قىستىڭ سوڭعى ايى شىعىستاعى جۇرتتى ابدەن ابىگەرگە سالدى. مارقاكول وڭىرىنە جارتى مەتر قار جاۋسا, ۇلكەن نارىن مەن زايسان اۋداندارىندا قارعىن سۋ قاۋىپ ءتوندىردى. كۇرە جولدارعا كوشكىن ءتۇسىپ, كولىك قوزعالىستارىنا شەكتەۋ قويىلدى. ارتىنشا اياز كوتەرىلدى.
زايسان اۋدانىندا اۋا تەمپەراتۋراسىنىڭ كۇرت جىلىنىپ, تۇندە جاۋىن-شاشىننىڭ تۇسۋىنەن تاۋلى جەرلەردە قار ەري باستاعان. ەرىگەن قار سۋى ساي-سالانى قۋالاي اعىپ, اۋدان ورتالىعىنداعى قوس كوشەمەن گۇر ەتىپ وتكەن. ءۇيدى-ۇيلەرگە سۋ كىرمەگەنىمەن, جەرگىلىكتى بيلىك دەرەۋ تەحنيكالاردى جۇمىلدىرىپ, توسقاۋىل قويا قويعان. ءتىلسىز جاۋعا سەنىم جوق. ءار سالا تەحنيكالارىن شىعارىپ, وزدەرى بىلەك سىبانا الدىن الۋ جۇمىستارىنا كىرىسكەن. جەرگىلىكتى اتقارۋشى ورگان, توتەنشە جاعدايلار قىزمەتكەرلەرى, پوليتسەيلەر, شەكاراشىلار ءبىر كىسىدەي از ۋاقىت ىشىندە تەحنيكالاردىڭ كومەگىمەن تاسقىنعا توسقىن قويدى.
– ەرىگەن قار سۋى اۋىل كوشەلەرىن ارالاي اعىپ جاتقانىمەن, تۇرعىن ۇيلەرگە قاۋىپ تونگەن جوق. جاعداي تۇراقتالدى. جۇمىستار تىكەلەي باقىلاۋىمدا, – دەدى زايسان اۋدانىنىڭ اكىمى اەليتا احمەتسالىمقىزى.
ءدال سول سەكىلدى ۇلكەن نارىن اۋدانى, جۇلدىز اۋىلىنا دا ەرىگەن قار سۋى تۇرعىن ۇيلەرگە قاۋىپ توندىرگەن. انىقتالعانداي, امانگەلدى كوشەسىندەگى ءبىر تۇرعىن ءۇيدىڭ اۋلاسىندا سۋ جينالعان. جەدەل قيمىلداعان ماماندار موتوپومپا كومەگىمەن كولكىگەن سۋدى سورىپ, قاۋىپتى سەيىلتتى. ەسەپ-قيساپتارىنا قاراساق, 40 تەكشە مەتر سۋ سورىلىپ, سۋ باسادى-اۋ دەگەن تۇستارعا 30 توننا كولەمىندە قيىرشىق تاس توگىلدى. سونىمەن قاتار كوكباستاۋ اۋىلىنداعى اباي كوشەسىندەگى ءۇش اۋلاعا قارعىن سۋ جايىلعان. ابىروي بولعاندا, سۋدى اۋىل باسىنان بۇرىپ, دالاعا قاراي باعىتتاعان.
ءۇيدى-ۇيلەرگە بۇگىن قاۋىپ ءتونىپ تۇرماعانىمەن, كوكتەم قالاي بولارىن كىم ءبىلسىن؟! ءدوپ باسىپ, بولجاپ وتىرعان ماماندار دا جوقتىڭ قاسى. سوندىقتان, قاشان بولماسىن ساقاداي-ساي وتىرۋعا ءتيىس. مۇنداي جاعدايدا تۇرعىندار دا جاۋاپكەرشىلىك تانىتقاندارى ءجون. البەتتە, ارنايى ماماندار قاۋىپتىڭ الدىن الۋ قامىن جاسايدى.
ونىڭ ۇستىنە, كۇن جىلىپ, جاڭبىر سەبەلەگەندىكتەن, كۇرە جولدارعا كوشكىن ءتۇسىپ, اۆتوكولىكتەردىڭ قوزعالۋىنا شەكتەۋلەر قويىلىپ جاتىر. وبلىس ورتالىعىنان كاتونقاراعاي, سامار, قالباتاۋ, شەمونايحا باعىتتارىنا جولدار ءجيى جابىلىپ, جولاۋشىلارعا ەسكەرتۋ حابارلامالارى ءتۇسىپ وتىر. كاتونقاراعاي اۋدانىندا اۋىل اراسىنداعى جولدارعا دا كوشكىن ءتۇسىپ, جولاۋشىلارعا تۇساۋ بولعان. وتكەن اپتادا سوگىر – بارلىق اراسىنداعى جول جابىلىپ قالسا, كۇنى كەشە وسكەمەن – راحمان قاينارى تاس جولىنىڭ 437 شاقىرىمىن كوشكىن قار باسىپ قالعان. ايتا كەتۋ كەرەك, دايىن تۇرعان تەحنيكالار جابىلعان جولداردى دەرەۋ قاردان ارشۋعا كىرىسكەن. اسىرەسە تاۋدى بوكتەرلەي جاتقان جولدارعا كوكتەم شىعىپ, كۇن جىلي كوشكىن ءجيى تۇسەدى. دەمەك جۇرگىزۋشىلەر دە جاۋاپكەرشىلىكتى سەزىنىپ, شەكتەۋلەرگە باعىنعاندارى ابزال.
شىعىس قازاقستان وبلىسى