بۇگىن - عىلىمداعى ايەلدەر مەن قىزداردىڭ حالىقارالىق كۇنى. اتاۋلى كۇنگە وراي مادەنيەت جانە اقپارات ءمينيسترى ايدا بالاەۆا قۇتتىقتاۋىندا عىلىم سالاسىنداعى ايەلدەر قاۋىمىنىڭ ەڭبەگىن ناسيحاتتاۋعا شاقىردى, دەپ جازادى Egemen.kz.
«بۇل كۇن ايەلدەر مەن قىزدارىمىزدىڭ عىلىم مەن تەحنيكا سالاسىنداعى مۇمكىندىكتەرىن دامىتۋعا قولداۋ كورسەتۋدىڭ ماڭىزىن ەسكە سالادى.
عىلىمعا قىزىعاتىن قىزدار ءۇشىن ۇلگى الاتىن تۇلعالاردىڭ بولۋى ماڭىزدى.
جاقىندا بيولوگ, بەلگىلى عالىم كۇنسۇلۋ زاكاريا ۆاكتسيناتسيا سالاسىنىڭ دامۋىنا ۇلەس قوسقان ايەلدەردىڭ الەمدىك رەيتينگىنە ەندى. ونىڭ جەتەكشىلىگىمەن ءبىر توپ عالىم 2020 جىلى وتاندىق «QazVac» ۆاكتسيناسىن ازىرلەدى. ودان بولەك ەلىمىزدەگى عىلىم اكادەمياسى تاريحىنداعى تۇڭعىش ايەل پرەزيدەنت, بيولوگيا عىلىمدارىنىڭ دوكتورى - ناعيما ايتحوجينا, ورتالىق ازياداعى گەولوگيا عىلىمدارىنىڭ دوكتورى بولعان تۇڭعىش ايەل پاتشايىم تاجىباەۆا سياقتى تۇلعالارمەن ءبىز ەرەكشە ماقتانامىز.
جالپى بۇگىندە وتاندىق عىلىم جاڭا كەزەڭگە اياق باسىپ وتىر. مەملەكەت باسشىسى بۇل باعىتتىڭ ماڭىزدىلىعىنا ەرەكشە ءمان بەرۋدە. وسى سالاداعى اتقارىلىپ جاتقان جۇمىستار ايتارلىقتاي ناتيجە كورسەتەتىن عالىمداردىڭ جاڭا قاۋىمداستىعىنىڭ قالىپتاسۋىنا ىقپال ەتتى.
دەگەنمەن بۇل كۇندەرى عىلىمي-زەرتتەۋ جانە تاجىريبەلىك-كونسترۋكتورلىق جۇمىستارعا قاتىساتىن ايەلدەردىڭ ۇلەسى شامامەن 54% قۇرايدى, بۇل - 10 مىڭنان استام ادام. الايدا ولاردىڭ ەسىمدەرى مەن جەتىستىكتەرىنەن كوپشىلىگى بەيحابار.
سوندىقتان وسى جازبام ارقىلى بارشاڭىزدى عىلىمداعى ايەلدەردى قولداۋعا جانە ولاردىڭ ەسىمدەرى مەن جەتىستىكتەرىن كوبىرەك ناسيحاتتاۋعا شاقىرامىن», دەپ جازدى مينيستر الەۋمەتتىك جەلىدەگى پاراقشاسىندا.