كەيىنگى جىلداعى مۇعالىم مارتەبەسىنە باسىمدىق بەرىلىپ, اۋىل مەن قالا مەكتەپتەرىنىڭ تەرەزەسىن تەڭەستىرۋگە كوپ كوڭىل بولىنگەنى قۇپتارلىق شەشىم بولدى. سونىڭ ىزىمەن اۋىل مەديتسيناسىنىڭ ينفراقۇرىلىمىن جاڭارتۋعا, جوعىن تۇگەندەۋگە, جالاقىنى كوتەرۋگە دەن قويىلسا, وتكەن اپتادا دارىگەردىڭ مارتەبەسىن بيىكتەتەتىن تاعى ءبىر زاڭ جوباسىن ءماجىلىس دەپۋتاتتارى قابىلداپ, سەناتقا جولدادى.
سونىمەن ءماجىلىس سپيكەرى ەرلان قوشانوۆتىڭ توراعالىعىمەن وتكەن پالاتانىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنساۋلىق ساقتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ» تۋرالى زاڭ جوباسى قارالدى. قۇجاتتا اۋەلى مەديتسينا قىزمەتكەرلەرىنىڭ كاسىبي جاۋاپكەرشىلىگى ساقتاندىرىلاتىنى كورسەتىلگەن. بۇل رەتتە مەديتسينالىق ۇيىمداردىڭ ارقايسىسى ساقتاندىرۋ كومپانياسىمەن شارت جاساسۋى كەرەك. ەستە بولسا, بىلتىر مەديتسينا ماماندارىمەن ارازداسىپ, ءتىپتى جاعادان العان ازاماتتاردىڭ ارەكەتى الەۋمەتتىك جەلىدە تارادى. ەندى وسىنداي نەمەسە وسىعان ۇقساس كەلەڭسىز جاعدايلاردا ساقتاندىرۋدىڭ كومەگى تيەدى. سونداي-اق زاڭ جوباسى شەڭبەرىندە مەديتسينا ماماندارىنىڭ قۇقىعىن قورعاۋ كۇشەيتىلىپ, جاڭا الەۋمەتتىك كەپىلدىكتەر ەنگىزىلەتىنىن بىلدىك. ماجىلىستە زاڭ جوباسى تۋرالى بايانداما جاساعان دەپۋتات گۇلدارا نۇرىموۆا ۇسىنىلعان وزگەرىستەر مەن تولىقتىرۋلاردىڭ ارتىقشىلىعى تۋرالى حابارلادى. سونىمەن قۇجاتتا «قازاقستاننىڭ ەڭبەك سىڭىرگەن دارىگەرى» قۇرمەتتى اتاعىنا ۇسىنىلعان سالا مايتالماندارىنا 1 000 اەك كولەمىندە بىرجولعى تولەم تولەنەتىنى كورسەتىلىپتى. بۇعان قوسا رەسپۋبليكا كولەمىندە جىل سايىن «ماماندىق ۇزدىگى» دەگەن اتاۋمەن بايقاۋ وتكىزىلىپ, ونىڭ جەڭىمپازىنا 500 اەك كولەمىندە تولەم تابىستالۋى مۇمكىن. شىن مانىندە, مۇنىڭ ءوزى – جۇمىسىنا تياناقتى, ءىسىن جەتىك بىلەتىن مەديتسينا سالاسىنىڭ بىلگىرلەرىنە ۇلكەن قولداۋ. الدىڭعى اعا بۋىن دارىگەرلەردىڭ ىزىمەن سالانىڭ ۇزدىگى اتانۋعا ۇمتىلعان جاستاردى ىنتالاندىرۋدىڭ تاعى ءبىر ءتيىمدى تەتىگى.
ۇسىنىلعان زاڭ جوباسىندا اۋىلعا جۇمىس ىستەۋگە كەلەتىن مەديتسينا قىزمەتكەرىنە 100 ەڭ تومەنگى جالاقى مولشەرىندە بىرجولعى اقشالاي تولەم تولەۋ جوسپارلانعان. مۇنى بيىلعى ەڭ تومەنگى جالاقىعا شاققاندا 9 ملن تەڭگەگە جەتەعابىل بولادى ەكەن. ياعني ەڭ تومەنگى جالاقى وسسە, تولەم مولشەرى دە وسەدى. قالادا دارىگەرلەرگە مۇمكىندىك مول, ەڭبەكتەنسە, تالپىنسا, كوبىرەك قاراجات تابۋعا جول اشىق. جوعارى جالاقى ۇسىناتىن جەكە كلينيكالار بار. سوندىقتان ءبىر رەتتىك تولەم نارىق زامانىندا اۋىلدا ەڭبەك ەتۋدى جوسپارلاپ جۇرگەن دارىگەرلەردى ىنتالاندىرۋدىڭ ءىس جۇزىندە ءتيىمدى تەتىگى بولادى دەپ ۇمىتتەنەمىز. ءماجىلىس دەپۋتاتى اسحات ايماعامبەتوۆ تە قابىلدانعان زاڭنىڭ وسى تارماعىنا قاتىستى پىكىر ءبىلدىرىپ, ءۇن قوسقان ەدى.
