بۇگىن استانادا پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا بىلتىر اتقارىلعان جۇمىستى قورىتىندىلاپ, 2024 جىلعا ارنالعان ماقسات-مىندەت ايقىندالدى, دەپ جازادى Egemen.kz مادەنيەت جانە اقپارات مينيسترلىگىنىڭ ءباسپاسوز قىزمەتىنە سىلتەمە جاساپ.
پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ توراعاسى ايدا بالاەۆا مەملەكەت باسشىسى قول قويعان جارلىققا سايكەس كوميسسيا مۇشەلەرىن روتاتسيالاۋ جۇرگىزىلگەنىن ايتتى.
«2023 جىل كوميسسيا قىزمەتى ءۇشىن تابىستى, ناتيجەلى بولدى. مەملەكەت باسشىسى اتاپ وتكەن باسىمدىقتارعا سايكەس ۇلتتىق كوميسسيانىڭ وتكەن جىلعى قىزمەتى ايەلدەر مەن بالالاردىڭ قۇقىقتارىن قورعاۋ سالاسىنداعى وزەكتى ماسەلەلەردى زەردەلەۋگە باسا ءمان بەرىپ, بيلىك پەن ازاماتتىق قوعام جانە حالىقارالىق ۇيىمدار اراسىنداعى سۇرانىسقا يە ديالوگ الاڭىنا اينالدى», دەدى ا.بالاەۆا.
«مەملەكەت باسشىسى ايتقان باسىمدىقتاردى ەسكەرە وتىرىپ, ۇلتتىق كوميسسيا وتباسىلىق-دەموگرافيالىق جانە گەندەرلىك ساياسات, ايەلدەر مەن بالالاردىڭ قۇقىقتارىن قورعاۋ سالاسىنداعى مىندەتتەردى جۇيەلى تۇردە جۇزەگە اسىرۋدا. ءسوز سوڭىندا ايدا بالاەۆا ۇلتتىق كوميسسيا جۇمىسىنىڭ الداعى كۇن ءتارتىبىن بەلگىلەدى. مينيستر بيىلعا ارنالعان بىرقاتار نەگىزگى باسىمدىق قۇقىقتىق مادەنيەتتى جانە زاڭ بۇزۋشىلارعا قارسى كوزقاراستى قالىپتاستىرۋ, ءتۇرلى ماقساتتى توپتارمەن قوعامدىق تالقىلاۋدى دامىتۋ, ادامگەرشىلىك جانە وتباسىلىق قۇندىلىقتاردى نىعايتۋ, ايەلدەردىڭ قۇقىقتارى مەن مۇمكىندىكتەرىن كەڭەيتۋ جونىندەگى مىندەتتەردى اتادى», دەلىنگەن اقپاراتتا.