«Qazaqstan: تۇراقتى دامۋ مودەلىنە قاراي». ءدال وسىنداي اتاۋمەن جاس ساراپشىلار تالداۋ ماتەريالدارىنىڭ جيناعى ەلەكتروندى نۇسقادا جارىق كوردى. جيناققا وقىرمان ەركىن قول جەتكىزە الادى.
باسىلىمدى سەنات جانىنداعى جاس ساراپشىلار كلۋبىنىڭ مۇشەلەرى «تالداۋ مەكتەبى» جوباسىنا قاتىسۋشىلارىمەن بىرگە دايىنداعان بولاتىن. باسىلىم ماتەريالدارى ساراپشىلاردىڭ ەلىمىز پرەزيدەنتىنىڭ كەشەندى رەفورمالارىن ىسكە اسىرۋدىڭ ءتيىمدى جولدارى مەن تەتىكتەرىن ويلاسۋعا قوسقان ۇلەسىنىڭ بىرلەسكەن العاشقى قادامى.
جيناقتىڭ تۇساۋكەسەرى بيىل 21 قاراشادا سەنات توراعاسى ماۋلەن اشىمباەۆتىڭ قاتىسۋىمەن وتكەنىن ەسكە سالا كەتكەن ءجون.
«مەملەكەتتىك باسقارۋ جۇيەسىنىڭ تيىمدىلىگىن ارتتىرۋ ءۇشىن مەملەكەتتىك ورگاندار قىزمەتىندە تالداۋ جۇرگىزۋ باعىتىن كۇشەيتۋ قاجەت. پرەزيدەنتىمىز قاسىم-جومارت توقاەۆ وسى ماسەلەگە ءاردايىم باسا ءمان بەرىپ كەلەدى. مەملەكەت باسشىسى ۇلتتىق قۇرىلتايدىڭ ەكىنشى وتىرىسىندا مەملەكەتتىك باسقارۋدىڭ تيىمدىلىگى نەگىزىنەن تالداۋمەن قامتاماسىز ەتۋدىڭ ساپاسىنا بايلانىستى ەكەنىن ايتتى», دەپ اتاپ ءوتتى سەنات توراعاسى تۇساۋكەسەر بارىسىندا.
باسىلىمدا ەلىمىزدىڭ ينفلياتسيالىق, وڭىرلىك ەكونوميكالىق ساياساتىنىڭ ءارتۇرلى اسپەكتىسىنە, ترانزيت-كولىك الەۋەتى سالاسىنا, ءبىلىم بەرۋ پروبلەماسىن شەشۋدەگى بيزنەستىڭ رولىنە, جاستار ساياساتىن ىسكە اسىرۋ ماسەلەسىنە, سونداي-اق مۇگەدەكتىگى بار ادامداردى ينكليۋزيالىق دامىتۋعا جانە جۇمىسقا ورنالاستىرۋعا قاتىستى قازاقستاننىڭ الەۋمەتتىك-ەكونوميكالىق وركەندەۋىنىڭ التى باعىتى بويىنشا ماتەريالدار قامتىلعان.
جيناقتا شەشىم قابىلداۋشىلاردىڭ, زەرتتەۋشىلەردىڭ جانە قازاقستاننىڭ الەۋمەتتىك-ەكونوميكالىق دامۋىنىڭ زاماناۋي اعىمدارىنا قىزىعۋشىلىق تانىتقانداردىڭ جۇمىسىندا پايدالى بولاتىن قازىرگى احۋالعا تالداۋ, ۇسىنىمدار مەن قۇرالدار ۇسىنىلعان.