ۇكىمەتتىڭ كەڭەيتىلگەن وتىرىسىندا پرەزيدەنت ساياسي رەفورمالارمەن قاتار, ەكونوميكانىڭ بارلىق سالاسىن دامىتۋعا كۇرت بەتبۇرىس جاساۋ تۋرالى تالاپ قويدى, مىندەت جۇكتەلدى.
سالىق جانە بيۋدجەت كودەكستەرىن جەتىلدىرۋ, اسىرەسە, مەملەكەتتىك ساتىپ الۋ, مەملەكەت پەن جەكەمەنشىك ارىپتەستىك تۋرالى زاڭنامالارعا جاڭاشا سيپات بەرۋ كەرەكتىگىن تاپسىردى.
بىزگە پرەمەر-مينيستر ولجاس بەكتەنوۆتىڭ ىلە-شالا پرەزيدەنت تاپسىرمالارىن جۇزەگە اسىرۋ جونىندە ۇكىمەت مۇشەلەرىنە ناقتى مەرزىمى كورسەتىلگەن ءتيىستى تاپسىرمالار بەرگەنى ەرەكشە ۇنادى. ايتالىق, ءوزىنىڭ ءبىرىنشى ورىنباسارى ر.سكلياردان مۇناي-گاز, كومىر, حيميا, مەتالدى تەرەڭ وڭدەۋ, ماشينا جاساۋ سىندى سالالارىمەن اينالىساتىن الپاۋىتتاردان 4-5-ساتىلارداعى ءونىم وندىرۋگە بايلانىستى جوسپار, جوبالارىن جاساۋدى تالاپ ەتتى. سول سياقتى اۋىل شارۋاشىلىعى ونىمدەرىن وڭدەۋ تۋرالى دا ايتىلدى. ۇلان-عايىر دالامىز, قازبا بايلىعىمىز, ەگىن, مال شارۋاشىلىعىمىز بولا تۇرا سونى ۇقساتا الماي وتىرعانىمىز بيىك مىنبەردەن اشىق ايتىلدى جانە سول كەمشىلىكتى جويۋ جونىندە باعىت بەلگىلەنگەنى بايقالدى. ءونىم وندىرمەي وركەندەۋ بولمايتىنى بيلىكتىڭ ەڭ جوعارى دەڭگەيىندە مويىندالدى دەپ سانايمىن.
جاڭا ونىمدەر شىعارۋعا عىلىمي دا, وندىرىستىك تە قۋاتىمىز جەتكىلىكتى. كوزدەلگەن ماقسات جۇزەگە اسىرىلاتىن بولسا, قوسىمشا جۇمىس ورىندارىن اشىپ, قازىنانى تولىقتىرا تۇسەتىنى ايتپاسا دا تۇسىنىكتى. بۇل سايىپ كەلگەندە ەلىمىزدىڭ ەكونوميكاسىن كوتەرەدى, حالىقتىڭ ءال-اۋقاتىن ارتتىرادى.
پرەزيدەنت ۇكىمەتتىڭ جاڭا باسشىسى تۋرالى وتە جوعارى پىكىر ءبىلدىردى. ولجاس اباي ۇلىنىڭ ءسوزى نىق, باعىتى ايقىن ەكەنىن دە بايقاپ قالدىق. ءارى جاس, ءارى ءبىلىمدى, ءارى باتىل, ەڭ باستىسى, سوزگە ىلىكپەگەن ازامات.
پرەزيدەنتتىڭ ۇكىمەتتىڭ كەڭەيتىلگەن وتىرىسىنداعى تاپسىرمالارى, جاڭا پرەمەردىڭ العاشقى قادامدارى كەيىنگى كۇندەرى كوپشىلىكتىڭ اراسىنداعى نەگىزگى اڭگىمە ارقاۋىنا اينالعانىنا كۋا بولىپ ءجۇرمىز. حالىقتىڭ ءۇمىتى مول, سەنىمى زور. سول ءۇمىت اقتالسىن.
تولەگەن بۇكىروۆ,
قازاقستاننىڭ قۇرمەتتى مەتاللۋرگى, «قازاقمىس» كورپوراتسياسى» جشس ارداگەرلەر كەڭەسىنىڭ توراعاسى