«اۋىلداعى دارىگەر جەتىسپەۋشىلىگى ماسەلەسىن شەشۋگە كەلگەندە «Amanat» پارتياسىنىڭ بەرگەن ۋادەسىن ورىندادىق. ەندى اۋىلعا باراتىن دارىگەرلەر 9 ملن تەڭگەگە جۋىق ءبىر رەتتىك كوتەرمەاقى الادى. بۇل اۋىلداعى دارىگەر تاپشىلىعىن شەشۋدە ماڭىزدى ءرول اتقارادى.
مۇندا دارىگەرلەرگە قويىلاتىن شارت بار. ول سول اۋىلدا كەمى 5 جىل جۇمىس ىستەۋى كەرەك بولادى. ويتكەنى بىزدە باستى ماسەلە – اۋىلعا مىقتى مامانداردى تارتۋ, ىنتالاندىرۋ. نەگىزى قازىردىڭ وزىندە دارىگەر ماماندىق بويىنشا 3 جىل جۇمىس ىستەۋى كەرەك دەگەن تالاپ بار. ەندى اۋىلعا بارىپ, ءبىر رەتتىك كوتەرمەاقى العان دارىگەر ەڭبەكتەنىپ, سوندا ورنىعىپ كەتەدى دەپ ويلايمىز», دەدى ا.ايماعامبەتوۆ.
قازىر ۇكىمەت اۋىل مەديتسيناسىن جوسپارلى دامىتۋعا كوپ كوڭىل ءبولىپ وتىر. مەملەكەت باسشىسى بالالار مەن اۋىل تۇرعىندارىنىڭ اراسىندا اۋرۋلاردى مەيلىنشە ەرتە انىقتاۋعا كۇش سالۋدى تاپسىردى. ءبىر عانا «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى شەڭبەرىندە 2025 جىلدىڭ سوڭىنا دەيىن 655 مەديتسينالىق-سانيتارلىق العاشقى كومەك وبەكتىسى سالىنىپ, 32 زاماناۋي كوپبەيىندى اۋداندىق ورتالىق اۋرۋحانا ۇيىمداستىرىلادى ەكەن. اۋىلدىق ەلدى مەكەندەرگە بارعان ديپلومى بار مەديتسينا ماماندارىن بەكىتۋدى ىنتالاندىرۋ ماقساتىندا اكىمدىكتەر الەۋمەتتىك قولداۋعا قاراجات بولەدى. راسىندا, اۋىلداعى دارىگەرلەردى الەۋمەتتىك قولداۋ تەتىكتەرى كوپ بولعانى دۇرىس. ءتۇرلى تالاپقا سايكەس دارىگەر الەۋمەتتىك تولەمنىڭ بىرىنە ىلىكپەسە, ەكىنشىسىن پايدالانادى.
زاڭ جوباسى اياسىندا مەديتسينا ماماندارىنىڭ بالالارى بالاباقشاعا قابىلداناردا باسىمدىققا يە بولادى. سونىمەن قاتار ءوزىنىڭ مىندەتىن اتقارىپ ءجۇرىپ, وقىستان قايتىس بولعان مامانداردىڭ بالالارىن جانە مەديتسينا قىزمەتكەرلەرىنىڭ مۇگەدەكتىگى بار بالالارىن جوعارى وقۋ ورنىنا كونكۋرسسىز قابىلداۋ ۇسىنىلىپ وتىر. سول سەكىلدى مەديتسينا قىزمەتكەرلەرىنە مەرزىمدى اسكەري قىزمەتتى كەيىنگە قالدىرۋ قۇقىعى بەرلەدى. ءبىر سوزبەن ايتقاندا, ۇسىنىلعان ەرەجە-تالاپتىڭ بارلىعى مەديتسينا ماماندارىنىڭ مارتەبەسىن ارتتىرۋعا, اسىرەسە اۋىل مەديتسيناسىن وركەندەتۋگە نەگىز بولادى دەپ ۇمىتتەنەمىز.