سارسەنبىنىڭ ساتىندە قىزىلاعاش اۋىلىنداعى 200 وتباسى كەڭ, جارىق ۇيلەردىڭ كىلتىن الىپ, قۋاندى
بيىلعى ناۋرىز ايىندا تاسقىننان زارداپ شەككەن قىزىلاعاشتىقتاردىڭ باسىنا تۇسكەن اۋىرتپالىق بارشامىزدىڭ ەسىمىزدە. سودان بەرى ءۇش ايعا جۋىق ۋاقىت ءوتتى. وسى ارالىقتاعى قىزىلاعاشتىقتاردىڭ كورگەن قيىندىعىنا جۇرەك سىزداسا, قۋانعان ساتتەرىن “الاقايلاپ!” وقىرمان نازارىنا ۇسىنىپ كەلەمىز. بۇعان دەيىن جاڭا قونىسقا يە بولعان 145 وتباسى بايىپتى ءتىرشىلىكتەرىن جالعاستىرىپ, ء“وز ءۇيىم, ولەڭ توسەگىم” دەپ اياق سوزىپ, بەيقام تىرلىك كەشسە, ولاردىڭ بۇل ومىرلەرىنە قىزىققان اۋىلداستارى “قاشان ءۇيىمىز بىتەدى” دەپ قۇرىلىس جۇمىستارىن كوزدەن تاسا ەتپەي, دەگبىرسىزدىك تانىتقانى انىق.
سارسەنبىنىڭ ساتىندە تۇرعىنداردىڭ كوپتەن كۇتكەن قۋانىشتى ءساتىنىڭ ورايى كەلدى. قىزىلاعاشقا تابان تىرەگەننەن-اق وقتاي ءتۇزۋ كوشەلەردەگى ساپ تۇزەگەن ۇيلەر مەن جاڭا ومىرگە, جاڭا مەكەندەگى تۇششىمدى تىرلىككە كۋا بولاسىڭ. قۇرىش بىلەكتى قۇرىلىسشىلاردىڭ كۇن-ءتۇن دەمەي ەڭبەكتەنۋى ناتيجەسىندە ومىرگە قايتا كەلگەن جاڭا اۋىلعا كوڭىل تولادى. بۇرىنعىداي ەمەس, حالىقتىڭ جۇزىنەن ەرەكشە جىلىلىق سەزىلەدى.
جينالعاندار الدىندا وبلىس اكىمى سەرىك ۇمبەتوۆ مەملەكەت باسشىسىنىڭ تىكەلەي قولداۋىمەن, بارشا قازاقستاندىقتاردىڭ جاردەمى ارقاسىندا قىسقا مەرزىمدە تاسقىننان زارداپ شەككەن قىزىلاعاش, ەگىنسۋ, اقتوعان ەلدى مەكەندەرىندەگى قالپىنا كەلتىرۋ جۇمىستارى تياناقتى اتقارىلعانىنا توقتالدى. ادامدى قۋانتقاننان ارتىق باقىت جوق. كوكتەمدەگى جاعدايدى ۇمىتۋعا بولمايدى. دەسەك تە, ونىڭ ورنىن تولتىرۋعا كۇش سالىنۋدا. بۇگىن 200 تۇرعىنعا جاڭا ءۇيدىڭ كىلتى تاپسىرىلادى. دەمەك, وسىنشاما وتباسى قۋانادى. بۇعان دەيىنگى باسپاناعا يە بولعاندار تۇرمىسقا قاجەتتىلىكتەرمەن تولىق قامتىلدى. وزدەرىڭىز كورىپ وتىرعانداي, كوشەلەر اسفالتتالىپ, الماتى-وسكەمەن قالالارىن جالعاستىراتىن كوپىر كۇزگە دەيىن تولىق بىتەدى. جاقىندا جومارت جانداردىڭ دەمەۋشىلىگىمەن ءار ۇيگە تەلەديدار سىيعا تارتىلىپ, اۋىل تۇرعىندارى كوگىلدىر ەكران قىزىعىن