دۋبايداعى تابىس

Polisia.kz سايتىنىڭ حابارلاۋىنشا, ءىىم ارنايى جاساعى بۇل تۋرنيرگە وسىمەن ەكىنشى رەت قاتىسىپ وتىر. بيىل جاۋىنگەرلەرىمىز الەمنىڭ 41 ەلى­نەن قاتىسقان 74 كوماندانىڭ ىشىنەن 6-ورىندى قانجىعاعا بايلادى.

جارىستىڭ بارلىق كەزەڭى تارتىستى ءوتتى. ارنايى بولىمشەلەردىڭ قىزمەتكەرلەرى ءارتۇرلى تاكتيكالىق تاپسىرمالاردى ورىندادى. اتاپ ايتقاندا, تاكتيكالىق داعدىلاردى, ينتەللەكتۋال­دى شوعىرلانۋدى جانە فيزيكالىق توزىمدىلىكتى تەكسەرۋگە باعىتتالعان شابۋىل جانە قۇتقارۋ وپەراتسيالارىن جۇرگىزدى. سىنعا تولى دودادا ءتىپتى ءبىر جاۋىنگەرىمىز اۋىر جاراقات الىپ قالدى. الايدا جىگىتتەرىمىز نامىستى قولدان بەرمەي, جارىستىڭ بارلىق كەزەڭىندە باتىلدىق پەن تاباندىلىق تانىتتى, بىرلىك پەن باۋىرمالدىقتىڭ ناعىز ۇلگىسىن كورسەتتى.

ارنايى جاساق العاشقى ءۇش كەزەڭنەن ءساتتى ءوتىپ, جۇلدەلى 1 جانە 3-ورىنداردى يەلەنگەن بولاتىن. بىراق ءتورتىنشى دەڭگەي ولار ءۇشىن وڭاي بولمادى. جاۋىنگەرلەردىڭ ءبىرى تاپسىرمانى ورىنداپ جاتقاندا اياعىنان جاراقات الدى. الايدا ول بۇعان قاراماستان جارىستى توقتاتپادى. ونى ارىپتەستەرى جارتى جولدا قالدىرماي, مەجەلى جەرگە دەيىن سۇيەپ الىپ كەلدى.

سونىمەن, كوماندا بارلىق كەزەڭدى بىرگە ءوتىپ, تولىق قۇرامدا مارەگە جەتتى. شەشۋشى سىندا كوماندا مۇشەسى اۋىستىرىلىپ, جاراقات العان جاۋىنگەر اۋرۋحاناعا جەتكىزىلدى. قازىر جاعدايى تۇراقتى, ەشقانداي قاۋىپ جوق.

– مەن اياعىمدى «مۇنارا وقيعاسى» جاتتىعۋىندا سىندىرىپ الدىم. ءبىز ءۇشىنشى قاباتتان ەكىنشى قاباتقا ءتۇسىپ, قوڭىراۋدى سوعىپ, جەرگە ءتۇسۋىمىز كەرەك ەدى. ول جەرگە سەكىرگەن كەزدە, توق سوققانداي سەزىمدە بولدىم, كوزدەرىم قاراۋىتىپ كەتتى. بىراق مەندە توقتاۋ تۋرالى وي بولعان جوق. نە بولسا دا, مارەگە جەتۋىم كەرەك دەپ شەشتىم. جىگىتتەر مەن جەرلەستەرىم توقتاۋسىز قولداۋ كورسەتتى. ولارعا شەكسىز ريزامىن, – دەپ ويىمەن ءبولىستى جاۋىنگەر.

ايتا كەتەيىك, «THE UAE SWAT Challenge» – كۇش قۇرىلىمدارىنىڭ ارنايى كۇشتەرى اراسىندا وتكىزىلەتىن بەيرەسمي الەم چەمپيوناتى. ونى «ارنايى جاساقتار وليمپياداسى» دەپ تە اتايدى. بۇل جارىستىڭ باستى مىندەتى – ارنايى ماقساتتاعى جاساقتاردىڭ باسەكەگە قابىلەتتىلىگى مەن تيىمدىلىگىن ارتتىرۋ.