قايتا تۇرلەنگەن «ءبىرجان – سارا»

ساحناعا ء«بىرجان – سارا» وپەراسىنىڭ شىعۋى ونەر سۇيەر قاۋىم ءۇشىن عانا ەمەس, «استانا وپەرا» ارتىستەرى ءۇشىن دە ايتۋلى وقيعا. ءبىرىن-ءبىرى ۇناتقان قوس اقىن ءبىرجان مەن سارانىڭ حيكايا­سى قازىر دە وزەكتىلىگىن جوعالتقان جوق. سوندىقتان بولسا كەرەك, ۇلتتىق كلاسسيكامىزدىڭ ۇلى تا­قىرىبى وپەرا تەاترلارى رەپەر­تۋارىندا زور ماڭىزعا يە. ۋاقىت­پەن بىرگە جاڭارىپ, جاسارىپ كەلە جاتقان جاۋھارىمىزدىڭ بۇل ساحنالانۋىندا دا جاڭالىق كوپ. ءبىز تاماشالاعان قويىلىمدا كەيىپ­كەرلەردىڭ بەينەسى جاڭاشا قۇرىلىپ, قازاق كلاسسيكاسى باسقا قىرىنان بەرىلدى. وپەرادا قول­دانىلعان 3D-تەحنولوگيا, يتاليا­لىق مامان سەردجيو مەتال­ليدىڭ بەينەپروەكتسيالارى شىن مانىندە ۇلتتىق جاۋھارىمىزدىڭ شىرايى­ن اشقان ءساتتى شەشىمدەر بولعانى انىق.

قازاق وپەراسىنىڭ زور جەتىس­تىگىنە اينالعان سپەكتاكلدە «اس­تانا وپەرانىڭ» تالانتتى سو­ليستەرى ساحناعا شىقتى. ءبىرجان پارتياسىن قازاقستاننىڭ ەڭبەك سىڭىر­گەن قايراتكەرى مەيىر باي­نەش پەن بەيىمبەت تاڭارىقوۆ ورىن­دادى, ال سارانىڭ ءرولىن قا­زاق­ستاننىڭ ەڭبەك سىڭىرگەن قاي­راتكەرلەرى بيبىگۇل جانۇزاق پەن ايگۇل نيازوۆا سومدادى. ەكى كەش بويى ەلوردالىقتاردى ەرەكشە اسەرگە بولەگەن قويىلىمدا سونىمەن قاتار تەاتردىڭ «جاسارعان» جاڭا قۇرامى دەبيۋتتەرىمەن ءتانتى ەتتى. اتاپ ايتساق, قالىڭ كو­رەرمەن التىناي بەينەسىندە ال­عاش شىققان ۇلپان اۋباكىروۆا ونەرىن زور قوشەمەتپەن قارسى الدى. «دارىن» مەملەكەتتىك جاس­تار سىيلىعىنىڭ لاۋرەاتى التىنبەك ءابىلدا (جيەنقۇل), ۆالە­ري سەليۆانوۆ (قوجاعۇل), مە­رەي قادىرحانوۆ (سەرىك) تا وسى وپە­راداعى پارتيالاردى تۇڭعىش رەت ورىندادى.

– بىرجانعا بالا كەزدەن عاشىق التىناي سارانى وزىنە باقتالاس كورىپ, قىزعانىشتان قياناتقا باس تىگەدى. جاۋاپسىز ماحاببات قىزدى كور سوقىر ەتىپ, ونىڭ جۇرەگىنە زۇ­لىمدىق ۇيالاتادى. التىناي وپە­رادا جاعىمسىز كەيىپكەر رەتىن­دە كورسەتىلسە دە, مەن ءۇشىن ول مەيى­رىمدى قىز, تەك ءبىرجاندى وزىنە قا­راتا الماعاندىقتان اشۋعا بوي الدىرادى. وسى جاۋاپسىز ماحابباتى ونى تەرىس امالدار جاساۋعا يتەرمەلەيدى. سەزىم سەرگەلدەڭىنىڭ سوڭى قايعىلى جاعدايعا ۇلاسادى. التىناي قانشا جەردەن قاتىگەز كورىنگەنىمەن, مەن كەيىپكەرىمنىڭ ارە­كەتىن بارىنشا اقتاپ الۋ­عا, جاقسى قاسيەتتەرىن باسا كورسە­تۋگە تىرىستىم, دەگەن ۇلپان اۋ­­باكىروۆا پىكىرىن ارىپتەسى, ءبىر­جاننىڭ اكەسى قوجاعۇلدىڭ پار­تياسىندا شىققان تەاتر ءارتىسى ۆا­لە­ري سەليۆانوۆ: – قوجاعۇل كىشىگىرىم ءرول بولعانىمەن, مەن ءۇشىن ماڭىزدى دەبيۋت بولعانى انىق. كەيىپكەرىم ۇلىنا ءاردايىم قامقور بولىپ, ونى ۋايىمداپ جۇرەدى. سەبەبى مولدالار وعان بيلىكپەن قاقتىعىس بولۋ قاۋپىن ەسكەرتەدى. ال اكەسىمەن سا­لىس­تىرعاندا بۇل جاعدايعا ءبىرجان بەي­قام. وسى ءرولىم ارقىلى اكە مەن بالا اراسىنداعى قارىم-قا­تىناستى بارىنشا جان-جاقتى جەت­كىزۋگە تىرىستىم, دەيدى سوليست.

