال-پولكوۆنيك رۋسلان جاقسىلىقوۆ وڭىردە اسكەري ينفراقۇرىلىم نىساندارىن جانە الداعى وقۋ-جاتتىعۋلارعا دايىندىق بارىسىن تەكسەردى, دەپ جازادى Egemen.kz قورعانىس مينيسترلىگىنىڭ ءباسپاسوز قىزمەتىنە سىلتەمە جاساپ.
«قوناەۆ گارنيزونىنىڭ «جاعالاۋ» پوليگونىندا قورعانىس ءمينيسترى دەسانتتىق-شابۋىلداۋ اسكەرلەرى قولباسشىسىنىڭ بايانداماسىن تىڭدادى. گەنەرال-مايور الماز جۇماكەەۆ ۇقشۇ-نىڭ «مىزعىماس باۋىرلاستىق-2024» ۇجىمدىق بىتىمگەرلىك كۇشتەرىمەن وتەتىن وقۋ-جاتتىعۋعا دايىندىق تۋرالى باياندادى.
ارميا اۆياتسياسىنىڭ تىكۇشاعىمەن گەنەرال-پولكوۆنيك رۋسلان جاقسىلىقوۆ «شوشقالى» پوليگونىن اينالىپ ۇشىپ ءوتتى.
مينيستر 65229 اسكەري بولىمىنە بارىپ, وندا اسكەري نىسانداردى ارالاپ, اۋە شابۋىلىنا قارسى قورعانىس اسكەرلەرىنىڭ اۆياتسيالىق تەحنيكاسى مەن قارۋ-جاراعىن ۇستاۋ شارتتارىمەن تانىستى.
قارۋلى كۇشتەر مەملەكەتتىك اسكەري-تاريحي مۋزەيىنىڭ فيليالىندا قورعانىس ءمينيسترى وبەكتىنىڭ كولەم قۇرىلىمىن ۇلعايتۋ جانە ەكسپوزيتسيالىق زالداردى جاڭارتۋ ماقساتىندا جۇرگىزىلىپ جاتقان جوندەۋ جانە قالپىنا كەلتىرۋ جۇمىستارىنىڭ بارىسىن تەكسەردى. مۋزەي باستىعى الۋا بايقاداموۆامەن كەزدەسۋدە گەنەرال-پولكوۆنيك رۋسلان جاقسىلىقوۆ جۇمىستاردى ساپالى جانە ۋاقتىلى ورىنداۋ قاجەتتىگىنە نازار اۋداردى.
ساپار اياسىندا ۆەدومستۆو باسشىسى قورعانىس مينيسترلىگىنىڭ بىتىمگەرلىك وپەراتسيالار ورتالىعىنا دا ات باسىن تىرەپ, ينفراقۇرىلىمدىق نىسانداردى ارالاپ, ۇلتتىق كونتينگەنتتى بۇۇ-نىڭ گولان جوتالارىنداعى بىتىمگەرلىك ميسسياعا جىبەرۋگە قاتىستى بىرقاتار نۇسقاۋ بەردى», دەلىنگەن اقپاراتتا.
مينيستر الماتى قالاسىنداعى ورتالىق اسكەري ەمحانانى ارالاپ, مەكەمەنىڭ ەمدەۋ-دياگنوستيكالىق جابدىقتارمەن, ءتيىستى قۇرالدارمەن جانە دارىلىك زاتتارمەن قامتاماسىز ەتىلۋىمەن تانىستى. مينيستر بەكىتىلگەن كونتينگەنتكە ساپالى امبۋلاتورلىق-ەمحانالىق جانە كونسۋلتاتسيالىق-دياگنوستيكالىق كومەك كورسەتۋ قاجەتتىگىن ايتتى.