تۋريزم جانە سپورت ءمينيسترى ەرمەك مارجىقپاەۆ باسكەتبول فەدەراتسياسىنىڭ باسشىلارى جانە جاتتىقتىرۋشىلار شتابىمەن كەزدەستى. جيىن بارىسىندا فەدەراتسيا وكىلدەرى باسكەتبولدان ۇلتتىق قۇرامالاردىڭ 2023 جىلعى ناتيجەلەرىن قورىتىندىلاپ, الداعى باسەكەلەرگە دايىندىق جوسپارى تانىستىرىلدى, دەپ حابارلايدى Egemen.kz مينيسترلىكتىڭ ءباسپاسوز قىزمەتىنە سىلتەمە جاساپ.
باسكەتبولدان قازاقستان قۇراماسى بىلتىر قىتايداعى ازيا ويىندارىندا جانكۇيەرلەردىڭ سەنىمىن اقتاي الماي, ۇزدىكتەر قاتارىنان كورىنە الماعان. سونىمەن قاتار ەرلەر اراسىنداعى 5ح5 قۇراماسى پاريج وليمپياداسىنا جولداما بەرەتىن ىرىكتەۋ جارىستارىندا ءساتسىز ناتيجە كورسەتىپ, جولدامادان قاعىلعان. ال 3ح3 باسكەتبولى بويىنشا ءالى ءبىر ىرىكتەۋ جارىسى بار. بيىلعا جوسپارلانعان وليمپيادالىق ىرىكتەۋ باسەكەسىندە ليتسەنزياعا توپ جارعان كوماندا عانا يەلىك ەتپەك.
باسكەتبول – الەمدەگى ەڭ تانىمال سپورت ءتۇرىنىڭ ءبىرى ەكەندىگىن, ەلىمىزدە 400 مىڭنان استام ادام وسى سپورت تۇرىمەن شۇعىلداناتىنىن, 16 وبلىستاعى بالالار مەن جاسوسپىرىمدەر سپورت مەكتەبىندە 156 بولىمشە جۇمىس ىستەيتىنىن ايتقان مينيستر ەرمەك مارجىقپاەۆ: «ستاتيستيكا بويىنشا باسكەتبولمەن اينالىسۋشىلار سانى جىل سايىن ارتىپ جاتقانىمەن, ۇلتتىق قۇرامانىڭ ناتيجەسى تومەندەپ بارادى. تاۋەلسىزدىك العاننان بەرى ازيا چەمپيوناتتارى ناتيجەلەرىنە كوز جۇگىرتەر بولساق, 5ح5 باسكەتبولدان ايەلدەر قۇراماسى ەشقاشان ۇزدىك 5 كوماندانىڭ قاتارىنا ەنبەگەن. ەرلەر اراسىنداعى 5ح5 باسكەتبولدان قازاقستان قۇراماسى بىردە-ءبىر رەت الەم چەمپيوناتىنا قاتىسا المادى. ازيا چەمپيوناتتارىنداعى ەڭ ۇزدىك ناتيجە – 4-ورىن. ونىڭ ءوزى 2007 جىلعى كورسەتكىش. ۇلتتىق قۇرامانىڭ ورتاشا جاسى – 33», دەدى.
جيىن بارىسىندا مينيستر باسكەتبول فەدەراتسياسى باسشىلىعىنا ۇلتتىق قۇرامالاردىڭ جاتتىقتىرۋشىلارىن قىسقا مەرزىمدە بەكىتۋدى, حالىقارالىق ۇيىمدارداعى وكىلدىكتى ۇلعايتۋ جانە حالىقارالىق دەڭگەيدەگى سپورت تورەشىلەرىن دايارلاۋ جونىندەگى جۇمىستى جانداندىرۋدى تاپسىردى. سونداي-اق ۇلتتىق قۇراما ويىنشىلارىنىڭ ورتاشا جاسىن تومەندەتىپ, سپورتشىلاردى دايارلاۋدا جاڭا ادىستەمەلىك تاسىلدەردى ەنگىزۋ مۇمكىندىگىن قاراستىرۋ قاجەت ەكەندىگىن مىندەتتەدى.