ەلىمىزدە 200 تەڭگەلىك بانكنوتالار ءىس جۇزىندە اينالىمنان شىعىپ قالعانىن بايقاۋعا بولادى. ۇلتتىق بانك مۇنداي نومينالداعى جاڭا بانكنوتالار ەندى شىعارىلمايتىنىن ايتتى, دەپ حابارلايدى Egemen.kz.
«نومينالى 200 تەڭگەلىك بانكنوتالاردى شىعارۋ بويىنشا ۇلتتىق بانك 2020 جىلعى 28 قاڭتاردا 2020 جىلعى ۇلگىدەگى نومينالى 200 تەڭگەلىك مونەتالاردى اينالىمعا شىعارعانىن حابارلايمىز. وسىعان بايلانىستى ۇلتتىق بانك بۇدان بىلاي نومينالى 200 تەڭگەلىك جاڭا بانكنوتالاردى شىعارمايدى», دەپ حابارلادى ۇلتتىق بانك.
سونىمەن قاتار بۇل نومينالداعى بانكنوتالار ءۇشىن اينالىمدى اياقتاۋدىڭ بەلگىلەنگەن مەرزىمى جوق. ولار تابيعي تۇردە توزعاندىقتان اينالىمنان شىعادى جانە نومينالى 200 تەڭگەلىك مونەتالارمەن اۋىستىرىلادى.
ايتا كەتەيىك, ۇلتتىق بانك جاڭا نومينالدى بانكنوتالار مەن مونەتالاردى اينالىمعا شىعارۋ جوسپاردا جوق ەكەنىن ايتتى.
بۇعان دەيىن ۇلتتىق بانك 2023 جىلعى 25 جەلتوقساننان باستاپ جاڭا ديزاينداعى نومينالى 5 000 تەڭگەلىك بانكنوتالاردى اينالىمعا شىعارعان ەدى.