«تاربيە تال بەسىكتەن» دەپ, ادام بويىنداعى قادىر-قاسيەتتى شارانا ءسابي ساتىنەن قالىپتاستىرۋ ادەبىن العا تارتقان حالىقتىڭ ءبىرى – قازاق حالقى. حالقىمىز ءوز كەزەگىندە بالا بويىنا ءتالىم-تاربيە قۇندىلىقتارىن جاستايىنان ءسىڭدىرۋ ارقىلى ۇلتىمىزدىڭ تۇتاستىعى مەن تەكتىلىگىن ساقتاي بىلگەن. قازاق حالقىندا «تاربيەسىز» دەگەن ءسوز ەڭ اۋىر ۇعىم بولىپ قابىلدانادى. وسى تۇستا الەمنىڭ ەكىنشى ۇستازى اتانعان ءابۋ-ناسىر ءال-فارابي بابامىزدىڭ دا تاربيەسىز بەرىلگەن ءبىلىمنىڭ ادام بالاسى ءۇشىن قايىرىمسىز ەكەنىن العا تارتىپ وتكەنى ەرىكسىز ويعا ورالادى.
قازىرگى جاھاندانۋ ءۇردىسىن ءجىتى باقىلاپ وتىرعان مەملەكەت باسشىسى ق.ك. توقاەۆتىڭ تىكەلەي قولعا الۋىمەن جاڭا قازاقستاننىڭ جارقىن بولاشاعىن جالىندى جاستاردىڭ ۇلەس سالماعىمەن قۇرۋ ءۇشىن ناقتى قادامدار مەن كەشەندى باعدارلامالار جۇزەگە اسىرىلۋدا. پرەزيدەنتىمىز قاسىم-جومارت كەمەل ۇلى حالىققا ارناعان ءار جولداۋىندا, ۇكىمەتتىڭ كەڭەيتىلگەن وتىرىستارىندا, كەزدەسۋلەردە جاستار تاربيەسىن جۇيەلەۋ, ءبىلىم بەرۋدىڭ الەمدىك ستاندارتتارىن قامتۋ, ولاردى ءبىلىم الۋمەن قاتار ەڭبەككە تارتۋ ماسەلەسىن العا تارتىپ, نازارىنان تىس قالدىرعان ەمەس. پرەزيدەنت 2024 جىلدىڭ 3 قاڭتارىندا قازاق ءباسپاسوزى «Egemen Qazaqstan» گازەتىنە بەرگەن اۋقىمدى سۇحباتىندا ءوز ءسوزىن قورىتىندىلاي كەلە: ء«بىز وزىق ويلى ۇلت رەتىندە تەك قانا العا قاراۋىمىز كەرەك» دەدى. بۇل قازاقستاندىقتار ءۇشىن ءاربىر ازامات ءوز ەلىنىڭ پاتريوتى رەتىندە ورتاق وتانىمىزدىڭ گۇلدەنۋىنە ءوز ۇلەسىن قوسۋى ءتيىس, ورتا, جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارى ءۇشىن تال شىبىقتاي بۋىنى قاتپاعان وسكەلەڭ جاستارعا تەرەڭ ءتالىم بەرۋدى جۇكتەيدى.
مەملەكەتىمىزدىڭ ستراتەگيالىق دامۋ جوسپارىن ساي, جاڭا 2024 جىلدىڭ العاشقى جۇمىس كۇنى قر عججب مينيسترلىگى جاستار تاربيەسىنە تىڭ وزگەرىستەر الىپ كەلەتىن, تالانتتى جاستارعا جاڭا مۇمكىندىكتەر بەرەتىن جاڭا ادىستەمەلىك نۇسقاۋلىقتاردى بەكىتتى. قازاقستان رەسپۋبليكاسىنىڭ عىلىم جانە جوعارى ءبىلىم ءمينيسترى س.نۇربەكتىڭ 2024 جىلعى 4 قاڭتارداعى №2 بۇيرىعىمەن بەكىتىلگەن «جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ ءبىلىم الۋشىلارىنىڭ ينتەگرالدىق, ونىڭ ىشىندە الەۋمەتتىك GPA ەنگىزۋ بويىنشا ادىستەمەلىك ۇسىنىمداردى بەكىتۋ تۋرالى» ادىستەمەلىك نۇسقاۋلىق ەلىمىزدەگى جوو-ندا ءبىلىم الىپ جاتقان بەلسەندى جانە تالانتتى جاستاردىڭ الەۋمەتتىك دارەجەسىن ايقىندايتىن ماڭىزدى قۇجات بولىپ تابىلادى.