تاماشالاۋ مۇمكىندىگىنە يە بولدى. تەلەفون بايلانىسى قالپىنا كەلتىرىلدى. ەندى قالعان اۋىل تۇرعىندارى ايدىڭ اياعىنا دەيىن باسپانالى بولىپ, جاڭا ۇيلەرگە تولىق قونىستانىپ بىتەدى. وتكەندە ايتىلعانداي, ءار وتباسىنا 10 قوي, ءبىر سيىر, ءبىر جىلقى بەرىلەدى. كۇزگى استىق جيناۋ ماسەلەسى شەشىلسە, كوكونىس پەن باقشا داقىلدارى دا كۇتىمگە الىنعان. قوڭىر كۇزدەگى جيىن-تەرىننەن كەيىنگى الىنعان ءونىم وزدەرىڭىزگە تاراتىلادى. بۇگىنگى كۇنگە كومەك رەتىندە ءارتۇرلى قارجى كوزدەرىنەن كەلىپ تۇسكەن قارجى كولەمى 7 ملرد. 393 ملن. تەڭگەدەن استى. بۇل قاراجات ەلدى مەكەندەردى تولىق قالپىنا كەلتىرۋ جۇمىستارىنا جۇمسالۋدا. ماسەلەن, ۇكىمەت رەزەرۆىنەن 2548,6 ملن. تەڭگە جاڭا ۇيلەردىڭ قۇرىلىسىنا, 253,0 ملن. تەڭگە كۇردەلى جوندەۋ جۇمىستارىنا, 500,0 ملن. تەڭگە جول مەن كوشەلەردى جوندەۋ, سالۋ جۇمىستارىنا ماقساتتى جۇمسالۋدا, دەدى اكىم.
بۇدان كەيىن وبلىس باسشىسى جاڭارعان اۋىلداعى دوستىق, اسار, مۋسينا, تاعى باسقا كوشەلەردەگى ۇيلەرگە قونىستاناتىن تۇرعىندارعا جاڭا ءۇيدىڭ كىلتتەرىن تابىس ەتتى. جينالعاندار الدىندا سويلەگەن زەينەتكەر سايلاۋبەك ساعىنبەكوۆ, ۆاسيلي گولۋششەنكو, اقتوعاندىق ليديا بەرۆينوۆا, ساعي جاڭىلبەك مەملەكەت باسشىسىنىڭ, بارشا قازاقستاندىقتاردىڭ قيىن ساتتەگى قولداۋى مەن وبلىس اكىمىنىڭ, قۇرىلىس كومپانيالارىنىڭ قىسقا مەرزىمدەگى قالپىنا كەلتىرۋ جۇمىستارىنىڭ تياناعىن كەلتىرگەنىنە توقتالىپ, يگى تىلەكتەرىن جەتكىزدى.
– بۇگىن اۋىلدا قۋانىشتى ءسات. تاسقىننان ءۇيىمىز زارداپ شەگىپ, ەرتەڭىمىزگە الاڭداعان كۇندەر ارتتا قالدى. دەگەنمەن, اۋىل ءدال بۇگىنگىدەي تۇرلەنەدى دەپ ويلامادىق. ارينە, بۇل پەندەشىلىگىمىزدەن. ءۇش اي مەرزىمدە ءۇيىمنىڭ ورنىنا حان سارايىنداي باسپانا سالىندى. وتباسىمنىڭ بۇگىنگى قۋانىشى ەرەكشە. پرەزيدەنتكە راحمەت. حالىققا راحمەت. قيىن ساتتە بىزگە دەگەن قامقورلىعى مەن دەمەگەنىن ۇمىتپايمىز. جانىڭ قينالعاندا جاسالعان جاقسىلىق ەسىڭدە قالىپ, ۇمىتىلمايدى, – دەدى جاڭا ءۇيدىڭ كىلتىن العان اسىل ىدىرىسوۆا. مۇنداي لەبىزدەردى وزگەلەر دە ايتىپ جاتتى.
