وسكەمەندەگى ونەر مۋزەيىندە «ۋاقىت پاليتراسى» اتتى كورمە اشىلدى. كورەرمەن نازارىنا حح عاسىردىڭ ەكىنشى جارتىسى مەن ءححى عاسىردىڭ باسىنداعى قازاقستان سۋرەتشىلەرىنىڭ تۇپنۇسقا تۋىندىلارى ۇسىنىلعان.
ەلىمىزدىڭ ەڭ العاشقى كاسىبي سۋرەتشىلەرى وتكەن عاسىردىڭ 60-70 جىلدارى بەينەلەۋ ونەرى مەكتەبىنىڭ قالىپتاسۋى كەزىندە شىنايى سوتسياليستىك جانە زاماناۋي اۆانگاردتىق باعىتتا جۇمىس ىستەگەنىن بىلەمىز. دەمەك, مۇنداعى ءار تۋىندى قۇندى مۇرا. اسىرەسە, حالىق سۋرەتشىسى ءابىلحان قاستەەۆتىڭ 1969 جىلى اكۆارەل بوياۋىمەن جازعان «ەسىك كولى» پەيزاجى مۋزەيدىڭ ەڭ قۇندى جادىگەرى. سۋرەتشى ءا دەپ قولىنا قىلقالام العاندا-اق, پەيزاج جانرى مەن اكۆارەل تەحنيكاسىنا دەن قويعان. سونىمەن قاتار قازاق قىزدارىنىڭ اراسىنان تۇڭعىش شىققان سۋرەتشى ايشا عالىمباەۆانىڭ سۋىق, جىلى تۇستەردى ۇيلەستىرە جازعان ناتيۋرمورتىنا كوپشىلىك تاڭداي قاعا ۇزاق قاراستى.
زالعا اينالدىرا قويىلعان كارتينالاردىڭ قاي-قايسىسىنا قاراساڭىز دا, سوناۋ زاماننىڭ رۋحىن سەزىندىرەدى. ونەردى تۇسىنگەن, تۇيسىنگەن جاندى بەينە ءبىر الپىسىنشى جىلدارعا جەتەلەپ اكەتەتىندەي اسەرى بار. كسرو حالىق سۋرەتشىسى گۇلفايرۋس يسمايلوۆانىڭ «الما» اتتى ايەل پورترەتىنە قاراڭىز. سول زامانداعى قازاق ايەلدەرىنىڭ بۇكىل مىنەز-بولمىسىن ءبىر عانا ايەلدىڭ پورترەتىمەن بەرە بىلگەندەي. جالپى, وبلىستىق ونەر مۋزەيىنىڭ قورىندا گ.يسمايلوۆانىڭ ءۇش تۋىندىسى ساقتالعان. سونداي-اق ەسىگىن ايقارا اشقان «ۋاقىت پاليتراسى» اتتى كورمەگە بەينەلەۋ ونەرى سالاسىندا ويىپ تۇرىپ ورىن الاتىن قىلقالام شەبەرلەرى ساليحيتدين ايتباەۆ, شايماردان ساريەۆ, باحتيار تابيەۆ, ماعاۋيا امانجولوۆ, بەكسەيىت تۇلكيەۆ, ەربولات تولەپباەۆ سىندى سۋرەتشىلەردىڭ دە باعا جەتپەس جۇمىستارى قويىلدى.
شىعىس قازاقستان وبلىسى