شىمكەنت قالاسىنىڭ اكىمى عابيت سىزدىقبەكوۆ وتكىزگەن اكىمدىك اپپاراتىنىڭ جينالىسىندا شەنەۋنىك ۇستالدى. قالالىق سىبايلاس جەمقورلىققا قارسى ءىس-قيمىل اگەنتتىگى جيىن بارىسىندا تۇرعىن ءۇي باسقارماسى باسشىسىنىڭ مىندەتىن اتقارۋشىنى تەرگەۋگە الدى, دەپ جازادى Egemen.kz.
جينالىستا قالا اكىمى قىزمەتكەرلەردى ادال جۇمىس ىستەۋگە, بيۋدجەتتەن بولىنگەن قارجىنى قولدى ەتپەۋگە شاقىردى.
«بۇگىن مەنىڭ تاعايىندالعانىما تۋرا 5 اي بولدى. سىزدەردەن وسى ۋاقىت ارالىعىندا جۇمىستى ادال ىستەۋدى سۇراپ جاتىرمىن. مەن بىلەمىن ارالارىڭىزدا ادال, مەملەكەتشىل ازاماتتار بار. كوپ كىسى سونداي. سىزدەرگە سەنەمىن. سەندىم دە. سىزدەردى اۋىستىراتىن ەشقانداي ويىم بولعان جوق. بىراق كەتكەن كىسىلەر دە بولدى. ولار سوزگە كونبەگەننەن كەيىن كەتتى. وزدەرىنىڭ ارتىندا بىلىقتارى دا بار. وتكەن نارسەنى قالدىرىپ, قازىر جۇمىستى جاڭادان باستاۋ كەرەك. ارامىزدا ساتقىندار دا بار. وسى جەردەن الىپ كەتىڭىزدەر», دەدى شىمكەنت قالاسىنىڭ اكىمى.
جينالىس بارىسىندا تەرگەۋ باسقارماسىنىڭ وكىلى ءسوز الىپ, وتكەن جىلدان بەرى ەسكەرتۋدى ەلەمەگەن شەنەۋنىكتى تەرگەۋگە الاتىنىن مالىمدەدى.
ۆيدەودان وسى تۇستا سىبايلاس جەمقورلىققا قارسى ءىس-قيمىل اگەنتتىگى جينالىس ءوتىپ جاتقان كابينەتكە كىرىپ, زالدا وتىرعان شەنەۋنىكتى سۇراققا الىپ, ۇستاپ الىپ كەتكەنىن كورۋگە بولادى.
كەيىن ۇستالعان تۇلعا شىمكەنت قالاسى تۇرعىن ءۇي باسقارماسى باسشىسىنىڭ مىندەتىن اتقارۋشى مومىنوۆ ازات مۇحتار ۇلى ەكەنى بەلگىلى بولدى.
بۇعان دەيىن باسقارما باسشىسىنىڭ مىندەتىن اتقارۋشىعا قانداي ايىپ تاعىلعانىن حابارلاعان ەدىك.