الماتىداعى ءال-فارابي اتىنداعى قازۇۋ-دىڭ قۇقىقتىق جانە قۇجاتتامالىق قامتاماسىز ەتۋ دەپارتامەنتى الەۋمەتتىك جەلىدە ۋنيۆەرسيتەتتە وقيتىن ستۋدەنت قىزداردىڭ جەكە, مەديتسينالىق دەرەكتەرىنىڭ تارالىپ كەتۋىنە قاتىستى پىكىر ءبىلدىردى, دەپ جازادى Egemen.kz.
قازۇۋ-داعى دەپارتامەنت ماماندارى جەكە دەرەكتەردىڭ تارالۋىنا بايلانىستى ۋنيۆەرسيتەتتە ىشكى تەكسەرۋ جۇمىستارى جۇرگىزىلگەنىن مالىمدەدى. ۋنيۆەرسيتەت اقپاراتىنا سايكەس, ستۋدەنتتەردىڭ جەكە دەرەكتەرىن ۋنيۆەرسيتەتكە شارت نەگىزىندە مەديتسينالىق قىزمەت كورسەتەتىن Smart Health University City جشس مەدبيكەسى تاراتقان.
«6 اقپاندا ۋنيۆەرسيتەتكە شارت نەگىزىندە مەديتسينالىق قىزمەت كورسەتەتىن Smart Health University City جشس مەدبيكەسى Whatsapp مەسسەندجەرى ارقىلى فليۋوروگرافيالىق زەرتتەۋدەن ءوتۋىن قامتاماسىز ەتۋ ءۇشىن مەحانيكا-ماتەماتيكا فاكۋلتەتىنىڭ 3-4 كۋرس ستۋدەنتتەرىنىڭ ءتىزىمى بار Excell فورماتىنداعى قۇجاتتاردى وسى فاكۋلتەت دەكاناتىنىڭ مامانىنا جىبەرگەن. كەيىننەن مەسسەندجەرلىك حابارلامالار ارقىلى ۋنيۆەرسيتەتتە وقيتىن ستۋدەنت قىزدارعا قاتىستى جەكە دەرەكتەر مەن مەديتسينالىق, گينەكولوگيالىق قۇپيا اقپارات تاراپ كەتكەن.
ۋنيۆەرسيتەت قىزمەتتىك تەكسەرۋ تاعايىنداپ, الماتى پروكۋراتۋراسىنا اتالعان فاكت بويىنشا پروكۋرورلىق شارا قولدانۋ جانە ستۋدەنتتەردىڭ قۇقىقتارىن قورعاۋدى قامتاماسىز ەتۋ تۋرالى وتىنىشپەن جۇگىندى», دەلىنگەن جوو دەپارتامەنتىنىڭ حابارلاماسىندا.
ۋنيۆەرسيتەت Smart Health University City جشس-مەن اراداعى كەلىسىمشارتتى بۇزۋ ماسەلەسىن قاراستىرىپ جاتىر.