پرەزيدەنتكە پاۆلودار وبلىسىنىڭ الەۋمەتتىك دامۋى تۋرالى ەسەپ بەرىلدى

مەملەكەت باسشىسىنا وتكەن جىلى اۋىل شارۋاشىلىعىن قوسپاعاندا, بارلىق بازالىق ماكروكورسەتكىش بويىنشا وڭ ديناميكاعا قول جەتكىزىلگەنى جونىندە باياندالدى. وبلىس ەكونوميكاسىنا 965 ميلليارد تەڭگە ينۆەستيتسيا تارتىلعان. بۇل 2022 جىلمەن سالىستىرعاندا 26 پايىزعا كوپ.

جولاۋشىلار تاسىمالى سەكتورىندا 31 پايىز, ماشينا جاساۋ ىسىندە 13 پايىز, قۇرىلىس سالاسىندا 8 پايىز ءوسىم بايقالادى.

پرەزيدەنتكە 73 شاقىرىمنان استام جىلۋمەن قامتۋ جەلىسىنە رەكونسترۋكتسيالاۋ جۇمىستارى جۇرگىزىلگەنى جونىندە مالىمەت بەرىلدى. ەكىباستۇز جىلۋ ەلەكتر ورتالىعىنداعى بارلىق 10 قازاندىق اگرەگات جوندەلدى. تەحنيكالىق سۋعا ارنالعان 11 شاقىرىم جاڭا قۇبىر تارتىلىپ, 5,4 شاقىرىم ماگيسترالدى جىلۋمەن قامتۋ جەلىسىنە رەكونسترۋكتسيا جاسالدى.

اسايىن بايحانوۆتىڭ ايتۋىنشا, وبلىستاعى اۋىلداردا ءۇش زاماناۋي مەكتەپتىڭ سالىنۋى اپاتتى جاعدايداعى مەكتەپتەرگە قاتىستى ماسەلەنى شەشۋگە مۇمكىندىك بەردى. وڭىردە 54 ءبىلىم بەرۋ ۇيىمى تولىقتاي جاڭعىرتىلعان.

سونىمەن قاتار مەملەكەت باسشىسىنا ەكى جىل ىشىندە «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 30 جاڭا مەديتسينالىق نىسان سالىناتىنى تۋرالى باياندالدى.

وبلىستا قوعامدىق كولىك جۇيەسىن كەزەڭ-كەزەڭىمەن جاڭعىرتۋ جۇمىستارى باستالعان. بىلتىر قالالىق اۆتوبۋس پاركى 130 جاڭا اۆتوبۋسپەن تولىقتىرىلدى. سونداي-اق 722 شاقىرىم اۆتوجول جوندەلگەن.

پرەزيدەنتتىڭ تاپسىرماسىن ورىنداۋ ءۇشىن اۋىل تۇرعىندارىن ساپالى اۋىزسۋمەن قامتاماسىز ەتۋ جۇمىستارى جالعاسىپ جاتىر. وتكەن جىلى 37 مىڭنان استام حالقى بار 44 اۋىلعا جاڭا سۋ قۇبىرى تارتىلدى. وسىلايشا, وبلىستاعى اۋىل تۇرعىندارىنىڭ 98 پايىزىنا تازا اۋىزسۋ جەتكىزىلدى.

كەزدەسۋ سوڭىندا قاسىم-جومارت توقاەۆ وبلىس اكىمىنە ەرتىس ءوڭىرىن الەۋمەتتىك-ەكونوميكالىق تۇرعىدان ودان ءارى دامىتۋ جونىندە بىرقاتار تاپسىرما بەردى.