قازاق-قىتاي عالىمدارى شەگىرتكەمەن كۇرەستىڭ جاڭا ءادىسىن ۇسىندى

تۇركىستان وبلىسىندا ماروككو شەگىرتكەسىنە قارسى جاڭا بۋىنداعى بيولوگيالىق پرەپاراتتىڭ دالالىق سىناقتارى ءساتتى اياقتالدى. زەرتتەۋ ناتيجەلەرى ەنتوموپاتوگەندى Metarhizium anisopliae ساڭىراۋقۇلاعى نەگىزىندە ازىرلەنگەن ەكولوگيالىق قاۋىپسىز پرەپاراتتىڭ جوعارى ءتيىمدى ەكەنىن كورسەتتى.

جۇمىستار «شەكارالاس كوبەيۋ وشاقتارىنداعى شەگىرتكەلەرگە قارسى ساڭىراۋقۇلاق نەگىزىندەگى بيوپرەپاراتتاردى قولدانۋ تەحنولوگياسىن زەرتتەۋ جانە دەمونستراتسيالاۋ» اتتى حالىقارالىق جوبا اياسىندا جۇرگىزىلدى. زەرتتەۋگە ج. جيەمباەۆ اتىنداعى قازاق وسىمدىك قورعاۋ جانە كارانتين عىلىمي-زەرتتەۋ ينستيتۋتىنىڭ ماماندارى قىتاي اۋىل شارۋاشىلىعى عىلىمدارى اكادەمياسىنىڭ وسىمدىك قورعاۋ ينستيتۋتىنىڭ عالىمدارىمەن بىرلەسىپ قاتىستى.

قازاقستاندا شەگىرتكەگە قارسى 480 مىڭ گەكتارعا جۋىق جەر وڭدەلدى

دالالىق سىناقتار تۇركىستان وبلىسى قازىعۇرت اۋدانىنىڭ جايىلىمدىق القاپتارىندا وتكىزىلدى. بيولوگيالىق اگەنت رەتىندە Metarhizium anisopliae ساڭىراۋقۇلاعى نەگىزىندەگى پرەپارات قولدانىلدى. بۇل پرەپارات حيميالىق ينسەكتيتسيدتەردىڭ ءتيىمدى ءارى ەكولوگيالىق قاۋىپسىز بالاماسى رەتىندە باعالانۋدا.

تيىمدىلىكتى باعالاۋ ءۇشىن وڭدەلگەن شەگىرتكەلەر ارنايى دالالىق تورلارعا 20 داراقتان ورنالاستىرىلدى. سونىمەن قاتار وڭدەۋدەن كەيىن ءبىر تاۋلىك وتكەن سوڭ باقىلاۋ توپتارى قۇرىلدى. باقىلاۋ كەزەڭى بويى ماماندار زيانكەستەردىڭ قىرىلۋ كورسەتكىشتەرىن كۇن سايىن تىركەپ وتىردى.

جاندىكتەردىڭ زاقىمدانۋىنىڭ العاشقى بەلگىلەرى وڭدەۋدەن كەيىنگى ءۇشىنشى تاۋلىكتە بايقالدى. بەسىنشى تاۋلىكتە قىرىلۋ دەڭگەيى 70–80%-عا جەتىپ, توعىزىنشى تاۋلىكتە تاجىريبەلىك توپتارداعى بارلىق داراقتىڭ تولىق قىرىلعانى تىركەلدى.

ماروككو شەگىرتكەسى (Dociostaurus maroccanus) جايىلىمدار مەن اۋىل شارۋاشىلىعى داقىلدارىنا ەلەۋلى زيان كەلتىرۋگە قابىلەتتى, اسا قاۋىپتى شەگىرتكە زيانكەستەرىنىڭ ءبىرى بولىپ سانالادى. وسىعان بايلانىستى وسىمدىكتەردى قورعاۋدىڭ بيولوگيالىق ادىستەرىن دامىتۋ اگروونەركاسىپ كەشەنىن ەكولوگيالاندىرۋدىڭ نەگىزگى باعىتتارىنىڭ ءبىرى رەتىندە قاراستىرىلادى.

عالىمداردىڭ پىكىرىنشە, سىناق ناتيجەلەرى پرەپاراتتىڭ جوعارى بيولوگيالىق تيىمدىلىگىن جانە قورشاعان ورتاعا قوسىمشا حيميالىق جۇكتەمە تۇسىرمەي-اق شەگىرتكە زيانكەستەرىنىڭ سانىن رەتتەۋدە ەنتوموپاتوگەندى ساڭىراۋقۇلاقتاردى قولدانۋدىڭ كەلەشەگى زور ەكەنىن دالەلدەيدى.

الداعى ۋاقىتتا زەرتتەۋشىلەر سىناقتاردى قازاقستاننىڭ ءارتۇرلى كليماتتىق ايماقتارىندا كەڭەيتۋدى, سونداي-اق اتالعان تەحنولوگيانى شەگىرتكە زيانكەستەرىن مونيتورينگتەۋ جانە ولاردىڭ سانىن رەتتەۋ جۇيەسىنە ەنگىزۋ بويىنشا پراكتيكالىق ۇسىنىمدار ازىرلەۋدى جوسپارلاپ وتىر.