مەملەكەت باسشىسى قاسىم-جومارت توقاەۆ فرانتسيا پرەزيدەنتى ەممانيۋەل ماكرونعا قازاقى تازىنىڭ ەكى كۇشىگىن سىيلادى.
بىلتىر قاراشا ايىندا مەملەكەت باسشىسىنىڭ شاقىرۋىمەن استاناعا ساپارمەن كەلگەن فرانتسيا پرەزيدەنتى «ەتنواۋىل» كورمەسىن ارالاپ كورىپ, قازاق حالقىنىڭ باي مادەني مۇراسىمەن تانىسقان ەدى. كورمە ورتالىعىن تاماشالاۋ بارىسىندا ەممانيۋەل ماكرونعا قازاقى تازىنىڭ تۇقىمى ەرەكشە ۇناعان بولاتىن. سول كەزدە قاسىم-جومارت توقاەۆ فرانتسيالىق ارىپتەسىنە تازى سىيلاۋعا ۋادە بەرگەن-ءتىن.
كەيىن پاريجگە قازاقى تازىنىڭ بەس ايلىق ەكى كۇشىگى جەتكىزىلدى. قوس تازىنى فرانتسۋز ۆەتەرينارلارى تەكسەرىپ, ۋاقىتشا كارانتينگە جىبەردى. سونداي-اق فرانتسيا تاراپىنا كۇشىكتەردى تاماقتاندىرۋ جانە ۇيرەتۋ جونىندەگى نۇسقاۋلىق بەرىلدى.
تازى كۇشىكتەرىنە جيۋل جانە جاننا دەگەن جاراسىمدى ات بەرىلگەنى ءمالىم بولدى. كۇشىكتەر ماكرون وتباسىنىڭ نەمو ەسىمدى قارا لابرادورىمەن «دوستاسىپ» ۇلگەرگەن. ايتپاقشى, بۇل ءيتتى ەرلى-زايىپتى ماكروندار 2017 جىلى جانۋارلار پانالايتىن جەردەن اسىراپ العان بولاتىن.