ال جيەنقۇلدىڭ پارتيا­سىندا دەبيۋت جاساعان تەاتر ءسو­ليسى التىنبەك ءابىلدانىڭ ايتۋىنشا, بۇل ءرول – ونىڭ ۇلتتىق رەپەرتۋارداعى جاعىمسىز كەيىپ­كەردى ەكىنشى رەت ورىنداۋى. بۇعان دەيىن ءانشى ا.جۇبانوۆ پەن ل.ءحاميديدىڭ «اباي» وپەرا­سىنداعى جيرەنشە ءبيدىڭ رولىندە ساحناعا شىققان.

– جيەنقۇل اقىن سارانى وزىنە كۇشتەپ ءتورتىنشى ايەل قى­لىپ العىسى كەلەدى. جاعىمسىز كەيىپكەر بولعاندىقتان بەينەمەن كوپ جۇمىس ىستەۋىمە تۋرا كەلدى. ءرو­لىمنىڭ ۆوكالدىق-تەحنيكالىق جاعىنان دياپازونى وتە كەڭ. تو­مەنگى نوتالار كوپ كەزدەسەدى. سون­دىقتان دىبىستاردىڭ ەستىلۋىنە ءمان بەرىپ, مۋزىكالىق فرازالارمەن تىڭعىلىقتى جۇمىس ىستەدىم. سەبەبى بۇل بەينەنىڭ بولمىسىن شىنايى اشۋ ءۇشىن داۋىستى دىبىستاردى انىق ايتۋ وتە ماڭىزدى, – دەدى ءارتىس.

مۇقان تولەباەۆتىڭ ء«بىرجان – سارا» وپەراسىنا ەكى جىلدان كەيىن سەكسەن جىل تولادى. 2013 جىلى «استانا وپەرا» تەاترى ۇلت­تىق كلاسسيكانىڭ التىن قورىنداعى ءدال وسى جاۋھار­مەن اشىلعان بولاتىن. بىرنەشە جىل سپەكتاكل رەسەيدىڭ حالىق ءارتىسى, قازاقستاننىڭ مەم­لەكەتتىك سىيلىعىنىڭ لاۋ­رەاتى يۋري الەكساندروۆتىڭ قويى­لىمىندا ءجۇرىپ كەلدى. ايتۋلى تۋىن­دى 2014 جىلى سانكت-پە­تەر­بۋرگ قالاسىنداعى اتاقتى ما­ريا تەاترىنىڭ ساحناسىندا كور­سەتىلىپ, كورەرمەننىڭ زور قوشە­مەتىنە يە بولدى. ال 2018 جىلى ەلوردالىق تەاتر ء«بىرجان – سارا» وپەراسىن قازاقستاننىڭ ەڭ­بەك سىڭىر­گەن قايراتكەرى اسحات ماە­مي­روۆ پەن كەڭەسشى رەجيسسەر مي­حايل پاندجاۆيدزەنىڭ زاماناۋي كوزقاراستا ساراپتالعان جاڭا مۋزىكالىق-ساحنالىق رەداكتسياسىمەن كورەرمەن نازارىنا ۇسىندى. ەكى قويىلىمنىڭ دا قويۋشى ديريجەرى رەتىندە قازاقستاننىڭ ەڭبەك سىڭىر­گەن قاي­راتكەرى, مۋزىكالىق رەداك­­تسيالاردىڭ اۆتورى ابزال مۇحيت­دين تەر توكتى. جاڭاشىل كوزقاراستا ۇسىنىلعان ۇلتتىق قويىلىم كورەر­مەن قۇرمەتىنە بولەندى.