5 كۇندە – 1,2 مىڭ قۇقىق بۇزۋشىلىق

ونىڭ ىشىندە قوعامدىق ورىن­داردا ىشىمدىك ىشكەن نە­مەسە ماس كۇيدە جۇرگەن – 325, بوتەننىڭ مۇلكىنە قاسا­قا­نا زاقىم كەلتىرگەن – 2, بەل­گىلەن­بەگەن ورىنداردا تەمەكى شەككەن – 90, ۇساق بۇزاقىلىق جاسا­عان – 51, قوعامدىق ورىنداردى لاستاعان – 359, اۆتوبۋستاردا جانە ايالدامالاردا ادامدارعا تيىسكەن 431 ءتارتىپ بۇزۋشى بار.

مىسالى, ششۋچينسك جانە تاراز قالالارىندا ادامداردىڭ ەسكەرتۋلەرىن ەلەمەگەن ماس جولاۋشىلار ۇستالدى. ەر ادامدار ەكى جاعدايدا دا مارشرۋتتىق اۆتوبۋستاردا شۋ شىعارعان. ولاردىڭ ارقايسىسىنا قاتىستى قوعامدىق ورىنداردا ماس كۇيدە جۇرگەنى ءۇشىن اكىمشىلىك حاتتاما تولتىرىلدى.

سونداي-اق پاۆلودار وبلىسىندا ءتارتىپ ساقشىلارى اۆتوبۋس تەرەزەسىنەن قوقىس تاستاعان جولاۋشىنى جاۋاپقا تارتتى. قۇقىق بۇزۋشىعا قاتىستى جالپىعا ورتاق ورىنداردى لاستاعانى ءۇشىن اكىمشىلىك حاتتاما تولتىرىلدى. پوليتسيا قىزمەتكەرلەرى رەيد بارىسىندا قوعامدىق كولىكتىڭ جۇمىسىنا مىڭعا جۋىق جاسىرىن تەكسەرۋ جۇرگىزىپ, ناتيجەسىندە 337 بۇزۋشىلىقتى انىقتادى.

«ادامنان ايلا ارتىلمايدى» دەپ بەكەر ايتىلماسا كەرەك. اششى سۋ ءىشىپ, كولىككە وتىرۋدى اڭسايتىندار پوليتسياعا ۇستالىپ قالعان جاعدايدا جازادان جالتارۋدىڭ نەشە ءتۇرلى ايلا-شارعىلارىن ويلاپ تاۋىپ جاتىر. سونىڭ ءبىر كورىنىسى – جۇكتىلىك تۋرالى جانە كامەلەتكە تولماعان بالالارى بار ەكەندىگى تۋرالى جالعان انىقتامالاردى كورسەتۋ. مۇنداي جاعدايدا ادام قاماۋعا الىنبايدى.

باس پروكۋراتۋرانىڭ مالى­مەتىنشە, جەتىسۋ وبلىسىندا اكىمدىكتىڭ قىزمەتكەرى ماس كۇيدە كولىك ايداپ ۇستال­عان­نان كەيىن اۋداندىق سوتقا ءوزىنىڭ كامەلەتكە تولماعان بالاسى بار ەكەندىگىن راستايتىن انىقتاما ۇسىنعان. ال ءبىر ايەل ءوزىنىڭ جۇكتى ەكەنىن بىلدىرەتىن ۋلترادىبىستىق قورىتىندىنى كورسەتكەن. پرو­كۋراتۋرا قىزمەتكەرلەرى ەكى جاع­دايدى دا تەكسەرىپ, ازا­مات­تاردىڭ ۇسىنعان قۇجات­تا­رىن جوققا شىعاردى. «قازىرگى كۇنى ۋاكىلەتتى ورگاندار رەسمي قۇجاتتاردى قولدان جاساۋ فاكتىلەرى بويىنشا دا سوت­قا دەيىنگى تەرگەپ-تەكسەرۋ جۇ­مىستارىن باستادى», دەپ اتاپ ءوتتى وبلىس پروكۋرورى ماديار باسشىباەۆ.