ۇلتتىق ەكونوميكا ءمينيسترى نۇرلان بايبازاروۆ ۇكىمەت وتىرىسىندا ەلدەگى ەكونوميكالىق ءوسىم جايلى ايتتى, دەپ حابارلايدى Egemen.kz.
«قاڭتار ايىنىڭ قورىتىندىسى بويىنشا قازاقستان ەكونوميكاسىنىڭ ءوسۋ قارقىنى 3,9% قۇرادى. ونىڭ ىشىندە ناقتى سەكتور – 3,8%-عا, ال قىزمەت كورسەتۋ سالاسى 3,5%-عا ءوستى. سالالار اراسىندا ەڭ جوعارى ءوسىمدى قۇرىلىس (12,8%-عا ءوسۋ), كولىك جانە قويمالاۋ (11,4%-عا), اقپارات جانە بايلانىس (10,6%-عا), سونداي-اق وڭدەۋ ونەركاسىبى (6,9%-عا) كورسەتتى. نەگىزگى كاپيتالعا سالىنعان ينۆەستيتسيالاردىڭ ءوسۋ قارقىنى 0,6%-دى قۇرادى», دەدى مينيستر.
بايبازاروۆ اتاعانداي, ينۆەستيتسيالار اعىنى ءبىلىم بەرۋدە – 3,6 ەسەگە, قارجى جانە ساقتاندىرۋ قىزمەتىندە – 3 ەسەگە, كولىك جانە قويمالاۋدا – 2,1 ەسەگە, قۇرىلىستا – 2 ەسەگە, اقپارات جانە بايلانىستا – 20,9%-عا, سونداي-اق وڭدەۋ ونەركاسىبىندە 15,8%-عا ءوستى.
«وڭىرلەر اراسىندا ەڭ جوعارى ءوسىم جەتىسۋ (2,1 ەسە ءوسۋ), ۇلىتاۋ (52,3%-عا), جامبىل (40,4%-عا) جانە الماتى (34,4%-عا) وبلىستارىندا بايقالدى. الدىن الا قورىتىندى بويىنشا 2023 جىلى سىرتقى ساۋدا تاۋار اينالىمى 3,2%-عا ءوسىپ, 140 ملرد دوللارعا جۋىقتادى. ەكسپورت 79 ملرد دوللارعا جۋىقتاپ (7%-عا تومەندەۋ), ونىڭ ىشىندە وڭدەلگەن تاۋارلار ەكسپورتى 25 ملرد-تان اسا دوللاردى قۇرادى.تاۋارلار يمپورتى 61 ملرد دوللاردان استى (20,1%-عا ءوسۋ). جالپى, وڭ ساۋدا بالانسى 18 ملرد دوللارعا جۋىق», دەدى بايبازاروۆ.
ءمينيستردىڭ ايتۋىنشا, وڭدەۋ ونەركاسىبىندە وڭ ءوسۋ ساقتالىپ وتىر. ءوندىرىس كولەمى 6,9%-عا ءوستى.
«كورسەتكىشتىڭ ءوسۋى 14 وڭىردە تىركەلدى. سونىڭ ىشىندە ەڭ جوعارى ءوسۋدى اقتوبە (34,7%), شىعىس قازاقستان (28,7%), قىزىلوردا (22,1%) جانە اباي (12,1%) وبلىستارى كورسەتتى», دەدى ول.