ساتباەۆ قالاسىنداعى ق.ساتباەۆ اتىنداعى ورتا مەكتەپتىڭ بۇرىنعى ديرەكتورىن زەينەت دەمالىسىنا شىعارىپ سالۋ سالتاناتى جاڭا ديرەكتور تاعايىنداۋ راسىمىنە ۇلاستى.
ەل پرەزيدەنتىنىڭ ء«بىلىم سالاسىندا جاڭا فورماتتى مەنەدجەرلەر دايارلاۋ تۋرالى» تاپسىرماسىنا سايكەس, وقۋ-اعارتۋ مينيسترلىگى «جاڭا وزگەرىستەردىڭ 1000 كوشباسشىسى» دەپ اتالاتىن جوبا جاريالاعان ەدى. رەسپۋبليكا بويىنشا بۇل جوباعا 8 مىڭنىڭ ۇستىندە ۇمىتكەر قاتىسىپ, سونىڭ 208-ءى جەڭىمپاز اتاندى. ەڭبەك جولىن 2010 جىلى باستاۋىش سىنىپ مۇعالىمى بولىپ باستاپ, 2022-2023 جىلدارى ق.ساتباەۆ اتىنداعى مەكتەپ ديرەكتورىنىڭ وقۋ-تاربيە ءىسى جونىندەگى ورىنباسارى بولىپ ىستەگەن ورىنكۇل ماحمەتوۆا بەس كەزەڭنەن وتكەن سىناقتىڭ ناتيجەسىندە ءبىلىم بەرۋ ۇيىمدارىنىڭ باسشىسى بولۋعا لايىقتىلاردىڭ قاتارىنان تابىلدى.
– «جاڭا وزگەرىستەردىڭ 1000 كوشباسشىسى» دەپ اتالاتىن جوبا جاريالاعاندا ماعان مەكتەپ باسشىسى امانكۇل تىلەمىسوۆا سوعان قاتىسۋعا كەڭەس بەردى. ارينە, سول كەزدە جوبا سىناقتارىن ءساتتى تاپسىرىپ, امانكۇل تولەۋبايقىزى زەينەتكەرلىككە شىققاندا ول كىسىنىڭ ورنىنا ديرەكتور بولىپ كەلەمىن دەپ ويلاعانىم جوق, – دەيدى كەشەگى باسشىسىنىڭ ورنىنا تاعايىندالعان ورىنكۇل تولقىنىسىن جاسىرا الماي.
جاڭاشا تاعايىنداۋدىڭ ءمانىن ۇلىتاۋ وبلىستىق ءبىلىم باسقارماسىنىڭ باسشىسى ساپۋرا تولەكوۆا ءتۇسىندىرىپ بەردى. «مەكتەپتىڭ بۇرىنعى باسشىسى كۇنى كەشە عانا زەينەت جاسىنا تولدى. ءبىز قالىپتاسقان ءتارتىپ بويىنشا ديرەكتوردىڭ مىندەتىن اتقارۋشى تاعايىنداپ, كونكۋرس جاريالايمىز دەگەن ويدا بولعان ەدىك. ءسويتىپ تۇرعاندا, مينيسترلىكتەن جوبا جەڭىمپازدارى بەكىتىلگەن ءتىزىم كەلدى. جەڭىمپازداردىڭ ءبىرى ورىنكۇل دۋمانبەكقىزىمەن اڭگىمەلەستىك. ول كەلىسىم بەردى. ءسويتىپ, العاش رەت وبلىستا, بالكىم رەسپۋبليكادا ەڭ ءبىرىنشى بولىپ رەسپۋبليكالىق كادر رەزەرۆىنە قابىلدانعان ۇمىتكەرلەردىڭ اراسىنان مەكتەپ ديرەكتورى تاعايىندالدى», دەدى ول.
بۇل تاعايىنداۋ ەلىمىزدە جۇرگىزىلىپ جاتقان رەفورمالاردىڭ قوعامنىڭ ءار سالاسىن قامتىپ, تەرەڭدەي تۇسكەنىن ايعاقتايدى.
ۇلىتاۋ وبلىسى,
ساتباەۆ قالاسى