كەشە قاليبەك قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىندا كورنەكتى مەملەكەت قايراتكەرى, اقىن, جازۋشى, دراماتۋرگ, كومپوزيتور ساكەن سەيفۋلليننىڭ تۋعانىنا 130 جىل تولۋىنا وراي قانات ءجۇنىسوۆتىڭ «ساكەن-سۇڭقار» سپەكتاكلىنىڭ ارنايى كورسەتىلىمى بولدى. سپەكتاكلدىڭ قويۋشى رەجيسسەرى – قازاقستاننىڭ ەڭبەك سىڭىرگەن قايراتكەرى الىمبەك ورازبەكوۆ.
قازاق ەلىنىڭ ماڭدايىنا بىتكەن قايراتكەر, اقىن, جازۋشى, دراماتۋرگ, ۇستاز ساكەن سەيفۋلليننىڭ عۇمىرىنان سىر شەرتەتىن تۋىندى كورەرمەن نازارىنا 2014 جىلدان باستاپ ۇسىنىلىپ كەلەدى. تاعدىرى تار جول, تايعاق كەشۋگە تولى ۇلت قايراتكەرى ەلىنىڭ كەلەشەگى جارقىن بولۋى ءۇشىن كۇرەستى. بىراق كۇردەلى يدەولوگيالىق مايداندا قىزۋ تارتىسقا ءتۇسىپ, ءوزى قۇرعان وكىمەتتىڭ قۇربانى بولدى. رەجيسسەر الىمبەك ورازبەكوۆ ساحنالاعان قويىلىم ەل قۇرمەتىنە يە بولعان سىرباز ساكەننىڭ عۇمىر جولىنان, عيبراتتى ومىرىنەن سىر شەرتەدى.
«ەل ءۇشىن جان قيعان ەسىل ەرلەردىڭ ارقايسىسى زور قۇرمەتكە لايىق. سولاردىڭ ءبىرى – مەملەكەت جانە قوعام قايراتكەرى اقيىق اقىن, جازۋشى-دراماتۋرگ س.سەيفۋللين. قانات ءجۇنىسوۆ جازىپ, الىمبەك ورازبەكوۆ قويعان سپەكتاكلدە سۇڭقار ساكەننىڭ ومىرىمەن قاتار, زامانى دا قامتىلىپتى. اسىرەسە الاش كوسەمدەرىنىڭ ءبىرى احمەت بايتۇرسىن ۇلىمەن اراسىنداعى سىيلاستىعى, پىكىرتالاسى ايقىن بەرىلگەن. تۇلعالار اراسىنداعى ديالوگتەر تاريحي دەرەكتەرمەن ءوربي وتىرىپ كوركەمدىك شەشىمدەرگە ۇلاسادى. ۇلت تاعدىرى سىنعا تۇسكەن ۋاقىتتاعى ۇلىلارىمىزدىڭ قايتسەك قازاقتى مۇراتقا جەتكىزەمىز دەپ جانتالاسقان تۇستارى كورەرمەندى بىردەن باۋراپ اكەتتى. اۆتور س.سەيفۋلليندى باس كەيىپكەر دەڭگەيىندە جازعانمەن, احاڭنىڭ بەينەسىن ەش الاسارتپاعان. باس كەيىپكەردەن بيىك بولماسا تومەن ەمەس. ساكەننىڭ احاڭا دەگەن قۇرمەتى تاريحي وقيعالارعا نەگىزدەلگەن. سونىمەن بىرگە اقىننىڭ قايراتكەرلىك قىرى كوبىرەك اشىلىپتى», دەيدى مەملەكەت جانە قوعام قايراتكەرى ورالباي ابدىكارىموۆ. قايراتكەردىڭ ايتۋىنشا, حالىق كوبىنە ساحنادان ساكەننىڭ اقىندىق, جازۋشىلىق قىرلارى مەن تراگەدياسىن عانا كورەتىن. ال «ساكەن – سۇڭقار» دراماسىندا ول ولقىلىقتىڭ ورنى تولعان.
ساكەن ءرولىن اكتەر, قازاقستاننىڭ ەڭبەك سىڭىرگەن قايراتكەرى سىرىم قاشقاباەۆ سومدادى. سونىمەن قاتار سپەكتاكلدە قازاقستاننىڭ ەڭبەك سىڭىرگەن قايراتكەرلەرى بولات ىبىراەۆ, التىناي نوگەربەك, جانقالدىبەك تولەنباەۆ, بورانباي مولداباەۆ, سونداي-اق سامات بايىروۆ, جانات وسپانوۆ, جانىبەك مۇساەۆ, شاح-مۇرات ورداباەۆ باستاعان تەاتر اكتەرلەرى ونەر كورسەتتى.
سونىمەن قاتار سپەكتاكلدە ساحنا سۋرەتى بويىنشا بەرىك بورباەۆ, مۋزىكاسىن قۇراستىرۋشى, كومپوزيتورى – قايرات توقىمبەتوۆ, كيىم ۇلگىسىنىڭ سۋرەتشىسى رەتىندە شىنار ەلەمباەۆا تەر توكتى. ال ساحنا سايىسىن ولجاس دالەلحان قويدى.