ەلوردا اۋەجايىنىڭ ۇشۋ-قونۋ جولاقتارىن كۇردەلى جوندەۋدەن وتكىزۋ جوسپارى بەلگىلى بولدى, دەپ حابارلايدى Egemen.kz.
قازاقستان ۇكىمەتىنىڭ استانا حالىقارالىق اۋەجايىن باسقارۋعا العان شەتەلدىك ينۆەستورعا قويعان بىردەن-ءبىر ماڭىزدى مىندەتى – اۋەجايدىڭ ۇشۋ-قونۋ جولاعىن جاقىن ارادا كۇردەلى جوندەۋدەن وتكىزۋ بولاتىن. استانا حالىقارالىق اۋەجايىنىڭ اۋەايلاعى سالىنعاننان بەرى اعىمداعى جوندەۋ جۇمىستارىنان ءوتىپ كەلەدى. ەلوردا اۋەجايىنىڭ ۇشۋ-قونۋ جولاعى سوڭعى رەت بىلتىر شىلدە-تامىز ايلارىندا كۇردەلى جوندەۋدەن ءوتتى.
كولىك ۆيتسە-ءمينيسترى تالعات لاستاەۆتىڭ توراعالىعىمەن وتكەن جيىندا اۋەجاي باسشىلارى اەرودرومدى كۇردەلى جوندەۋگە قازىردەن باستاپ قىزۋ دايىندىق ءجۇرىپ جاتقانىن ايتتى.
«ينۆەستورلار جوبالىق-سمەتالىق قۇجاتتامانى قاڭتار-اقپان ايلارىندا تالداپ, اقپاننىڭ سوڭى مەن ناۋرىزدىڭ باسىندا مەردىگەردى انىقتاۋدى كوزدەپ وتىر. الدىن الا جوسپارلار بويىنشا, مەردىگەر ناۋرىز ايىنىڭ ورتاسىنا دەيىن استانادا بار كۇشىن جۇمىلدىرۋى كەرەك. ينۆەستورلاردىڭ جوسپارى بويىنشا, ەگەر اۋا رايى قولايسىزدىق تۋدىرماسا, ءساۋىر ايىنىڭ باسىنا قاراي اەرودرومدا كۇردەلى جوندەۋ جۇمىستارى باستالۋى كەرەك. الدىن الا جوسپار بويىنشا كۇردەلى جوندەۋ جۇمىستارى 12 ايعا سوزىلادى. دەگەنمەن, اۋەجاي كۇردەلى جوندەۋ كەزىندە جۇمىسىن جالعاستىرادى. ۇشۋ مەن قونۋدى تەك كۇندىز عانا شەكتەۋگە بولادى», دەپ حابارلادى كولىك مينيسترلىگى.