سەمەي قالاسىنداعى شاكارىم اتىنداعى كوپبەيىندى №5 گيمنازيانىڭ 9-سىنىپ وقۋشىلارى ايجان جۇمابەكوۆا مەن شۇعىلا ۋالحان تۇرمىستىق قالدىقتاردان سەيسموگراف قۇرالىن ويلاپ تاپتى. قۇرالدى سەيسميكالىق قاۋىپتى ايماقتاردا, جاڭادان باستالعان قۇرىلىس نىساندارىندا قولدانۋعا بولادى.
عاجابى سول, جاس ونەرتاپقىشتار بيىك عيماراتتاردىڭ سەيسميكالىق جاعدايىنا الاڭداۋشىلىق تانىتىپ, مەحانيكالىق ۇلگىدە قۇرال جاساپ شىعارعان. قاعاز تاسپا, ۇيكەلىستى تۋدىراتىن لاينەر, بارابان, قوزعالتقىشقا ارنالعان قۋات كوزىنەن تۇراتىن قۇرالعا ەينشتەين داتچيكتەرىن, سونداي-اق اردۋينو باعدارلاماسىن قوسقان. ولار وزدەرى ويلاپ تاپقان قۇرالدى مەكتەپتە ەدەنگە, قابىرعاعا ورناتىپ, اسەرىن بايقاۋ ءۇشىن پايدالانىپ كورگەن. ەدەن تەربەلىسىنە تاجىريبە جاساعاندا سەكىرگەن كەزدەگى قوزعالىستى بايقاعان.
– فيزيكا ساباعىندا العان ءبىلىمىمىزدى قولدانا وتىرىپ, عيماراتتارمەن قاتار تەحنيكانىڭ ەدەنگە جانە قابىرعاعا تيگىزەتىن سەيسميكالىق اسەرىن قاراستىرۋ ءۇشىن سەيسموگرافتىڭ ناتيجەسىن سالىستىردىق. ناقتى ناتيجە الۋ ماقساتىندا دەرەكتەر تىركەۋىشى ەinstein™ Tablet +2 پلانشەتتىڭ Milab باعدارلاماسىنداعى Heart Rate داتچيگىن قولدانىپ وتىرمىز. جوبامىزدىڭ جەتەكشىسى – فيزيكا پانىنەن ءدارىس بەرەتىن الۋا بيىمبەتوۆا, – دەيدى عىلىمي جاڭالىققا جانى قۇشتار وقۋشىلار.
سەيسموگرافتى سەيسميكالىق قاۋىپتى ايماقتاردا, مىسالى, تاۋلى جەرلەردە, اۋىلدىق وكرۋگتەردە, جاڭا قۇرىلىستاردا, ءبىلىم الۋ بارىسىندا فيزيكا-گەوگرافيا باعىتىنداعى وقۋ مەكەمەلەرىندە قولدانۋعا بولادى. جاس ونەرتاپقىشتاردىڭ ايتۋىنشا, سەيسموگراف مودەلىنىڭ قۇرىلىسى مەن جۇمىس ىستەۋ مۇمكىندىگىن باسقا انالوگتەرمەن سالىستىرىپ كورگەندە, ونىڭ قۇنى قولجەتىمدى, سالماعى جەڭىل ءارى تاسىمالداۋعا ىڭعايلى ەكەنىنە كوز جەتىپ وتىر. بولاشاقتا وقۋشىلار عيماراتتاردىڭ قاۋىپسىزدىگىن الدىن الا زەرتتەپ, قاشىقتان باسقارىلاتىن سەيسموگراف قۇرالىن ويلاپ شىعارۋدى جوسپارلاپ وتىر.
سەمەي