تۋريزم جانە سپورت ءمينيسترىنىڭ ورىنباسارى ەرجان ەركىنباەۆ Air Asia ح اۋە كومپانياسىنىڭ باس ديرەكتورى بەنيامين بين يسمايل جانە كومپانيا وكىلدەرىمەن كەزدەستى. تاراپتار قازاقستاننىڭ تۋريستىك الەۋەتىن دامىتۋ پەرسپەكتيۆاسىن, جولاۋشىلاردى ارتتىرۋ جوسپارىن تالقىلادى, دەپ حابارلايدى Egemen.kz.
ونىڭ ايتۋىنشا, تىكەلەي رەيستەردىڭ اشىلۋى – ازىرشە تەك ءبىرىنشى كەزەڭ.
«تىكەلەي رەيستەر ساياحاتشىلار ءۇشىن قولايلى جاعداي جاساپ قانا قويماي, ەلىمىزدى شەتەلدىك تۋريستەرگە قولجەتىمدى ەتەدى. سونىمەن قاتار تۋريستەر سانىنىڭ ارتۋىنا, كەلۋ ءتۋريزمىنىڭ گەوگرافياسىن كەڭەيتۋگە جانە تۋريستىك بيزنەسكە جاڭا مۇمكىندىك جاسايدى», دەدى ەرجان ەركىنباەۆ.اۋە رەيستەرى ەكى ەل اراسىنداعى ساۋدا-ەكونوميكالىق بايلانىستاردى دامىتۋدا شەشۋشى ءرول اتقارادى. ولار ىسكەرلىك كەلىسسوزدەردى جەڭىلدەتىپ, ساۋدا مەن ينۆەستيتسيانى ىنتالاندىرادى. كۋالا-لۋمپۋر مەن الماتى اراسىندا اشىلاتىن رەيستەر اياسىندا بيزنەس-تۋريزم اعىنىنىڭ ارتۋى بولجاندى. بۇل تاجىريبە مەن ءبىلىم الماسۋعا ىقپال ەتىپ, ينۆەستيتسيالاۋ مۇمكىندىگىن كەڭەيتەدى.ءوز كەزەگىندە Air Asia وكىلدەرى كۋالا-لۋمپۋر مەن الماتى اراسىندا 2024 جىلدىڭ ناۋرىزىنان باستاپ اپتاسىنا ءتورت رەيس (سەيسەنبى, بەيسەنبى, سەنبى جانە جەكسەنبى) جيىلىگىمەن تىكەلەي تۇراقتى جولاۋشىلار رەيسىن ىسكە قوسۋعا نيەتتى ەكەنىن جەتكىزدى.
اۋە كومپانياسى وكىلدەرىنىڭ ايتۋىنشا, بۇل قادام ەكى ەل اراسىنداعى تۋريستىك, ساۋدا-ەكونوميكالىق جانە ينۆەستيتسيالىق ىنتىماقتاستىق ءۇشىن جاڭا مۇمكىندىكتەر اشپاق.