قىزىلوردا وبلىسى اكىمدىگىنە قاراستى ەكى باسقارمانىڭ لاۋازىمدى تۇلعالارى «پروكۋراتۋرا تۋرالى» كونستيتۋتسيالىق زاڭنىڭ تالاپتارىن بۇزعانى ءۇشىن اكىمشىلىك جاۋاپكەرشىلىككە تارتىلدى, دەپ حابارلايدى Egemen.kz.
وبلىس پروكۋراتۋراسى مال جايۋعا ارنالعان جايىلىمداردىڭ جەتىسپەۋشىلىگىنە تالداۋ جاساپ, ناتيجەسىندە مال سانىنىڭ ستاتيستيكاسىن قالىپتاستىرۋ بارىسىندا بۇزۋشىلىقتارعا جول بەرىلگەنىن انىقتادى.
«اتالعان دەرەك بويىنشا پروكۋراتۋرا وبلىستىڭ اۋىل شارۋاشىلىعى جانە جەر قاتىناستارى باسقارماسىنا ۇسىنۋ ەنگىزدى. دەگەنمەن وسى باسقارمانىڭ باسشىسىمەن قاداعالاۋ اكتىسىنە ۋاقتىلى جاۋاپ بەرىلمەگەندىكتەن, ول سوتپەن قر اقبتك-ءنىڭ 664-بابىمەن اكىمشىلىك ايىپپۇل تۇرىندەگى جاۋاپكەرشىلىككە تارتىلدى», دەلىنگەن حابارلامادا.
وزگە جاعدايدا قىزىلوردا وبلىسىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسى تابيعات قورعاۋ پروكۋراتۋراسىنىڭ تەكسەرۋگە قاجەتتى قۇجاتتاردى ۇسىنۋ تۋرالى تالابىنا نەمقۇرايدى قاراپ, پروكۋروردىڭ زاڭدى تالابىن ورىنداماعان.
اتالعان ارەكەت ءۇشىن باسشىسى سوت قاۋلىسىمەن قر اقبتك-ءنىڭ 665-بابىنىڭ 2-بولىگىمەن اكىمشىلىك جاۋاپكەرشىلىككە تارتىلىپ, وعان 172 مىڭ تەڭگە ايىپپۇل سالىندى.