جۇمىس بارىسىنداعى جۇيەلى ۇستانىم, بيۋروكراتيانى توقتاتۋ, ناقتى ناتيجەلى ءىس, قاجەتسىز شىعىنداردى قىسقارتۋ, بيزنەسكە اكىمشىلىك قىسىمدى ازايتۋ, سالىق جۇيەسىن تولىق تسيفرلاندىرۋ – مەملەكەت باسشىسىنىڭ ۇكىمەتتىڭ كەڭەيتىلگەن وتىرىسىندا بەرگەن ناقتى تاپسىرمالارى.
وسى ورايدا جاڭا سالىق كودەكسىن ازىرلەۋ, ماجىلىستە قارالىپ جاتقان مەملەكەتتىك ساتىپ الۋ زاڭناماسى جوباسىن جەتىلدىرۋ, اسىرەسە قۇرىلىس كومپانيالارىنا قاتىستى تالاپتى كۇشەيتۋ ەل ەكونوميكاسىنىڭ دامۋىنا تىڭ سەرپىن بەرىپ قانا قويماي, قوعامداعى الەۋمەتتىك قىسىمدى ازايتارى ءسوزسىز.
اقتوبە وبلىسى ارداگەرلەر كەڭەسى مۇشەلەرى مەملەكەت باسشىسىنىڭ ۇكىمەتكە قويعان تاپسىرمالارىن اۋداندىق جانە باستاۋىش سالالىق ارداگەرلەر ۇيىمدارىندا وتكەن كەزدەسۋلەردە تالقىلاپ, ۇسىنىستاردى نازارعا الىپ وتىرمىز. ۇكىمەتكە جۇكتەگەن مىندەتتەر ەل ازاماتتارىنىڭ تۇرمىس-تىرشىلىگىن جاقسارتۋعا اسەرىن تيگىزەدى. سونىڭ ىشىندە اۋىل شارۋاشىلىعىمەن اينالىساتىن شاعىن قوجالىقتاردىڭ مەملەكەتتىك سۋبيسيديالاۋعا قول جەتكىزە الۋى, اۆتوكولىك جولدارىنىڭ جاقسارۋى – اقتوبە وبلىسى تۇرعىندارىنىڭ نەگىزگى تالاپ-تىلەگى.
بۇل جەردە پرەزيدەنت اتاپ كورسەتكەن ءاربىر ماماننىڭ جۇمىسقا دەگەن جوعارى جاۋاپكەرشىلىگى, بيۋروكراتياعا جول بەرمەۋى اسا ماڭىزدى. قولدا بار رەسۋرستاردى ءتيىمدى دە, ماقساتتى تۇردە جۇمساي الساق, ەكونوميكاداعى جاقسى وزگەرىستەردى ءاربىر ەل ازاماتى تەز ارادا سەزىنەرى ءسوزسىز.
سەرىك شاڭعۇتوۆ,
اقتوبە وبلىسى ارداگەرلەر كەڭەسىنىڭ توراعاسى
اقتوبە