شىعىستىڭ كەيبىر اۋداندارىندا قار قالىڭ. كۇن كۇرت جىلىنسا, قارعىن سۋ قاۋپى 71 ەلدى مەكەنگە تونگەلى تۇر. سوندىقتان ماماندار كوكتەم مەزگىلىنە دايىندىقتى بۇگىننەن باستاپ كەتتى.
شىعىس قازاقستان وبلىسى اكىمىنىڭ وكىمىمەن 1 اقپاننان باستاپ بولۋى ىقتيمال سۋ تاسقىنى كەزەڭىنە جوعارى دايىندىق رەجىمى ەنگىزىلدى. اۋەلى, سۋ ايدىندارىنا مونيتورينگ جۇرگىزىلەدى. ەلدى مەكەندەردەگى قار مۇمكىندىگىنشە سىرتقا شىعارىلادى. قازىرگى ۋاقىتتا جەرگىلىكتى اتقارۋشى ورگاندار 54 000 تەكشە مەتردەن استام قاردى دالالى جەرگە اپارىپ توككەن. سۋ تاسقىنى قاۋپى تونە قالسا, وبلىستا جەدەل دەن قويۋ ءۇشىن قۇتقارۋشىلار مەن جەرگىلىكتى اتقارۋشى ورگانداردىڭ جەكە قۇرامىنىڭ 2 334 ادامى, 223 موتوپومپا, 61 ءجۇزۋ قۇرالى, سونداي-اق, 735-تەن استام وزگە دە تەحنيكا توپتاستىرىلعان. 34 285 دانا قاپ, 5 974 توننا ينەرتتى ماتەريال جانە 328 توننادان استام ججم دايىندالدى. توتەنشە جاعداي بولا قالسا, ەۆاكۋاتسيالاناتىن حالىقتى ورنالاستىرۋ ءۇشىن قالالار مەن اۋدانداردىڭ اكىمدەرى جالپى سىيىمدىلىعى 17 600 ادامعا ارنالعان 153 ۋاقىتشا ورنالاستىرۋ پۋنكتىن دايىندادى.
ماماندار بولجاعانداي, شىعىس قازاقستاندا سۋ تاسقىنى قاۋپى بار 71 ەلدى مەكەن ناقتىلانعان. قۇتقارۋشىلار ۇيلەردى ارالاپ, سۋ باسۋ قاۋپى تونگەن حالىققا نۇسقاۋ جۇمىستارىن جۇرگىزدى. ماسەلەن, الدىمەن اۋلا اۋماعىن قاردان تازارتۋ قاجەت. اسىرەسە, ويدا تۇرعان ۇيلەردىڭ تۇرعىندارى ارىقتىڭ بويىن تازارتىپ, ەرىگەن قار سۋى اعاتىنداي ەتىپ اشىپ تاستاعانى ءجون. مۇمكىندىكتەرىنە قاراي, ينەرتتى ماتەريالداردى قاپقا تولتىرىپ, ساقاداي-ساي وتىرعاندارى ابزال. سۋ باسۋ قاۋپى ءتونىپ تۇرعان ءۇي بولسا, جەرتولەسىندەگى ازىق-ت ۇلىكتى قۇرعاق جەرگە ساقتاۋ كەرەك دەسەدى ماماندار.
– ءبىز ءوز تاراپىمىزدان سۋ تاسقىنى قاۋپىن الدىن الۋ ءۇشىن بارلىق شارالاردى جاساپ جاتىرمىز. تۇرعىندار دا جاۋاپكەرشىلىك تانىتسا ەكەن. قالاي دەسەك تە, ءتىلسىز جاۋدىڭ بولۋ-بولماۋىن ءدوپ باسىپ ايتا الماسپىز. ماماندار بولجايدى. سوندىقتان دايىن بولۋىمىز كەرەك, – دەپ اتاپ ءوتتى شقو تجد تج الدىن الۋ باسقارماسى باستىعىنىڭ مىندەتىن اتقارۋشى دينا بەكسۇلتانوۆا.
كەشە توتەنشە جاعدايلار دەپارتامەنتى ماماندارى بۋتاكوۆا اۋىلىنىڭ تۇسىندا ءۇلبى وزەنىنىڭ مۇزىن جاردى. سەبەبى, ءدال وسى تۇستا مۇز قالىڭدىعى 20-30 سانتيمەترگە جەتكەن. كۇن جىلىنا وزەن بەتىندە مۇز كەپتەلسە, ارناسىنان اسقان سۋعا بوگەۋ قويۋ قيىنعا سوعادى. سول ءۇشىن دە الدىن الۋ جۇمىستارىنا ەرتە كىرىسكەن.
شىعىس قازاقستان وبلىسى