شىعىس قازاقستان وبلىسى توتەنشە جاعدايلار دەپارتامەنتى كۇرشىم اۋدانىندا اداسىپ كەتكەن ادامنىڭ دەنەسىن تاپتى. 23 قاڭتار كۇنى ەكى ادامنىڭ بوراندا اداسىپ قالعانى حابارلانعان ەدى, دەپ جازادى Egemen.kz.
بوراندا باعىتتى باعامداي الماعان ادام سول كۇنى دەنەسىن ۇسىك شالعان اۋىر حالدە تابىلدى. ونى سانيتارلىق اۆياتسيا وسكەمەندەگى وبلىستىق مامانداندىرىلعان مەديتسينالىق ورتالىققا جەتكىزگەن.
ال ەكىنشى ادامدى ىزدەۋ-قۇتقارۋ جۇمىسى 3 كۇنگە سوزىلدى. بۇگىن ونىڭ دەنەسى تابىلدى.
قالىڭ قار سالدارىنان ىزدەۋ جۇمىسىن جۇرگىزۋ قيىنعا سوققان.
«ىزدەۋگە قۇتقارۋشىلار, پوليتسەيلەر مەن جەر جاعدايىن جاقسى بىلەتىن اۋدان تۇرعاندىرى تارتىلدى. ىزدەۋ جۇمىستارى شانا, شاڭعى جانە اتپەن جۇرگىزىلدى. وسىلايشا بۇگىن ەر ادامنىڭ دەنەسى تابىلدى. وقيعانىڭ بارلىق ءمان-جايى انىقتالىپ جاتىر», دەپ جازدى شقو پوليتسيا دەپارتامەنتىنىڭ ءباسپاسوز قىزمەتى.