بۇگىن استانادا مەملەكەت باسشىسى قاسىم-جومارت توقاەۆتىڭ قاتىسۋىمەن ىشكى ىستەر مينيسترلىگىنىڭ كەڭەيتىلگەن القا وتىرىسى ءوتتى, دەپ حابارلايدى Egemen.kz اقورداعا سىلتەمە جاساپ.
مەملەكەت باسشىسىنىڭ ءوزى توراعالىق ەتكەن القا وتىرىسىندا حالىقتىڭ قۇقىقتىق ساۋاتىن ارتتىرۋعا كۇش سالۋ قاجەتتىگىن ەسكەرتتى. پرەزيدەنت قۇقىقتىق ساۋاتتىڭ تومەن بولۋى جاعىمسىز ۇردىستەردىڭ بەلەڭ الۋىنا اكەپ سوقتىراتىنىن اتاپ ءوتتى.
«ونىڭ ءبارى, تۇپتەپ كەلگەندە, ەلىمىزدىڭ دامۋىن تەجەيدى, مەملەكەتتىڭ ابىرويىنا نۇقسان كەلتىرەدى. قوعامدىق جەرلەردەگى ۆانداليزم – سونىڭ ايقىن كورىنىسى. حالقىمىزدىڭ دۇنيەتانىمىنا جات يدەولوگيا دا ەلىمىزگە زور قاۋىپ توندىرەدى. اسىرەسە, جاس ۇرپاق جاساندى يدەيالار مەن «جالعان باتىرلاردىڭ» جەتەگىنە ىلەسىپ كەتۋى مۇمكىن. الەۋمەتتىك جەلىدە جاستاردى زاڭسىز ءىس-ارەكەت جاساۋعا شاقىراتىن ماتەريالدار تارالۋدا. ءتىپتى, زاڭ بۇزعان ادامداردى ۇلگى ەتىپ كورسەتەتىندەر بار. ءبىزدىڭ ازاماتتارىمىز كەز كەلگەن زاڭسىزدىققا قارسى بولۋى كەرەك, ياعني بىزگە زاڭ بۇزۋشىلىققا توتەپ بەرەتىن مىقتى يممۋنيتەت قاجەت. ەل ىشىنە ىرىتكى سالاتىن, قاۋىپ توندىرەتىن ارەكەتتەردى اقتاۋعا قاتاڭ توسقاۋىل قويۋ كەرەك. قۇقىقتىق نيگيليزمگە, ياعني زاڭ ۇستەمدىگىن جوققا شىعارۋعا جول بەرىلمەۋگە ءتيىس. زاڭعا دەگەن قۇرمەت ادال ازاماتقا ءتان قاسيەتتىڭ ءبىرى رەتىندە دارىپتەلۋى قاجەت. بۇل – مەملەكەتتىك ورگاندارعا عانا ەمەس, بارشا حالىققا ورتاق مىندەت. قىسقاسى, زاڭ مەن ءتارتىپتىڭ ۇستەمدىگىن قامتاماسىز ەتۋ – ادىلەتتى قازاقستاندى قۇرۋدىڭ باستى شارتى», دەدى قاسىم-جومارت كەمەل ۇلى.