قۇتقارۋشىلار ەڭبەگى قاشاندا قۇرمەتكە يە. ەل دە قيىن-قىستاۋدا قولۇشىن بەرۋگە ءازىر, جاناشىرلىعى مول وسى ءبىر ماماندىق يەلەرىن قۇرمەتتەيدى. تاياۋدا اق بوراننىڭ ىشىندە اداسقان, ايى-كۇنى جەتىپ وتىرعان ايەلدى امان الىپ قالعان قۇتقارۋشىنىڭ ەسىمى نارەستەگە بەرىلدى.
سول كۇنى ەرەيمەننىڭ ەتەگى تۇتەگەن بوران بولاتىن. قارعا ادىم جەر اتاپ باسۋ – مۇڭ. تورتكۇل دۇنيە اق شىمىلدىق جامىلعان. اياز دا اشۋىنا مىنە باستاپتى. الدەبىر شارۋانىڭ ىڭعايىمەن جولعا شىققان جولاۋشىلار اداسىپ كەتكەن. ارالارىندا الگى ايەل دە بار. جولاۋشىلار بىلاي تۇرسىن, سايلانىپ شىققان قۇتقارۋشىلاردىڭ ءوزى اق بوراندا وڭ-سولىن اڭعارماستاي. شۇعىل حابار تۇسكەننەن كەيىن ادامداردى قۇتقارۋعا اسىققان ولاردىڭ دا دەنەسىن ۇسىك شالعان. ايتسە دە كورەر جارىعى, تاتار ءدامى تاۋسىلماعان ەكەن, بارلىعى ءدىن امان.
جول ۇستىندەگى ازاپتى تارتقانىمەن, امان قالعان انا پەرزەنتحانادان شىققاندا اق تۇيەنىڭ قارنى جارىلعان قۋانىشقا قۇتقارۋشى دا بارىپتى. جارىق دۇنيەگە شەكەسى تورسىقتاي ۇل كەلگەن. وتباسى بولىپ اقىلداسا كەلە, پەرىشتەدەي جەبەپ, دەمەپ, اق بوراننان امان قالۋلارىنا سەبەپشى بولعان قۇتقارۋشى امانگەلدى دوسكەنوۆتىڭ ەسىمىن سابيگە بەرگەن. ءسوز اراسىندا بۇل وتباسىنىڭ جەتىنشى بالاسى ەكەندىگىن ايتا كەتەلىك.