اۋىلدى الماتى-وسكەمەن كۇرە جولى كەسىپ وتەدى. جولدىڭ ەكى جاعالاۋىنداعى تۇرعىن ۇيلەردىڭ جان-جاعى قورشالىپ, سايالى اعاش كوشەتتەرى وتىرعىزىلعان. ەرتەگىدەگىدەي جاڭا قالاشىقتى كورگەندەر قىزىققاندارىن جاسىرماي, “قان-داي ادەمى ۇيلەر” دەپ تامساندى. بىلەك بىرىكتىرگەندە بىتپەيتىن ءىستىڭ جوقتىعىن دالەلدەگەن قىزىلاعاشتاعى قارقىندى جۇمىس وسىلاي جالعاسىپ, جۇرتشىلىق ونىڭ يگىلىگىنە بولەنگەن.
وبلىس اكىمى جاڭا ۇيلەر پايدالانۋعا بەرىلگەن سايىن ءار شاڭىراققا كىرىپ, قۇتتى بولسىن ايتىپ كەلەدى. بۇگىن دە سول ءداستۇرىن جالعاستىردى. اكىم “التىن القالى” انا قانشايىم ابدۋلداەۆانىڭ شاڭىراعىنا ايالدادى. بۇرىنعى ەسكى ءۇيىنىڭ ورنىنا سالىنعان باسپانانىڭ ءىشى مەن سىرتى اسەم-اق. بولمەلەرى كەڭ. باتىر انانىڭ كۇنسۇلۋ, ايسۇلۋ, ايگۇل, الماگۇل, ءجاميلا, دينارا, گۇلميراسى مەن ۇلدارى ەرمەك, بەرىك, كەلىنى جۇلدىز قوناق كۇتىپ, جۇگىرىپ ءجۇر. قونىس تويىنا قۇتتى بولسىن ايتقان اجەلەر شاشۋىن شاشسا, كورشىلەرى قاماش پەن باقىت تا وسىندا.
كەيۋانا وزىنە كورسەتىلگەن قۇرمەتكە انالىق العىسىن ءۇيىپ-توگۋدە. ءار بولمە جيھازبەن, قاجەتتىلىكتەرمەن جابدىقتالىپتى. گاز پليتاسىنىڭ ۇستىندە بۋى بۇرقىراعان جاس سورپا مەن شاي قايناپ جاتىر. قوناق بولمەدەگى ۇلكەن ۇستەل مەن ورىندىقتار, جاتىن بولمەدەگى توسەكتەر ۇيمەن بىرگە بەرىلگەن سىيلىق ەكەنىن قانشايىم اجە ايتۋدان جالىقپادى.
وبلىس باسشىسى باستاعان توپ جارمۇحامەد رۇستەموۆ, بولات قوجاحمەت, تاعى باسقا جاڭا شاڭىراققا قونىستانۋشىلاردىڭ تابالدىرىعىن اتتاپ, جاعدايلارىمەن تانىسىپ, جايىلعان داستارقاننان ءدام تاتىستى. ال اۋىلدىڭ بايىرعى تۇرعىنى چەشەن ۇلتىنىڭ وكىلى حاۆا دۋداي قۋانىشتان ۇيالى تەلەفونىنداعى اۋەندى قوسىپ, بيلەي جونەلدى. سەكسەننەن اسقان اناسى باياتا قىزىنىڭ تولقىعان ءساتىن قوشتاپ قويادى.
جاڭا ۇيلەرگە سىمسىز تەلەفون جۇيەسى ورناتىلسا, الىس-جاقىنداعى تۋىستارى حابارلاسىپ, قىزىلاعاشتىقتاردى قۋانىشتارىمەن قۇتتىقتاعان ءساتىنىڭ دە كۋاسى بولدىق. جاقسىعا جان جادىرايدى دەمەكشى, جاڭارعان, جاسارعان قىزىلاعاش اۋىلىنىڭ بۇگىنگى تىنىس-تىرشىلىگى وسىنداي.
سۋرەتتەردە: جاڭارعان اۋىل كورىنىسى; جاڭا ۇيلەرگە قونىستانعانداردىڭ قۋانىشتى ساتتەرى.
كۇمىسجان بايجان, سۋرەتتەردى تۇسىرگەن جەڭىس ىسقاباي. الماتى وبلىسى.