الاكول اۋدانىنىڭ اقجار اۋىلىندا «اۋىل – ەل بەسىگى» باعدارلاماسى اياسىندا جاڭا مادەنيەت ءۇيى پايدالانۋعا بەرىلدى. زامان تالابىنا ساي ماتەريالدىق-تەحنيكالىق بازالارىمەن جابدىقتالعان عيمارات قوس قاباتتى, اۋماعى 8 مىڭ شارشى مەتردى قۇرايدى.
ەندى مۇندا اۋىل جاستارى مەن جاسوسپىرىمدەرىنىڭ بوس ۋاقىتتارىن ءتيىمدى وتكىزۋىنە مۇمكىندىك بار, ءتۇرلى مادەني ءىس-شارالار ۇيىمداستىرۋعا جاعداي جاسالعان. مۇندا 20-عا جۋىق ۇيىرمە, اتاپ ايتقاندا, حورەوگرافيا, دومبىرا, ۆوكال, كوركەمسوز, سۋرەت, ت.ب. جۇمىس ىستەپ, 12 شتاتتىق بىرلىككە سايكەس تۇراقتى جۇمىس ورنى اشىلاتىن بولادى. وقىرماندارعا ارنالعان اۋىل كىتاپحاناسى دا مادەنيەت ءۇيىنىڭ ىشىندە ورنالاسقان.
نىساننىڭ سالتاناتتى اشىلۋ راسىمىنە بارعان اۋدان اكىمى الماس ءابدينوۆتىڭ ايتۋىنشا, الاكول اۋدانىندا 16 مادەنيەت ءۇيى, 23 كىتاپحانا, 2 مۋزەي جانە 1 ارحيۆ حالىققا ۇزدىكسىز قىزمەت ەتىپ كەلەدى. سولاردىڭ قاتارىنا ەندى 150 ورىندى تاعى ءبىر جاڭا مادەنيەت ءۇيى قوسىلىپ وتىر.
«اۋدانىمىزدا مادەنيەت سالاسىنىڭ دامۋىنا باعىتتالعان كوپتەگەن يگى شارا جۇزەگە اسىرىلۋدا. مۇنىڭ ءوزى بولاشاققا سالىنعان سەنىمدى ينۆەستيتسيا دەۋگە بولادى. الداعى ۋاقىتتا جاعاتال, جايپاق اۋىلدارىنا بلوكتى-مودۋلدىك مادەنيەت ءۇيىن ورناتۋعا بيۋدجەتتەن قاراجات ءبولىندى», دەدى اۋدان اكىمى ا.ابدينوۆ.
اۋدان تۇرعىندارى اتىنان ريزاشىلىعىن بىلدىرگەن ارداگەرلەر كەڭەسىنىڭ مۇشەسى تۇرسىنحان احمەتوۆ «بۇگىن – ءبىز ءۇشىن كوپتەن كۇتكەن قۋانىشتى كۇن. ۇزاق جىلدان بەرى جاڭا مادەنيەت ءۇيى اشىلسا دەپ جۇرگەنبىز. بۇرىن بالالارىمىزدىڭ بوس ۋاقىتىن وتكىزىپ, وزدەرىن دامىتۋعا ارنالعان ارنايى ورىن بولماپ ەدى. ەندى مىنە, بالالارىمىز ءتۇرلى ۇيىرمەلەرگە قاتىسىپ, ونەرىن شىڭدايتىن بولادى. جاڭا مادەنيەت ءۇيى حالىق يگىلىنە قىزمەت ەتە بەرسىن», دەپ قۇتتىقتاۋ تىلەگىن جەتكىزدى.
ءوڭىر اكىمىنىڭ ءباسپاسوز قىزمەتىنىڭ مالىمەتشىنشە, اقجار اۋىلى – اۋدان ورتالىعى ءۇشارال قالاسىنان 70 شاقىرىم قاشىقتىقتا ورنالاسقان. اقجار وكرۋگىنە 3 ەلدى مەكەن – اقجار, قوڭىر, مايلىشات اۋىلدارى قارايدى. جالپى حالىق سانى – 2 170 ادام, سونىڭ ىشىندە 540-ى – جاستار.
جەتىسۋ وبلىسى