اتالمىش نۇسقاۋلىق قازاقستاننىڭ ءبىلىم بەرۋ جۇيەسىنە وڭ اسەر ەتىپ, جاستاردىڭ ساباقتان بوس ۋاقىتىندا عىلىممەن, ونەرمەن, سپورتپەن اينالىسىپ, ءتۇرلى قوعامدىق جۇمىستارعا بەلسەنە ارالاسۋىنا جول اشادى. ساباقتان بوس ۋاقىتىندا وسى ماقساتتا ەڭبەك ەتىپ, ناتيجە كورسەتكەن جاستاردىڭ اكادەميالىق ۆەدومستارىنا اكادەميالىق GPA بالدارىنان بولەك, الەۋمەتتىك GPA بالل قويىلاتىن بولادى. الەۋمەتتىك GPA بالل ستۋدەنتتىڭ بويىنداعى تابيعي دارىنى مەن تالانتىن باعالاۋشى كورسەتكىش رەتىندە ءبىلىم الۋشىنىڭ اكادەميالىق ۆەدومستارىنا جانە ديپلومىنا جازىلاتىن بولادى. بۇل باعالاۋ ءۇردىسى ەلىمىزدىڭ ءبىلىم بەرۋ جۇيەسىنە ەنىپ وتىرعان جاڭا باعالاۋ ءۇردىسى رەتىندە جۇمابەك تاشەنەۆ اتىنداعى ۋنيۆەرسيتەتتە كافەدرا ماجىلىستەرىندە, فاكۋلتەت كەڭەستەرىندە جانە عىلىمي كەڭەس وتىرىسىندا كەڭىنەن تانىستىرىلدى. ۋنيۆەرسيتەتىمىزدىڭ ءبىلىم الۋشى جاستارى مەن ستۋدەنتتىك ءوزىن-ءوزى باسقارۋ قۇرامىنىڭ مۇشەلەرى جاڭا باعالاۋ جۇيەسىن ەرەكشە قۋانىشپەن قابىلدادى. «ەل ءىشى ونەر كەنىشى» دەگەندەي, جوعارى وقۋ ورىندارىنىڭ قابىرعاسىندا تالانتتى دا دارىندى جاستار جەتەرلىك. بۇل جاڭا جۇيە تابيعي دارىنى بار تالانتتى جاستاردىڭ تەز تانىلىپ, ەلىمىزگە قىزمەت ەتەتىن تانىمال تۇلعالارعا اينالۋىنا ءوز سەپتىگىن تيگىزەتىن تىڭ وزگەرىستەردىڭ ءبىرى بولىپ وتىر.
ءبىلىم الۋشىلار ءۇشىن تاعى ءبىر قۋانارلىق ءجايت, سالالىق مينيسترلىك جاستاردى مەملەكەت تاراپىنان قولداۋ ماقساتىندا جوعارى وقۋ ورىندارىنداعى وليمپيادالىق سپورت تۇرلەرىمەن اينالىساتىن ستۋدەنتتىك كوماندالاردىڭ ءتىزىمىن الۋدا. بۇل دەگەنىمىز, ءتۇرلى سپورتتىق جارىستارعا كەتەتىن ءىس-ساپار, جول-قاراجات شىعىندارى سياقتى قوردالانعان ماسەلەلەردىڭ ءتۇيىنى شەشىلەدى دەگەن ءۇمىتىمىزدى ارتتىرىپ وتىر.
بۇگىنگى تاڭدا 35 ءبىلىم بەرۋ باعدارلاماسى بويىنشا باكالاۆريات, 8 ءبىلىم بەرۋ باعدارلاماسى بويىنشا ماگيستراتۋرا باعىتىندا ماماندار دايىنداپ وتىرعان ۋنيۆەرسيتەتىمىزدىڭ باستى ميسسياسى – ءبىلىم الۋشىلاردىڭ قاجەتتىلىكتەرىن بارىنشا قاناعاتتاندىرۋعا بەيىمدەلۋ. ۋنيۆەرسيتەتتىڭ نەگىزىن قالاۋشى, ديرەكتورلار كەڭەسىنىڭ توراعاسى, قر ۇعا اكادەميگى, پ.ع.د., پروفەسسور وڭالباي اياشەۆتىڭ: «ۋنيۆەرسيتەتتە اكادەميالىق ادالدىق ەرەجەلەرى بارىنشا ساقتالۋى ءتيىس. ستۋدەنتتەرگە ۋنيۆەرسيتەت اكىمشىلىگى جانە پروفەسسور-وقىتۋشىلار قۇرامى ايرىقشا قامقورلىق تانىتۋى كەرەك. ستۋدەنت ۋنيۆەرسيتەتتەگى باستى تۇلعاعا اينالۋى قاجەت. سوندا عانا ۋنيۆەرسيتەتتىڭ ءيميدجى قالىپتاسادى» دەگەن ۇستانىمى ءبىلىم بەرۋ ۇيىمىنىڭ باستى قاعيداسىنا اينالعان.
بيتۇرسىن عالىمجان ءشامشىدىن ۇلى,
ج.ا. تاشەنەۆ ۋنيۆەرسيتەتىنىڭ الەۋمەتتىك جانە تاربيە ىسىتەرى جونىندەگى پرورەكتورى,
ۇلتتىق زاڭ اكادەمياسىنىڭ كوررەسپوندەنت مۇشەسى