120 جىل بۇرىن قازاقتىڭ ايگىلى سۋرەتشىسى, قازاق بەينەلەۋ ونەرىنىڭ نەگىزىن سالۋشىلاردىڭ ءبىرى, قازاق كسر حالىق سۋرەتشىسى, قازاق كسر-ءىڭ ەڭبەك سىڭىرگەن ونەر قايراتكەرى, ش.ءۋاليحانوۆ اتىنداعى مەملەكەتتىك سىيلىقتىڭ لاۋرەاتى ابىلحان قاستەەۆ دۇنيەگە كەلدى. تۋىپ-وسكەن جەرى – الماتى وبلىسىنا قاراستى جاركەنت توڭىرەگى. قازاقستاننىڭ حالىق سۋرەتشىسى (1944). قازاقستان سۋرەتشىلەر وداعى باسقارماسىنىڭ توراعاسى (1945-1956). ءابىلحان قاستەەۆ (1904 – 1973 جج.) حالىق ءومىرىنىڭ الۋان كورىنىستەرىن شىنايى بەينەلەگەن مىڭنان استام كوركەم تۋىندىلاردى دۇنيەگە كەلتىرگەن, دەپ حابارلايدى Egemen.kz.
سۋرەتشىنىڭ «ع.مۇراتباەۆ», «اباي», «ج.جاباەۆ», «ا.يمانوۆ», «ك.ازىرباەۆ» سياقتى پورترەتتىك تۋىندىلارى جوعارى تانىم-تالعامنىڭ ۇلگىسى. تاريحي تاقىرىپتاعى «تۇركسىب», «امانگەلدى ساربازدارى», «قالىڭدىق», تاعى باسقا كوركەم تۋىندىلارىنان – ەپيكالىق اۋقىمدىلىق, ۇلتتىق بوياۋدىڭ ايقىندىعى كورىنەدى.
سۋرەتشى ۇلتتىق دۇنيەتانىم شەڭبەرىندە حالقىمىزدىڭ تۇرمىس-تىرشىلىگىن ءدال بەينەلەي ءبىلدى. ونىڭ «كيىز ءۇيدىڭ ىشكى كورىنىسى», «قىز جىبەك», «قىز ۇزاتۋ», «قوس قۇربى», «كەلىن ءتۇسىرۋ» تاعى باسقا شىعارمالارى ۇلتتىق قازىنامىزعا اينالدى.
قىلقالام شەبەرى مادەنيەت تاريحىنىڭ, رەسپۋبليكالىق قوعامدىق ءومىردىڭ جىلناماسىن جاسادى. اباي مەن قاستەەۆ اراسىنداعى سىرلى بايلانىس دۇنيەنى ەستەتيكالىق-كوركەمدىك تۇرعىدان تانۋدىڭ, ونەر وزەكتەستىگىنىڭ, رۋحاني ساباقتاستىقتىڭ كورىنىسى. سۋرەتشىنىڭ سۇيىكتى كەيىپكەرى اباي تۇلعاسى بولدى.
«اباي كيىز ءۇي الدىندا», «جاس اباي», «اباي جاز جايلاۋدا», «بۇركىتشى», «قىس», «جاز», «كوكتەم» اتتى شىعارمالارى ارقىلى سۋرەتشى اباي كەلبەتىن ءار قىرىنان سومدادى.
«قازان توڭكەرىسى», 2 مارتە «ەڭبەك قىزىل تۋ», «قۇرمەت بەلگىسى» وردەندەرىمەن ماراپاتتالعان. شىمكەنت قالاسىنداعى ونەر ۋچيليششەسى, قر مەملەكەتتىك ونەر مۋزەيى ايگىلى سۋرەتشىنىڭ ەسىمىمەن اتالادى. ءابىلحان قاستەەۆتىڭ ءجۇز جىلدىق مەرەيتويى يۋنەسكو كولەمىندە اتاپ ءوتىلدى.
مادەنيەت جانە اقپارات مينيسترلىگىنىڭ ءباسپاسوز قىزمەتى قازاقتىڭ تۇڭعىش كاسىبي سۋرەتشىسىنە ارنالعان ء«ابىلحان قاستەەۆ. عاسىر مۇراسى» اتتى كورمەنىڭ سالتاناتتى اشىلۋى 17 قاڭتاردا ساعات 16.00-دە ءا.قاستەەۆ اتىنداعى قر مەملەكەتتىك ونەر مۋزەيىندە وتەتىنىن حابارلادى. ەكسپوزيتسيا كورنەكتى قازاق سۋرەتشىسىنىڭ شىعارماشىلىعىنىڭ قالىپتاسۋى تۋرالى باياندايدى. ەكسپوزيتسياعا حح عاسىردىڭ ەڭ ماڭىزدى تاريحي كەزەڭدەرىن بەينەلەيتىن 300-دەن استام كوركەم جانە گرافيكالىق تۋىندىلار قويىلادى.